山區裡的走走趯趯: 小欖燒烤樂園 BBQ by the Beach：燒烤滋味博欖

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2017年12月10日星期日

小欖燒烤樂園 BBQ by the Beach：燒烤滋味博欖

學生年代，都幾鍾意同啲同學仔去燒嘢食，好玩吖嘛。近年燒烤，唔使多講，都喺以去燒烤場為主，重點喺方便吖嘛！俾錢就代勞晒安排一切，而且，身邊嘅朋友又有晒仔女，比起郊野公園，燒烤場配套好啲，又安全啲，就自然揀佢哋。趁入秋，又未到寒冬，同其中一家細胞小組組員入到嚟「小欖燒烤樂園」玩番日。

雖然話入到屯門小欖，但我哋一班都喺西九龍人，一程52X巴士直剷入嚟，都非常快。而落車步行唔使分鐘就到燒烤場。場內地方非常之大，分好多組區域，大體可以講有兩類場區，第一類喺有瓦遮頭嘅燒烤區，即有固定遮風擋雨嘅設施，感覺有點室內性。

另一類就屬於戶外性啲，因為，全部枱櫈、燒烤爐擺晌露天地方，單單靠巨型太陽遮擋擋陽光。今日天氣咁好，陽光燦爛，點都唔會落雨，所以揀戶外位。由於我哋早到，仲有大把枱俾我哋慢慢揀，結果，就揀到個露天沙灘邊位，仲要近少少食物區嗰邊，攞嘢、洗手都叫近少少嘛。雖然初段喺大風啲，但景觀開揚，又相對較少人晌身邊穿穿插插，尤其下午過後，差唔多爆場時，我哋個位就顯得更有優勢。

順帶講埋個價錢，星期六日（11:00an-1:00am）嚟講成人收$140，小童或長者收$110，全日收費，無時間限制，即喺開爐燒到佢哋收鋪，而個收費就包全日任食、1支蒸餾水、1罐汽水及1份燒烤餐具。另收$40開爐費，包一次開爐、兩包炭、1個托盤、1碗蜜糖及1卷廁紙，總之基本嘢就齊晒。俾好錢入場，跟住就自己揀爐，再搵師傅開爐，嘩！三兩下手勢就爐就透起。

未講食之前，講埋啲配套先，晌攞用品及食物區旁，有多組鋅盆，洗手、洗嘢食都得。最細心喺側邊有條小梯級，明顯喺俾啲細路仔用。

後方少少，就喺廁所，外觀望落好企理呀！個場咁大，人咁多，到後段乾淨度都算OK。

搵到位，起咗爐，兵分兩路，一路去攞用品，包括：托盤（拎食物用）、燒烤叉、蜜糖、膠碟、鋼叉及廁紙。

唔夠蜜糖用，又或想加啲辣醬、辣椒豉油食嘢用，櫃枱都有得自行添加。

晌小賣部仲有其他額外調味料、燒烤食物、燒烤用品賣，唔鍾意用燒烤叉，大可買個網大量燒烤製作；此外，甚至玩具、沙灘用品都有，真喺唔愁無嘢玩。

另一路就梗喺「搵食」啦，大部份肉類食物都喺放晌一列長長凍櫃內，以保新鮮，食物選擇非多之多，計有咖喱魷魚、五香雞腎、秘製叉燒粒、蜜汁金沙骨、黑椒牛扒、沙嗲豬扒、山賊牛仔粒、蜜味雞扒、麻辣雞翼、黑椒雞翼、韓式雞翼、甜酸雞翼、香草雞翼、土匪雞翼、南乳雞翼、燶邊叉燒雞翼、黑椒豬頸肉、沙嗲雞全翼、美國廚師睇、章魚燒、脆皮芝士腸、魚蛋、墨魚丸、香菇貢丸、牛根丸、魚肉燒賣、司華力腸、大紅腸、獅子狗魚蛋、豆腐卜，喺咪真喺好多呢！而所有食物需由店員拎取，只要講要乜及數量就可以，佢會放晌你嘅托盤之上，予人感覺衛生，亦唔使你夾到周圍跌。

除以上食物，走過少少，仲有啲麵包、法包、車厘茄、青椒、茄子及翠玉瓜，全部放入大膠箱中，自由夾取。

由於喺任夾任食，當然，食幾多攞幾多，避免食唔晒嘥嘢。故店方都有個「顧客注意」警示牌，相信未必硬性執行，志在提醒大家而已，希望大家都做個惜飲惜食嘅人。

講完食，就講飲，包一罐飲品，晌櫃枱就見到有咩選擇，唔多講，「看圖識字」好過。

寫到呢度，都肚餓啦，但仲未食得住，因為好欣賞佢哋嘅燒烤爐設計，側邊有個放蜜糖嘅位，好方便；另外，備有長夾，喺夾碳用，依啲都喺細心位。同埋啲炭幾好燒，乾身又夠大嚿，燒起嚟幾「襟」燒。

第一盤燒烤食物

晌拎食物時，見有張推廣紙，介紹其雞翼亮點，上文介紹食物時都有提及，真喺好1少燒烤場會一次過提供共8款口味嘅雞翼，所以，第一盤肉點都要拎齊8款返嚟試試，再加啲腸同丸快熟嘅食物。

啲雞翼拎到返嚟已經唔知邊款打邊款，再燒一燒更加亂晒，不過，食勻咁多隻，綜合而言，小弟覺得款款都好食，最心水記憶喺甜酸、土匪及南乳，味道有個性而且突出；此外，啲丸類都唔錯，至緊要唔好喺「佳寶」貨色，又油又粉。

第二盤燒烤食物

墊一墊肚，跟住就可以慢慢燒肉，所以，第二盤就「肉感」十足，基本上大部份肉類都有揀，再加啲魷魚，蔬菜都唔少得，平衡番一下嘛。此外，再拎啲方包烤香用嚟夾牛扒食。

又要綜合而言，多款肉類都正，小弟個人心水有蜜汁金沙骨、黑椒牛扒、沙嗲豬扒、山賊牛仔粒（首推添）、蜜味雞扒、黑椒豬頸肉，而咖喱魷魚味道得，亦好爽口，但偏鹹。故此，以燒烤場嚟講，總體真喺有水準，至少好少偏鹹嘅情況出現，亦唔會嚟嚟去去得一隻味。

講完飲飲食食，雖然大人繼續燒，但小朋友點會輕易就範乖乖坐晌度吖，燒烤場對出就有個大沙灘，屬公眾嘅，但燒烤場逢星期六、日會開放直接通道出去，但記得被守門口阿叔打印仔，否則唔能夠免費入番嚟。出面個沙灘幾大幾靚，啲沙都幼細，出嚟玩吓波、飛碟都得，但見唔少人放紙鳶，無準備唔緊要，燒烤場都有得買。

此外，近入口仲設有個「小小樂園」嘅攤位遊戲區，有啲玩具釣魚，砌積木……之類，啱啲三幾歲嘅小朋友，喺店家嘅增值服務，所以，並非免費架，但就多個娛樂俾小朋友。

之但喺，一講到最能俾啲十來歲嘅人仔放電，非燒烤場側嘅「充氣彈床樂園」莫屬（逢星期六、日、公眾假先有），唔喺得一個彈床應酬吓你哋，而喺大過個籃球場嘅地方，有多組唔同玩法，造型得意嘅充氣彈床，入內要除鞋，更設中午晚3段清潔時間，所以，家長放心及安心俾啲細路嚟玩。我組員啲細路都玩到喪呀，搞到我都想落埋場玩囉！收費20分鐘券$60、3張 20分鐘券$140、全日票$220。