我知佢哋嘅烏冬、拉麵、飯品都水準不俗，尤其其海藻烏冬，屬店家名物，上次都有試過，而甜品更喺另一亮點。以種類而言，有撈烏冬系列、熱湯烏冬系列、冷烏冬系列、咖喱系列、意大利粉系列、日式咖啡、熱菜、窩夫系列、班戟系列、芭菲系列、蛋糕及蛋卷系列、杏仁蛋白餅系列、曲奇系列，一時間真哋睇到眼花繚亂，樣樣都想試。
抹茶窩夫配日本抹茶雪糕、栗子蓉、抹茶曲奇 $68
其中一個表姨甥女喺窩夫粉絲，預咗佢會點窩夫，在乎揀咩味道。雖然佢話自己唔喺抹茶控，但呢一款配搭比較特別，就揀抹茶窩夫，一睇賣相就知真喺花過心思，下過苦工。寫明抹茶窩夫就堅加入抹茶粉去做，睇邊邊都望到，一切開窩夫心更清晰墨綠一片，伴上抹茶雪糕，再淋上吉士漿，多添一分香甜味；
栗子蓉咪以為淨喺伴碟唧一堆就算，配上鮮忌廉，再灑上唂咕粉、抹茶粉及放啲粟米脆片，跟窩夫一齊食更有畫龍點睛之效。
窩夫入口鬆軟而香脆，帶淡淡抹茶香；抹茶雪糕亦好夠抹茶味，濃香帶點甘苦，口感柔滑；栗子蓉打得清甜幼滑，夾埋晒一齊食，食味一流。
另一邊廂嘅抹茶曲奇，香脆可口，同樣充滿抹茶甘苦香味。一客甜品，品嚐到多種味道，又有唔同口感嘅食物，叫人輕易獲得甜蜜滿足。
日本草莓班戟 $88
班戟就喺小弟心水，落單時侍應特意提話喺厚班戟而唔喺早前流行嘅梳乎理班戟，相信有唔少客人有誤會，但睇餐牌時已留意到呢點，厚班戟我都鍾意，其實，比起薄煎起嚟仲要考功夫。
上枱嘅實物有啲驚喜，跟住餐牌嘅圖片，確喺有件焦糖布甸，你知啦，好多時出面嘅餐牌跟實物唔一樣嘛。其實，整道窩夫真喺擺得幾靚仔，班戟面淋上新鮮士多啤梨果醬及果肉，又雕咗啲士多啤梨薄片，又畫晒花，更灑上點點開心果粒作點綴，賣相亮麗攞滿分。
兩件班戟都煎得金黃，輕按一下有回彈力，食落軟綿有蛋香，而士多啤梨果醬鮮甜自然，事後跟店員傾兩句時先知喺自家打製，無用現成貨，雲呢嗱雪糕亦好軟滑，三者拼埋一齊食，滋味三重奏；
而嗰件焦糖布甸亦無迤做，既有蛋味，又有焦糖香，口感滑溜，掂喎！所以，整體賣相、味道都出色，好睇又好食。
入嚟之前晌鋪面已駐足睇咗陣，因為餅櫃有好多款佢哋嘅招牌蛋卷及蛋糕，佢哋嘅蛋卷的確做得出色，上次食套餐時都試過啲小蛋卷，今回嚟食下午茶又無理由唔試番件架。
大餐牌中就有一個「蛋糕茶套餐」，$59配$30蛋糕，$69配$40蛋糕，任揀一款蛋卷或蛋糕，配一杯上等斯里蘭卡白毫紅茶。
黑芝麻蛋卷（$59套餐）
唔單止中間嘅忌廉加入黑芝麻去做，海綿蛋糕部份亦混入黑芝麻粉，一身「烏卒卒」，帶嚟濃香嘅黑芝麻味，而且，做得鬆軟有彈性；中間嘅忌廉芝麻味同樣突出，打得輕柔，唔會有種好膩嘅感覺，加上配紅茶，一切嚟得好完美。
汀普拉白毫紅茶（套餐）
蛋糕茶套餐嘅上等斯里蘭卡白毫紅茶有3款口味：努瓦拉艾莉雅（淡味）、汀普拉（中度濃味）、烏亞（濃味），我哋揀咗中度嘅汀普拉。
雖然話喺一杯，其實喺一壺先啱，飲完可以要求加熱水再續杯，而且，店員非常醒目，知我哋共享，多拎一隻茶杯俾我哋。款汀普拉飲落唔會太濃太澀，茶底清幽，口感有種滑滑哋嘅感覺，感覺舒服，挺合我哋心意。
宇治焙茶奶 $40
此外，額外散點咗一杯宇治焙茶奶，細細杯，焙茶味又甘香、又有餘韻，配甜品也着實幾好喎！
星期一至五3:00pm-5:30pm嚟幫襯仲有八折優惠添，再可以慳多少少，若非撞着節日有得早收工，都無機會享用到呢啲着數呀。
雖然今回只喺嚟食個下午茶，但既滿意佢哋啲甜點，又好欣賞店員嘅服務，一頓稱心嘅下午茶，確喺令人心情暢快。
個人評分
味道：9/10
環境：8/10
服務：9/10
抵食：8/10
平均每人消費：HK$80
味道：9/10
環境：8/10
服務：9/10
抵食：8/10
平均每人消費：HK$80
餐廳資料：
宏 Hiroshi
紅磡德豐街8號黃埔花園第9期九號水產地下3號店
3523 1080
宏 Hiroshi
紅磡德豐街8號黃埔花園第9期九號水產地下3號店
3523 1080
沒有留言:
發佈留言