有時有朋友睇到小弟嘅一支公食評，就話又唔約佢，唓！有啲人約極都約唔到，約親都話有約，我一支公食不知幾自在。由公司行過嚟都喺十來分鍾，晌門口，仲見到個阿姐派優惠單張，惠顧滿$50就減$10，變相八折喎。
餐廳位處地庫，但由落梯樓梯嘅通道，至進入餐廳，都掛咗好多富越南特色嘅美食或地道景物照片。
加上一室綠色為主調，配以木系枱櫈，唔知點解，好似有種共產色彩。目測所見，全店都喺4人卡位，而且，設計闊落，不過，大棚人嚟就要分枱坐。
餐具好似時下茶記咁，放晒晌枱邊櫃桶，但擺放得井井有條。
主餐牌好大本，但有啲難影，所以，圖片方面就唔介紹，簡單以文字梳理吓就算，菜式分門別類，部份附有圖片，類別有湯粉類、撈檬類、越式傳統海濱、沙律、飯類、炒粉、地道小食、米紙卷、湯品、主食、燒物、越式煲仔類、田園青菜、特式飲品、港式飲品同埋甜品，數數吓，選擇認真多。
散點以外，備有多款精選套餐，有1人、2人、4人嘅套餐，無論揀邊款，選擇有彈性。
以小弟所揀嘅1人套餐為例，又有升級優惠，只喺加$18就多一款越式小食，絕對好着數。套餐包一杯港式熱飲，但亦可以加錢改其他嘢，如加$6轉越式特飲，加$18轉滴漏咖啡或椰青。
香茅豬頸肉米紙卷 +$18
寫到明一客3件，仲以為幾將貨就價得細細件，淨喺睇份量，加18蚊都覺得已經抵呀。每件都塞滿餡料，有豬頸肉、甘筍絲、米粉、青瓜絲、白蘿蔔絲及生菜，口感清爽，食味亦不俗，豬頸肉好重香茅味；雖然啲米紙薄透，但似乎浸得唔夠透，偏韌，要扣分。
越式火車頭 $72
喺店家嘅推介菜式之一，份量絕對喺名副其實嘅「火車頭」，無改錯名，因為底下藏咗好多越南粉，夠膽講夠兩個人食，早知份量咁足，就唔貪小便宜要埋客米紙卷。啲河粉夠爽滑，配菜又點？有齊生牛肉、牛腩片、牛丸、牛筋、牛栢葉，用料不賴兼份量足，生牛肉入口好嫩滑，牛腩片咬口有肉香，牛丸卻得一粒，算爽口，牛筋炆得腍滑帶點煙韌，牛栢葉就好爽口。至於個牛骨湯底好香，濃而不濁。伴有唔少金不換及青檸，不妨拌入湯中，味道會起出變化。
越南滴漏咖啡 +$18
茶記首選喺奶茶，食西餐首選喺咖啡，而到越南餐廳基本上都喺滴漏咖啡為首選，再者計過數咁先湊夠過百，可以用兩張優惠券，減足廿蚊，變相杯咖啡其實喺補$8啫。啲咖啡滴吓滴吓好有一滴滴精華嘅感覺，上配煉奶，可能煉奶偏少，咖啡嘅味道有點苦澀。
「鳴越」嘅份量的確夠晒大，無論加配嘅小食，抑或碗火車頭，而且，味道又唔錯，可以講得喺抵食挾大件，無加一，又有啲優惠券，服務又比一般茶記好好多，所以，性價比不俗！
個人評分
味道：8/10
環境：7/10
服務：7/10
抵食：8/10
平均每人消費：HK$88
環境：7/10
服務：7/10
抵食：8/10
平均每人消費：HK$88
餐廳資料：
鳴越越式料理 Ming Viet Vietnamese Cuisine
中環德輔道中144-148號安泰大廈地庫
2856 1498
鳴越越式料理 Ming Viet Vietnamese Cuisine
中環德輔道中144-148號安泰大廈地庫
2856 1498
沒有留言:
發佈留言