McCafe：我的星期六美孚早餐 ~ 麥麥幫襯

晌好耐日子前都寫過美孚萬事達嘅McCafe，自從大裝修後，麥記就幫襯咗幾次，但McCafe就反而未幫襯過，今早就輪到嚟McCafe嘆早餐。

新裝修後嘅麥記，感覺當然比舊嘅型格咗，摩登啲，主要喺啲枱櫈無咗膠，燈光又調和咗。

但比舊鋪，最唔同喺麥記嘅快餐區域同McCafe嘅咖啡店區域唔再明顯有區分，入到嚟，都無分邊度喺麥記，邊度喺McCafe。平日就唔知佢啲生意喺點，但星期六朝就非常好人，就算小弟9:30pm嚟到，都仲喺人山海。

咪以為嚟McCafe食早餐貴，識揀都可以好划算。因為有啲特價嘅特色咖啡，依期仲喺做緊榛子鮮奶咖啡只買$17杯，點咗嘢飲，又可以以優惠價點麵包、三文治產品，夾埋都唔使$30，但就質素比一般茶記嘅三文治餐高好多，亦比起去星巴克類嘅咖啡店，點同類產品平一半，但質素絕對唔差得幾多。

黑糖全麥包 $13

一份有兩片，可以揀配果醬（正價$16.5）或配忌廉芝士（正價$20），但買指定飲品，選忌廉芝士，都只喺$13一客。落咗單後，麵包都會烘熱奉客，咬落脆口，又有少少粗糙嘅原麥感，堅有朕朕黑糖香。再搽上忌廉芝士，厚厚嘅忌廉芝士配麥多，非常好食，皆因啲忌廉芝士極軟滑，淡淡芝士香味唔會太搶黑糖嘅香，如果喺巴馬臣或車打就會太搶喇！

雞肉火腿碎蛋芝味多士 $13 

正價賣$24，優惠價只喺$13，真喺超抵食之選，其實，對上一次嚟老婆又喺揀依一款多士，因為佢盡量戒紅肉，又少食太重牛油嘅牛角酥類嘅包。就算再食，水準無跌，至少餡料無縮水，份量仍然十足，有雞肉火腿、碎蛋、車打芝士，點好餐再烘焗，所以入口外層好脆口，鹹鹹香香，餡料又滿到瀉。

因為黑糖全麥包嘅忌廉芝士都有搽剩，所以，就搽埋落件多士度，實行雙重「芝」味，味道更正！

榛子鮮奶咖啡 $17

兩公婆今回都喺點榛子鮮奶咖啡，一來做特價，確實抵飲，二來之前飲過，水準不俗，拉花喺個太陽哥哥（定喺姐姐呢？），畫得唔錯吖，望落夠朝氣。味道上，既有咖啡嘅醇香，又有榛子嘅香味，口感算喺圓滑均勻。

順帶一提，晌McCafe買一杯熱飲或凍飲（樽裝嘢飲除外），可以儲一個印仔，儲夠4個印仔就送一杯細杯裝熱飲，算喺變相買4送1，一般大概都有一個月時間俾你儲，兩公婆嚟食兩次都已經儲到，入場門檻低，所以，久唔久就會嚟密密幫襯……兩次。

如果你覺得麥記啲快餐式漢堡喺垃圾食物，其實，只喺俾多少少嚟McCafe，會喺不一樣嘅選擇，食到「麥」有所值嘅出品。

個人評分
味道：8/10
環境：7/10
服務：7/10
抵食：9/10
平均每人消費：HK$30

餐廳資料：
McCafe
美孚美孚新邨第七期萬事達廣場地下N60A號舖
2786 2178