再入少少就喺用餐區，屈個彎原來餐廳非常之大，環境寬敞，樓底又高，皮椅讓人坐得好舒適。最吸晴相信喺牆上一幅黑白並以燈光打造出嘅曼克頓夜景。
黑白嘅餐牌當然喺呼應番餐廳嘅主調，不過，燈光比較昏暗，影出嚟嘅餐牌比較懞，所以，今次貼唔到出嚟俾大家參考。其實，如餐廳晌每張枱頂上加盞聚焦燈，唔單止影相會好啲，氣氛亦可得以提升。
自家製麵包籃
餐包都以白餐巾包住，有保溫作用，送上枱時仲微微暖。原以為都喺同一款包，正想拎起手發覺內裡喺兩款小圓包加個迷你英式鬆餅，鬆餅仲混有唔少甘筍絲及合桃碎，有誠意。
既為酒吧，又為餐廳，自不然飲品選擇非常多，炎炎夏日，冰涼嘅飲品就叫人最爽，加上嘆住扒，夾到無朋友。店長推介咗一系列雞尾酒，友人就揀咗，不過，酒就唔喺太啱我，另一面嘅沙冰、奶昔類就啱我多啲。
Apple Banana Shake $48
以蘋果、香蕉、橙汁及牛奶打成，香蕉味濃郁得嚟，都仲滲出絲絲蘋果香，兩者算得上味道均衡，不過，由於喺加入牛奶，而非雪糕去打成，所以，質感上無咁杰身，變得柔滑啲。
鮮蝦、芒果、牛油果沙律 $128
雖然目標喺嚟食扒，但都要平衡少少嘅，所以，點都要先搵碟沙律落肚，既開開胃，又補番多啲纖維質。鮮蝦、芒果、牛油果都喺喜愛嘅食材，配點沙律菜墊底，淋上芒果漿，鮮豔奪目，清新健康，最緊要喺啲蝦鮮爽，芒果清甜，牛油果夠熟，成件事就會好協調。
牛肝菌忌廉湯 $52
佢哋啲湯份量好足，兩個人共享一客都無問題。個牛肝菌忌廉呷一啖，菌味堅濃郁，而且，混和細碎嘅菌粒，飲完好有飽肚感。
蟹肉龍蝦湯 $72
友人所揀嘅龍蝦湯，同樣做得有一手，蝦味香濃，彷如啖啖龍蝦精華，而口感幼滑，湯內更有唔少蟹肉，絕無欺場嘅出品。
香煎意大利海鱸魚柳 $198
其中一位老友喺魚痴，主菜選咗一道海鱸我都估到喺咁，海鱸煎得靚仔，仲有兩大件之多，伴有西蘭花、車厘茄及薯蓉，賣相立體。海鱸煎得外皮極香脆，魚味不俗，但質感就未到最滑溜，有些微失色。
鋸扒喺是晚嘅目標，佢哋有好多選擇，唔喺講雞牛豬嘅選擇，而喺淨講牛扒都好多選擇，有平有貴，悉隨尊便。朋友就推介美國品牌Aspen Ridge嘅頂級天然安格斯，賣點喺100%素食飼養，絕不使用任何生長激素、抗生素，總之就喺夠天然。
美國Aspen Ridge頂級天然安格斯肉眼 $408/12oz
安格斯有肉眼及西冷供選擇，小弟喜歡肉味濃，就梗喺揀肉眼，反正要五乘熟，拿捏得好一樣可以燒得軟腍。燒肉眼萬變不離其宗，少少鹽同黑椒調味，燒出招牌式坑紋就對板喇！12安士嘅份量真喺唔講得少，成塊面咁十塊，落刀一切真喺好軟腍，色澤粉嫩卻喺唔會有血水滲出，入口腍滑，帶點油脂而富肉香，沾點燒汁，味道一流。唯一挑剔有兩點，一就喺件扒有少少筋，影響咗少少口感；二就喺所伴嘅時蔬欠特色，幸而薯條炸得香脆唔油，拉番啲分。
威靈頓牛柳 $308
依家少咗餐廳肯做威靈頓牛柳，因為嫌鬼煩，所以，難得依度有，友人就第一時間指定要試。酥皮內，除包住牛柳，仲放有唔少野菌粒，橫切一刀，件牛柳焗得好靚仔，恰到好處，咬落好嫩滑，又有肉味，酥皮算做得鬆化！
忌廉菠菜 $38
見佢哋啲額外配菜（Side dish）都喺賣$38，感覺幾抵，大家又想再食多少少菜，故添多一客忌廉菠菜。啲菠菜煮得夠晒腍，沾滿忌廉汁，口感更柔滑，極有奶香，好食。
焗蘋果酥餅 $68
去到呢個位，點可以少得甜品過過口癮。睇佢中文名會有少少誤會喺千層酥之類，但睇埋英文就知喺蘋果金寶，更伴有一球雲呢嗱雪糕，底層蘋果肉焗得軟腍充滿玉桂香，面面金寶粒唔算好多。
特濃朱古力布朗尼 $56
布朗尼又喺小弟另一心愛甜點，貪其味道濃郁，不過，曼克頓嘅出品無出面常見嘅布朗尼咁實淨，偏向蛋糕嘅質感，但朱古力味確喺好香濃；然而，合桃並無加入餅身內，卻喺焦糖化咗放晌餅面，小弟就較喜歡放入餅身內增添咬口感。
可能餐廳都好緊張啲出品，不時店長都走過嚟問問我哋意見，覺得啲嘢啱唔啱食，好唔好食。出品雖未至萬無一失，但整體而言，食材喺有質素嘅，烹調手勢亦不俗，只喺仲有啲細位可以執執佢，例如主菜嘅配菜呀，賣相呀。然而，服務就細心熨貼，見我哋喺「些牙」食，就不時幫忙換碟，讓人感覺稱心。
個人評分
味道：8/10
環境：8/10
服務：8/10
抵食：7/10
平均每人消費：HK$420
味道：8/10
環境：8/10
服務：8/10
抵食：7/10
平均每人消費：HK$420
餐廳資料：
Manhattan Grill & Bar
觀塘觀塘道414號一亞太中心(OPC)3樓303號舖
2345 8546
Manhattan Grill & Bar
觀塘觀塘道414號一亞太中心(OPC)3樓303號舖
2345 8546
沒有留言:
發佈留言