揀「飲茶」除咗位置上就到所以有人之外，主要貪佢無論冷盤，抑或點心，都頗有心思；又遇正匯豐做緊優惠，有個4人餐賣$689（或6人餐）已包括涼菜、潤湯、點心、小炒、飯麵、甜品，正所謂樣樣有啲，就啱啱好合晒我哋心意。（註：個套餐另收番每位茶芥及加一，優惠期至30/6，晚市只限上環店供應）。
店內空間算得上寬敞，皆因樓底夠高，一邊又喺落地大玻璃。裝潢走年輕、型格路線，簡約嘅配搭，開放式廚房，一一都令到整體更感闊落、舒服。
甫坐下，餐碗亦喺亮點之一，碗底瓷雕咗一條小魚，襯晌湖水藍嘅餐碗內，甚有如魚得水嘅感覺。
雖然我哋早已定好食嗰個匯豐四人餐，不過，照影低張點菜紙俾大家參考吓。種類選項包裝前菜冷盤、湯品、點心、小炒、主食、蔬菜、甜點……等等，茶芥$13位，另收加一服務費！不得不佩服店家，所有菜式名都喺得4個字，改名都唔喺一件易事嚟。
雞絲拉皮
亦即喺經常晌滬菜出現嘅雞絲粉皮，比一般特別嘅喺將粉皮做成卷條狀，當然，口感無乜兩樣，口感還算軟滑；雞絲有點粗嚡，但拌上青瓜絲、甘筍絲，沾上芝麻醬，味道都還可以及。
七彩茄子
唔知「七彩」意義何在，唔通喺好食到七彩？其實，喺下點醬油、灑點葱花及紅椒碎嘅涼拌茄子而已。茄子質感軟腍，味道穩打穩紮咁啦。
橙棍冬瓜
3道涼菜，應以依一碟冬瓜最有特色、最有驚喜。冬瓜裁成棍條狀，堆成層層疊，入口軟腍中卻有半分清爽，淡淡橙香味滲出，味道清新，叫人大開胃口。
沙薑蔥雞
依一道亦喺涼菜之一，所以，份量唔會好多，但大概都有1/4隻雞左右。雞件比預期中嫩滑，外皮頗為爽口，簡單以沙薑同蔥作佐料，惹味好食。
龍皇金湯
湯品以位上，「龍皇」以蝦仁為膽，「金」就喺金瓜，即喺南瓜湯，有別西湯，應該無加忌廉，但個湯打得都夠滑溜甜潤， 配以少少爽口嘅蝦仁，感覺不俗。
睇住流奶
唔使多介紹，喺店中招牌點心，雖然只喺普普通通嘅流沙包，但搞吓啲賣相，效果果然好唔同。撇除搞鬼嘅賣相，個流沙包確喺做得有水準，包身軟熟唔黏牙，流沙餡鹹香柔滑！
皺皮雲吞
即喺常食嘅炸雲吞，雲吞細粒，饀料亦少，幸而夠脆，沾一點酸醬中和一吓油膩，整體而言，只可以講喺一般一般。
一籠八戒
店中另一招牌點心，賣相可愛至極，叫佢做八戒，實在冤枉呀！查實佢喺蠔皇叉燒包，包身鬆軟，叉燒餡香濃，卻食落無乜肥肉。雖然同出面經常食到嘅叉燒包分別唔太大，但賣萌嘅造型自然令佢加分。
舉手雞花
睇名好難估佢喺乜，其實以雞鎚反起雞肉，再以蜜糖搭黑醋所做嘅菜式，依道菜我幾鍾意，黑醋純香得嚟，唔會太嗆喉，又有蜜糖嘅甜香，雞肉入口唔嚡；配搭兩大串燒菠蘿，又喺對啱小弟胃口。
麥皮塘蝦
我哋唔要辣蟻粉絲，另+$60轉麥皮塘蝦，嚟到唔多熱，感覺已打咗啲折扣。選取較大隻嘅大蝦，入口可謂大啖肉，肉質稱得上彈牙，帶微辣，麥皮就脆口，不過，喺欠牛油香啫。
上湯唐菜
簡單一道小唐菜拼鮮百合嘅素菜菜式，啲菜夠新鮮，簡單上湯浸都可以好好食，而啲鮮百合亦好鮮甜。
櫻花蝦飯
嚟到飯麵，其實3款都好吸引，最後揀個櫻花蝦飯，因為覺得佢無咁油，叫做相對健康啲。炒飯以小鐵盛載，卻喺載到滿一滿，飯面加有櫻花蝦及蟹籽，撈勻食確喺惹味，又有啲卜卜脆嘅口感，好味。
糖不甩丸
套餐仲包有一客中式甜點，細個食糖不甩喺無餡嘅，主要喺撈啲綠豆粉或芝麻嚟食，今回就加有麻蓉，外層嘅糯米糰軟綿黏糯，沾滿沙糖及白芝麻，香甜好味。
菜式既有創意，又好食，食得大家都好滿意，毫無疑問值得俾個讚佢。不過，服務真喺差到不得了。事緣我哋訂咗7:00pm並準時入座，當時客人唔多，大概只有兩乘幾滿，所以，我哋一落單，相隔唔夠5分鐘，佢哋就黐晒線咁將成個套餐嘅嘢（除咗個飯）送上枱，張4人枱又唔喺話好大，佢哋上完涼菜、潤湯、點心成一枱都喺嘢，我即時叫佢哋停，唔好再出菜，點知個男侍應夠膽死繼續捧埋啲小炒堆晌枱上玩層層疊，仲話廚房已經煮咗，唔可以退。我話咁你幫我拍多張枱得唔得先，佢無視我嘅問題，最後，有個女店長埋嚟了解完情況，二話不說即時收走晒所有菜式，只剩低涼菜，之後都逐樣逐樣菜式上枱，叫做合理啲。不過，被我哋發現點心都喺之前送嚟嗰籠，因為隻豬眼一認就被我哋認出，而碟麥皮塘蝦上枱時又唔熱，明顯就喺之前煮好嗰一碟拎番俾我哋。自問唔喺要你哋俾啲咩特別服務，但佢哋連基本都做唔到囉，仲話收加一服務費，管理層實在有需要進行服務大檢查。
個人評分
味道：8/10
環境：8/10
服務：2/10
抵食：7/10
平均每人消費：HK$220
味道：8/10
環境：8/10
服務：2/10
抵食：7/10
平均每人消費：HK$220
餐廳資料：
飲茶 Yum Cha
上環干諾道中88號南豐大廈2樓1-2號舖
3708 8081
上環干諾道中88號南豐大廈2樓1-2號舖
3708 8081
沒有留言:
發佈留言