B²：昔香未全

早前同老婆嚟大坑食晚飯，覺得依區靜咗好多，路經好幾間食肆客人都喺寥寥可數，可能落雨關係，亦可能喺閒日關係，不過，個別餐廳嘅入座率都唔錯。好似今晚朋友所約嘅B²，都有唔少客人幫襯，就睇睇朋友嘅選擇喺咪咁正先！

鋪位唔喺好大，大概估計20個位左右，裝修簡約，光猛整潔，以白牆配木系枱椅為主，其實枱椅排得幾貼，勝在樓底高，拉番大個空間感。

始終喺小店，所以，所賣嘅食物貴精不貴多，餐牌一面喺沙律、小食、主菜，菜式亦偏向英倫口味；另一面喺各式飲品，如啤酒、餐酒、汽水、果汁、咖啡、沙冰……等等。

此外，近門口頭頂上嘅黑板，亦會有個每月特選，不妨留意吓啱唔啱食！仲有，店員話不時會有啲餐牌以外嘅推介菜式，可能未必喺最好，但會喺新嘢嚟，喜歡試新嘢嘅朋友可以多口問問。

散叫外，仲有個是日晚餐，包餐湯或沙律、主菜、啡茶，賣$108 / $158，視乎所揀嘅主菜而定，可補錢轉其他飲品，順帶一提，全日都唔收加一。本來諗住抵食啲叫兩客晚餐，但店主話新推出咗個羊肉漢堡，老友都算羊痴，好有興趣一試。

田園沙律（晚餐）

沙律菜新鮮爽脆，但只落黑醋，除咗較單調之外，個黑醋味道頗酸，有少少嗆喉。

白汁蜆肉意粉 $108

個意粉混有唔少蜆肉，意粉亦煮得恰到好處，夠晒咬口，不過要挑剔喺個白汁做得太杰身，令個意粉好黏餬，使到整體口感打咗啲折扣。

羊肉漢堡 $128

望落個羊堡真喺好豐富，配埋沙律菜、粗薯條，而個漢堡夠晒大個非常有睇頭。雖然叫漢堡，但有別平時見到嘅「漢堡扒」，而改為羊肉絲（粗條），其實幾有心思嘅，比起打成漢堡扒慳好多工夫，但口感好咗，可惜食起嚟好鬆散；個薄荷乳酪醬汁真喺唔錯，而羊肉味唔算好重，所以唔太羶， 相信太部人都接受到，而老友可能覺得未夠癮，哈哈。

Iced Mocha（+$10）

唔知喺咪餐飲關係，就算凍飲都好似頗細杯。味道上，友人話偏重朱古力味，咖啡味稍薄。

Banana Cranberry Milkshake $48

或許當小弟挑剔，個奶昔唔滿感覺已經覺得做得有啲hea，雖然香蕉味濃，不過，小紅莓味道欠奉，但最失望喺唔凍，質感亦比較稀，個人經驗認為喺雪糕佔嘅份量少嘅效果。故整體食物、飲品做到色香味全，都仲喺差啲啲！

有歡樂時光唔出奇 ，但如果大家有留意之前貼出嚟塊黑板，就會見到佢哋竟然連食物都有8折優惠，可惜只限3:00-5:00pm，即喺下午茶時段；不過，3:00-8:00pm飲品同樣有8折，所以，杯奶昔實際唔使俾足$48！

個人評分
味道：6/10
環境：6/10
服務：7/10
抵食：7/10
平均每人消費：HK$143

餐廳資料：
B²
大坑書館街23號地下
2473 9205