Cafe Charm's：午後大搜茶

上次到訪Cafe Charm's深水埗店食晚飯時，跟店主交流吓做甜品嘅心得，仲聽佢講遲啲紅磡店會推出英式下午茶套餐，甜品嘢我就最啱架，所以，佢話到時多多支持。搵個周末，又拉咗表姨甥女嚟，因為下午茶、甜品依家嘢佢又鍾意。

由於嚟嘅目的都喺為咗個英式下午茶，所以，主餐牌就唔使多睇，直接落單點一份下午茶套餐。

可能真喺幾多客人嚟都喺想試個英式下午茶，所以，唔單止目測所見，有成八、九乘滿入座率，以星期六下午茶時段嚟講，喺個不錯嘅成績，而且，確喺有唔少客目標同樣喺對準個下午茶套餐。

套餐包括7樣食物，三甜四鹹，樣樣都喺打孖兩件，並配伯爵茶或英式紅茶，每份$218+10%。餐牌見印住星期一至五供應，查實依家星期六、日都有，否則今次就摸門釘啦！ 

究竟有無享用先後次序，餐廳就無建議喇，我覺得都喺隨心就可以，不過，先鹹後甜就比較大路啲。為方便寫作，我就由下而上咁寫，實際個品嚐次序就當然唔喺咁！

底層有黑松露什菌多士、煙三文魚牛角包及迷你和牛漢堡。

黑松露什菌多士
滿滿嘅什菌，黑松露醬落得重手，配上烘得脆脆嘅法包，口感、味道俱備，讓美味有個好開始。

煙三文魚牛角包

牛角包話雖迷你版，但夾有沙律菜及煙三文，一個人食晒一件都唔喺「濕碎」，然而，味道唔錯，煙三文夠油潤，牛角包夠酥香。

迷你和牛漢堡 

有幾迷你？拎上手比較就知，不過，都唔可一啖過KO佢，因為嚿和牛都唔細，而且，肉味幾香濃，質感鬆軟，之前睇過人家嘅食評都知和牛漢堡喺店方主打菜之一，做成迷你版都唔差。

中層喺小兔窩夫配紅豆忌廉、朱古力咖啡撻及蘋果酥。

小兔窩夫配紅豆忌廉

餐牌上原先列明喺雲呢拿奶凍，唔知喺賣晒定轉咗款，改咗件做成兔仔形嘅小窩夫。因為視為甜點，未有即時食，所以窩夫嘅口感腍咗，但喺，塗上柔滑嘅忌廉及清甜嘅紅豆，其實就幾好食。

朱古力咖啡撻

依件甜點小弟覺得最好食，撻殼脆口，中間嘅朱古力咖啡醬做得幼滑細緻，但就偏向朱古力味重啲，而撻面加粒脆腰果就多添一份脆口感。

蘋果酥

原本餐牌話喺蘋果酥，不過，食落我就覺得似香梨，因為味道比較清香。始終唔喺焗起熱辣辣即食，打咗少少折扣，但本身件酥餅幾酥香。

上層則只有英式提子鬆餅配草莓果醬。

英式提子鬆餅

分享到最後嘅英式鬆餅，單單只配草莓果醬，但啲果醬店員話自家製，食落唔會太甜，而且，朕士多啤梨味嚟得感覺天然；鬆餅質感烘得幾好，唔太乾身，不過，表姨甥女話乾咗啲，所以，口味嘅嘢真喺人人不同。

伯爵茶

熱茶喺以整壺上，供二人用，茶包採用Twinings品牌，至少沖到3壺，而到第4轉先明顯轉淡。伯爵茶香，配上鹹甜點皆宜，不過，如果可以俾客人揀其他飲品，如咖啡或花果茶，就算需要補錢，都叫做有多啲彈性，因為，確實有啲客鍾愛咖啡多過茶。

今次又完成咗一次美味大搜查，同表姨甥女彼此閒話家常，過咗個悠閒下午。生活成日匆匆趕趕，間唔時停低吓，嘆杯茶，食件餅，扮扮慢活，喺生活中嘅調劑。

個人評分

味道：8/10
環境：8/10
服務：8/10
抵食：7/10
平均每人消費：HK$120

餐廳資料：
Cafe Charm's
紅磡黃埔新天地3期百寶坊地下G27號舖
3480 6386