囍碟 Hei House：揭竿囍義

有「囍帖街」之稱嘅利東街，轉眼變得一番新景象，雖然有人會回憶過去，但亦有人喜歡新事物。蛻變嘅利東街小弟都仲喺第一次嚟，眼見有唔少食肆已經進駐，猶如揭竿起義，靜靜地起革命，大紅燈籠、藝術雕塑都為此地帶嚟一片新景象。

今晚到訪嘅「囍碟」，既喺餐廳，又喺酒吧，從名字，以及門面，睇得出裝修富東方色彩。

唔同日子，有唔同時間嘅「歡樂時光」，飲品買一送一，星期一、二、四五就5:00pm-8:00pm，其他日子就全日都喺，好好利用優惠。

地下喺酒吧區，門外亦架設咗高腳枱櫈，天氣好，晌度飲幾杯，感覺都唔錯。

樓上喺用餐區，地方出奇之大，摩登而充滿中國色情嘅裝修睇得出花咗唔少心思，如蒸籠、古窗、掛畫、瓷碟……等等，都別具心裁。

坐定定喺點菜嘅時候，意外地菜式嘅選擇唔多，一紙前後兩版睇晒，仲要一版喺午餐（10款選擇，$78-$108），另一版喺晚市散點菜式，款式都帶有濃厚嘅東南亞風味。

午市餐牌

晚市散點

飲品同樣一紙兩面，既為酒吧餐廳，主打酒類喺必然，其他非酒精類選擇亦唔少。本來都只打算食吓嘢，但店長推介佢哋嘅Fruity Mocktails，話好啱悶熱嘅天氣下去品嚐。

Mango Downfall $70

似一杯芒果味梳打水，芒果味唔會太濃，反而有一朕薄荷及青檸味，故飲落好清爽；內裡有點士多啤梨果肉，可以話邊飲邊食。

Lychee Maniac $70

賣相嬌紅火辣，但卻冰涼透心，友人話以為會好甜，卻恰到好處，甜得嚟唔會過膩，入口有朕朕果香，又有啲莓肉、荔枝肉咬吓，唔錯咁話。

牛油果蟹肉沙律 $88

先嚟一客沙律開開胃，但估唔到簡簡單單一碟牛口油果沙律卻有唔少驚喜。一炷炷蟹肉無欺場，難得仲夠鮮甜唔喺平價貨；牛油果又夠晒熟，口感柔滑如牛油；沙律菜、雪梨片配以炸粗麵，認真破格，但效果出奇地好，最大驚喜位相信喺竟然加埋蟹膏，綿滑甘鮮，先聲奪人。

松露芝士批 $48

雖然稱為芝士批，但形式似薄餅，而且，亦以小食為定位，唔喺好大個，就算兩個人點嚟食，都唔怕食唔晒。批底喺類似印度酥餅嘅一類，充滿油香，卻唔太脆膩，雖然黑松露味唔喺好強，但加入唔少菌粒，配以莫沙里拉芝士，細細件又幾好食！

斑蘭咖喱英國豬肉丸配黃薑飯 $88

斑蘭配咖喱有啲好搞鬼嘅感覺，不過，斑蘭味似乎唔太覺得，但個咖喱確喺幾香，味道富層次，而豬肉丸大概有6、7粒，打得好鬆化，可惜少少喺有啲偏鹹。至於個黄薑飯，撈上咖喱汁，健康好食，皆因薑黃素有抗氧化、抗癌之效。 

晌度嘅食物可以能俾人感覺選擇唔多，不過，今晚所試嘅幾款都算精，尤其個沙律；再者，招呼、環境的確令人稱心，與友小聚喺個唔錯嘅地方。

個人評分

味道：7/10
環境：8/10
服務：8/10
抵食：8/10
平均每人消費：HK$160

餐廳資料：
囍碟 Hei House
灣仔皇后大道東200號利東街G31及F31A號舖
3974 5868