因為目標明確，主餐牌就唔多睇，一安坐好就喺落單點選佢哋嘅下午茶套餐。整個套餐包咗4 款鹹點、6款甜點及自家製提子鬆餅，包兩杯基本飲品（加$15可升級特飲），定價$228+10%（兩位用），每日2:00pm-5:30pm供應。
講開高茶，啲高茶架真喺出到層出不窮，今次依個又跳出傳統，以透明「e」字形層架載起晒所有鹹甜點，「e」唔使多講就應該喺餐廳名字嘅代號啦。
熱情果烏龍茶（熱）+$15
表姨甥女甚愛果茶，所以，要咗熱情果烏龍茶，依度嘅果茶標明採用台灣全片茶葉配合多款水果，仲見佢加咗啲話梅，小弟都小試一杯仔，烏龍茶茶味無預期中咁重，但果香甚濃，而且，帶點酸酸甜甜，都幾好飲。
焦糖鮮奶咖啡 +$15
小弟食甜品時揀飲品，一向死硬派要焦糖鮮奶咖啡，店中咖啡採用西班牙品牌Cafés Novell嘅咖啡豆即磨沖調，咖啡嘅芳香度不用置疑，不過，今次杯鮮奶咖啡沖得手勢麻麻，拉花都其次，入口真喺唔圓滑，奶泡撞得唔均勻。
提子鬆餅配奶油忌廉及果醬
提子鬆餅喺分開上，所以，就先食依個。鬆餅做得幾好，入口唔太乾，有朕麵粉香，質感綿密，配奶油忌廉，就多一層潤滑感，配果醬呢，有一朕朕清新香甜味。
鮮果蛋沙律
蛋沙律我都有時整嚟做三文治，蛋黃搓爛撈奇妙醬，的確幾好味。不過，個人嚟講，雖然做得唔錯，又加上新鮮生果，但放晌高茶中，有少少普通咗啫。
三文魚脆多士
多士烘得非常脆口，而煙三文實在落得重手，一大嚿煙三文捲晌多士之上，仲加一小片檸檬作調和，三文入口亦夠油潤，小食嚟講又幾唔錯。
雞尾酒蝦沙律
幾醒胃嘅一道輕怡沙律，沙律部分其實只喺一啲蕃茄粒，拌入所謂雞尾酒汁，酸香醒胃，蝦肉彈牙帶有濃郁香草味。
野菌酥盒
酥盒做得不俗，酥香鬆脆富牛油香，而酥盒嘅野菌粒填得滿滿，菌粒更加咗少少忌廉汁，菇香好味。
果仁金寶咖啡蛋糕
一輪鹹點，跟住落嚟就喺甜點，先試嘅喺粒迷你咖啡蛋糕。咪鬼睇佢平平無奇，但味道真喺幾得，蛋糕嘅咖啡好香濃，蛋糕面沾上大細不一嘅果仁，多添一份香脆感。
仙人掌忌廉撻
仙人掌？感覺就喺神奇，奇在根本唔知佢本身喺咩味！件忌廉撻本身查實幾好食，個撻殼又薄又脆；仙人掌忌廉我估應該喺撻殼裡面淡黃色嗰啲，其實食落無乜味，反而面層嘅果蓉酸香清新。
歌劇院蛋糕
所有食物都有兩件，唯獨歌劇院蛋糕及綠茶布丁只有一客，前者還好啲夠大件易分嚐，後者就「嗱搞」少少。講真，件歌劇院蛋糕就肯定唔合格，有名無實，只喺外形有點似，實質無咩咖啡牛油忌廉，朱古力軟心醬只得面層（況且，仲要唔滑），蛋糕更欠杏仁香味，頂多只可以稱之為朱古力蛋糕。
綠茶布丁
以小蛋殼形布丁杯載住，夠可愛，質感幾好，夠挺身，唔會太削，而味道又唔錯，綠茶味淡雅幽香，帶些微回甘。
紫薯泡芙
紫薯成為甜品新寵，佢哋都唔唔執輸，紫薯配泡芙。始終個泡芙放到最尾先食，香脆度喺差咗少少，但啲紫薯打得軟滑香甜，甜而不膩。
君度忌廉紅莓朱古力脆餅
繼泡芙之後，另一樣討我歡心嘅甜點，賣相已經夠精緻小巧，而以朱古力脆餅，配以酸香嘅紅莓及加有君度橙酒嘅忌廉芝士嘅組合，酸甜度平衡恰好，味道當層次。
綜合嚟講，4款鹹點款式唔算好特別，但食味算叫做平穩；至於6款甜點，質素有高有低，整體當打個和。故此，可以再有改進空間，期望做得更具特色。
個人評分
味道：6/10
環境：8/10
服務：8/10
抵食：7/10
平均每人消費：HK$125
味道：6/10
環境：8/10
服務：8/10
抵食：7/10
平均每人消費：HK$125
餐廳資料：
Espuma
尖沙咀厚福街8號H8 2樓
2739 2080
Espuma
尖沙咀厚福街8號H8 2樓
2739 2080
沒有留言:
發佈留言