Moore Cake Shop：我的美孚下午茶餐～新店．新包

如果晌石硤尾大嘅朋友，一定聽過占美餅店，依間鋪至少有幾十年歷史，因為喺小弟由細食到大嘅餅店，亦喺當時晌石硤尾所賣嘅包款較新式嘅港式麵包鋪，最愛喺佢哋嘅排包，軟熟，富牛油香，當然搬離石硤尾十多年已經好耐無幫襯。最近，晌美孚偶遇佢……嘅姊妹店，但最初完全聯想唔到兩者關係，都喺晌門口個餅櫃見到「占美」個餅盒，再問問店員就明白個究竟。

支持吓占美，亦支持吓小店，所以，買咗兩個包當下午茶。小弟好有誠意架，返到去專登焗番熱先慢慢嘆。

蘋果酥包 $8.5

可以講喺幾樣嘢嘅混合體，包括：蘋果批餡、港式麵包、酥條，麵包好軟熟，裡面有好多蘋果、提子乾做餡，蘋果煮得夠軟綿，又有玉桂香，至於包面加咗啲酥條，外觀唔太單調之餘，有少少酥脆感，整體真喺幾好食。

薑汁蕃薯包 $8.5

外間有唔少店推出原條蕃薯嘅蕃薯包，然而，依一款就完全唔同，蕃薯部份可以話做成蓉作為包餡，最突出喺嗰朕薑汁味，好有薑汁蕃薯糖水嘅感覺，其實，味道喺唔錯，不過，蕃薯餡被人感覺喺少得可憐。

有段時間兩公婆星期六晏晝都比較無細藝，所以，趁有閒情逸緻就落去嘆個下午茶，所以，都寫咗好幾篇「我的美孚下午茶餐」系列。不過，食耐咗又好似無乜店有新嘢好寫，加上老婆星期六多咗啲活動要去，故此，依個系列都停咗好耐，啱啱遇着依間新店，俾個機會小弟寫番一篇。

個人評分
味道：7/10
環境：7/10
服務：7/10
抵食：7/10
平均每人消費：HK$8.5

餐廳資料：
Moore Cake Shop
美孚新邨第六期地下N42號鋪