協奏坊西餐廳 Sonata Western Restaurant：味遊四坊

早於7月，老婆為祝賀朋友個仔完成文憑試，請佢嚟協奏坊食番次自助餐，請得人無理由唔請埋我架，掹住佢衫尾嘆番次自助晚餐，以三百鬆啲個價位，有海鮮，有生蠔，有魚生，有伯伯加奴雪糕，款式唔算好多好多，但有一定質素，覺得真喺幾抵食，所以，之後再約朋友嚟食過，一同味遊四方。

餐廳位處大角咀九龍珀麗酒店2/F，可能你會覺得位置有少少吊腳，不過識行由奧運站過嚟都只不過10分鐘左右。餐廳佔2/F全層，一室光猛潔白，裝修摩登，天花嘅葉形燈飾幾得意；雖然是晚喺閒日，都有八、九成滿，不過，可能樓底都夠高，枱椅都排得唔算好密，所以，整個場都唔覺好嘈炒，感覺唔錯，慢慢嘆食足3粒鐘。

題外話，近入口位右邊有全場唯一一張圓枱，可坐8個人，仲設計成半開放式，雖然講唔上有咩私隱度，但多少有自成一角嘅感覺，修飾又再別緻啲，大吊燈令環境更高雅，更方便一家人或一班朋友共聚暢談，夠人多不妨要求預留依張枱。

離開餐廳時補影

協奏坊作為酒店嘅西餐廳，主要都喺供應不同時段嘅自助餐，相對好多尖沙咀、銅鑼灣四五星酒店，佢各項自助餐都定價非常吸引，但抵唔抵都仲要講質素，不過，見得小弟翻兜就知唔差得去邊。雖話佢個自助餐提供多國美食，但而最近依次去就做緊「瀛．朝．鮮味海鮮自助晚餐」主題，即喺有多少少日韓式美食，喺時候跟大家分享美食。

自助沙律、冷盆小碟

小弟慣性先食啲沙律開開胃，再搏剎。沙律吧枱就晌近門口位置，除3款已預製好嘅沙律之外（火腿青瓜沙律、華都夫沙律、三色椒沙律），仲有幾盆沙律菜及多款配料如車厘茄、煙肉碎……，並配以5款醬汁（千島汁、凱撒沙律汁、法汁、芝麻醬、油醋汁）。我就喜歡樣樣有啲，再加少少油醋汁，而沙律後方一個金字塔形層架，放有多款冷盆小碟，揀咗其中兩款：泡菜凍豆腐、芝麻醬茄子，擺靚少少個沙律頭盆，令人食都食得開心啲，況且，啲沙律菜冰涼爽脆，預製嘅沙律調味又做得唔錯，冷盆小碟嘅凍豆腐既滑又帶點辛辣，茄子沾滿芝麻醬，濃鮮好食。

海鮮

凍海鮮就晌入門口位，7盆冰鎮海鮮不時補貨，幾時出去都有足夠供應，種類有甜蝦、翡翠螺、長蟹腳、魷魚、青口、帶子及3款凍蟹（北海道活毛蟹、加拿大石蟹、英國麵包蟹），一碟過要晒咁多款，成為一碟美味嘅海鮮拼盆，未食睇見都爽呀。論到海鮮質素，確喺唔差，個人較欣賞喺甜蝦、翡翠螺、加拿大石蟹，鮮甜味突出。

即開生蠔

除咗冰凍海鮮，唔少得生蠔，由於生蠔由專人即洗即開，故放咗晌刺身、壽司吧那邊，排吓隊在所難免，難得秩序良好。見一大盆生蠔，有唔同大細及外型，多口問問師傅嚟自何方，回答有紐西蘭、澳洲、蘇格蘭貨色。由於即開，感覺總喺新鮮啲，生蠔外觀厚肉，滴啲檸汁、雞尾辣汁，入口鹹鮮爽滑，滿口海水鮮味，就算唔喺為要翻本，都值得多食一碟。

餐湯、麵包、凍肉腸

食咗咁多凍嘢，都喺時候搵啲熱嘢暖暖個胃，夠晒熱嘅就梗喺飲碗熱湯。好可惜，依度無燉湯飲，但都有一中一西兩款湯品，朋友揀咗芥菜鹹蛋湯，講話湯料十足，鹹香有住家風味；小弟就揀碗西湯，粟米湯？唔喺家常嗰隻，喺以粟米打爛加「麵撈」做出嚟嘅粟米忌廉湯，粟米味清甜濃郁，柔滑度OK，小弟再加多少少牛奶撞落去（如果有忌廉就仲正），令佢稀身啲，再滑啲。凈飲湯有啲寡，配個粗麥歐陸小包（不過有啲硬），加片煙三文、雞肉凍切腸，食得悠閒輕鬆。加多一小碗日本蒸蛋配帶子，變為西日組合，估唔到啲蒸蛋幾滑，帶子醬油煮過，挺濃香。

熱盤

熱盤分佈幾個位置，由於地方所限，陳列出嘅款式比一般大酒店為少，但不時見佢有轉款，算得上貴精不貴多，一邊長枱款式包括：鹵水雞腳、鹹酸菜豬肚、照燒汁比目魚柳、香草忌廉汁比目魚柳、日本蒸蛋配帶子、冬蔭公海鮮、照燒牛舌、泰式豬頸肉、烤羊腿、煙鴨胸炒蜜糖豆、蒜蓉炒小棠菜……等等，而另一邊長枱款式包括：鰻魚炒飯、意大利千層闊麵、德國鹹豬手、韓式炸雞、越南春卷、泡菜煎蠔餅。記得之前嗰次仲有牛油焗田螺、鹵水鴨脾、紅酒燴牛尾、意大利雲吞、日式天婦羅……等等。聽侍應講，佢哋仲有其他款式如日式海鮮烏冬、吉列炸蠔、海鮮芝士年糕……等等，每晚輪流供應。逐樣講有點累贅，但整體做得水準中上，尤以香草忌廉汁比目魚柳、照燒牛舌、烤羊腿、鰻魚炒飯依幾樣最得小弟歡心。此外，食物樣樣都細細碟製作，務求食物清得快，唔夠再出，保持新鮮度。

即切烤肉、粉麵

依兩類食物晌餐廳另一面（入門口右邊），粉麵唔算好有睇頭，所以，都唔多介紹，然而，個即切烤肉睇樣幾得咁，雖然個名牌寫住「日本照燒和牛」，但師傅話轉咗為「澳洲和牛」，不過，質素一啲唔差，和牛燒得外層焦脆，內裡仍然粉嫩軟腍，肉味濃郁，入口無渣，又喺翻兜之選。

刺身、壽司

食到依度都近尾聲，因為啱啱病咗幾日，未喺十足狀態，所以都唔敢食得太盡，反而想留肚食甜品，故此，刺身、壽司就收晒手，不過，都想略略介紹吓，等大家考慮嚟食嘅時候都多個參考。刺身分別有三文魚、八爪魚、希靈魚及劍魚腩，而壽司則有甜蝦、腐皮、蟹棒、三文魚及墨魚，此外，蟹籽軍艦，幾款壽司卷或反卷，相信應該滿足到大部食客。

甜品

仲記得第一次嚟見到甜品得咁少款式，而啲款式又咁大路之時，確喺有少少失望，不過，眼見未必一定喺事實，試過先知有幾真。除個蘋果金寶及雜果涼粉外，全部甜品都做得細細件、細細杯（篩走一啲個裝蛋糕），小巧精緻，款式計有藍莓芝士餅、柚子芒果蛋糕、意大利芝士餅、日式麻糬、鮮果拿破崙、朱古力泡芙條、木槺布甸、燕窩人參桂花糕、芒果布甸、法式焦糖燉蛋及伯伯加奴雪糕（雲呢拿雪糕、朱古力雪糕及韓式柚子雪葩），一共十多款。

最後精揀咗6款件裝甜品，都喺心水之選，上次試過佢嘅鮮果拿破崙覺得有質素，所以今次兩款（雜莓及蜜梨）都要晒，酥餅底做得好鬆脆，富牛油香，雜莓酸香，蜜梨清甜，各具特色；柚子芒果蛋糕嘅芒果慕絲打得軟滑，而中間薄薄一層柚子果醬好清新；意大利芝士餅無論下層咖啡酒餅底，抑或上層馬卡風芝士漿，都合格有餘；朱古力泡芙條咬落鬆化，最有心思喺中間吉士以雲呢拿條做，點點雲呢拿籽就喺最好證明，真喺做得唔馬虎；晶瑩嘅燕窩人參桂花糕，加燕窩已升高幾個檔次，食落一朕朕人參甘味，創意十足好特別，當然唔喜歡參味就咪試啦，盞嘥嘢！

伯伯加奴雪糕3款味都試晒，加少少生果，再加啲杏仁片、朱古力碎碎，實在冰涼透心，滋味滿fun。柚子雪葩最特別，唔太酸，有種柚子嘅甜蜜，雪葩內兼有粒粒柚子肉，正！怪不得朋友要再次添食。

自助啡茶

紅茶、熱水、檸檬片、牛奶，想沖乜就自行搞掂，小弟就愛甜品配咖啡，自助咖啡機只提供一般即磨咖啡，味道一般般啫。

生果

甜品前端，放置一大碟生果盤，有新鮮菠蘿、西瓜、火龍果、蜜瓜及哈蜜瓜。隨意揀幾款作飯後果，一邊繼續跟朋友聊天講飲講食，一邊食點生果幫助清化，喺不錯嘅結尾。還好嘅喺餐廳唔會趕你走，大可以慢慢食！

環境、食物都好稱心，而服務又幾到位，招呼、收碟、食物補充……等等都做到足，店員都禮貌周周。逢星期一至四成人每位都只喺收$308 +10%（五、六、日及公眾假期收$338），OpenRice仲有8折優惠券，折咗真喺唔使三舊水一位。雖則唔及啲高級酒店多嘢食到琳瑯滿目、目不暇給咁，但俾你食盡又食得幾多吖，以前後兩次晌協奏坊食到嘅質素，跟時下閒閒哋五、六 百蚊一餐自助晚餐相比，確喺相對親民、抵食。

個人評分
味道：8/10
環境：8/10
服務：8/10
抵食：9/10
平均每人消費：HK$280

餐廳資料：
協奏坊西餐廳 Sonata Western Restaurant
大角咀大角咀道86號九龍珀麗酒店2樓
3919 8228