因為經常都會經過依頭，所以，餐廳位置非常清楚，就晌中區警署對面。雖屬樓上鋪，但正正晌Paisano’s Pizzeria上面，好易搵。餐廳佔二樓全層，一出𨋢門，花款百出嘅小方格地板磚特別搶眼，而一室以泥紅色為主調，以柔和具情調（接迎昏暗）嘅燈光襯托，加上別緻獨特富印度色彩嘅吊燈，都帶嚟唔少印度色彩。梳化放置唔少咕𠱸，比一般椅子好坐好挨，是晚，客人都非常多，所以，非常熱鬧。
餐前小食
喺晚市免費送，一人一份，仲要晚晚不同，我哋得到嘅配搭喺蕃茄湯襯薯蓉烤餅，前者微暖，蕃茄酸香中帶有微辣，幾令人開胃；後者一小件烤餅，加上薯蓉、蔬菜碎及醬汁，一口一件，輕易幹掉， 但味道唔會有太大驚喜。
點解特別點題「檸檬融入印度菜」，因為朋友近日從食友網誌發現Jashan新推出專為依個夏日而設，特別加入以檸檬為主題嘅新菜式，趁限期前一試檸檬x香料嘅印度味力。「檸檬」菜牌甚照顧周到，由素食前菜、非素食前菜、主菜、米飯、特飲都一應俱全，單點依個餐牌菜式都足夠湊成一份整全嘅晚餐。事後聽印藉經理講，話依個夏日菜式都幾受歡迎，餐廳決定延長，不過，就未知何時完結。
Lime and Coconut Chicken Kebab青檸椰子烤雞 $128
「檸檬」菜式有兩道菜以雞肉入饌，兩款都做得好食，先介紹依道烤雞，睇菜名就知雞件以青檸及椰子做醃料，所以烤雞嘅味道點酸香及椰香，不過，又唔會太濃，大抵廚師想保持個清新感；而烤雞技巧做得真有一手，外職燒得金黃焦香，而肉質保持到滑溜，富肉汁而唔會「乾爭爭」。就算唔蘸點附上嘅薄荷醬，都同樣好食！
Butter Smoked Chicken 牛油咖喱烤雞HK$128
第二道雞肉菜式喺牛油咖喱烤雞，抱歉只影咗菜式賣相而忘記影番啲雞件，跟上述一道菜一樣，雞肉真喺煮得軟滑，而整道個靈魂小弟就覺得喺個醬汁，橙紅色嘅牛油咖喱醬，香得嚟酸酸辣辣，溫和得平易近人，但又不失印度咖喱集多種香料嘅多元性，所以，之前蘸印度烤餅，抑或撈印度飯都咁好味。
Pickle Machhli 香檸泡菜燒鯖魚 HK$138
泡菜？依道燒鯖魚感覺上都幾破格，但試過之後相信喺一個美麗嘅誤會，大抵我哋受韓風影響厲害，一見「泡菜」就自我設定為韓國泡菜（Kimchi），之後再細心睇番個菜牌，喺Pickle嚟，即喺一啲醃菜，有點恍然大悟。鯖魚似乎喺似炸多過燒，故此，有啲似炸魚塊嘅樣子，首先，啲魚塊入口確喺滑身，外層嘅脆漿又幾香脆，又唔油膩，不過，相信以醃菜醃魚嘅份量稍多或時間過長，有過鹹嘅情況，檸檬香味又未見突出，要唧啲檸汁，沾一點薄荷醬平衡吓，建議店方將中文譯名改為「香檸醃菜炸鯖魚柳」可能切合少少。
Jashana Dal 香檸燴黑扁豆 HK$85
黑扁豆經長時間燴煮成半豆蓉，口感綿綿粉粉，所以，難以見到有完整嘅粒粒黑扁豆。因為加入唔少香料去煮，故此味道幾有層次，惹味香濃，好似上面個牛油咖喱醬咁，非常適合以印度烤餅或印度飯嚟一齊食。
Lemon Rice 印式檸檬炒飯 HK$118
以幼身、修長見稱嘅印度米，拌入檸檬汁、咖喱葉去炒嘅味道會喺點呢？飯粒炒得乾身唔油，質感軟綿，唔似絲苗米咁黏，又微微檸檬幽香。雖然有話拌咖喱汁或稍後會分享嘅菠菜蓉好好食，但一客約3-4碗飯嘅份量左右，定價其實有點偏貴。
此外，我哋夠齊腳，所以，亦有從主餐牌多點幾款菜式，可以比較一下店家傳統印菜嘅手勢如何？雖然主餐牌已分好前菜、沙律、燒烤、雞類、羊類、海鮮、蔬菜、麵包（印度薄餅）、米飯、甜品……等類別，但內裡所有菜式都喺印度名字嘅菜名，輔以英文描述，故此都要費一費思量睇睇菜式喺啲乜。
Aloo Tikki Chana Chaat $58
以為喺煎薯仔或薯角之類，其實喺印式薯餅，話喺薯餅，口感有啲似糕嘅質地，入口有種韌勁；而雞心豆作為伴菜放晌碟嘅一旁，粉腍嘅雞心豆都幾好食吖，整體而言喺一道好平實嘅印度小食。
Balchao $158
單睇菜式真喺無可能知佢喺乜，不過，一睇英文翻譯（Prawn with Cinnamon and Garlic）就知喺心水菜式。類似中式嘅炒蝦球，好就好在拆晒殼方便食，但小弟就覺得以原隻鮮蝦呈現應該會更有睇頭。蝦球嘅味道幾複雜，有點肉桂、蒜蓉香，又有陣蕃茄味，少少辣，幾惹味，但喺鹹咗啲，蝦肉未夠爽，喺兩個失分位。
Lahsooni Palak Paneer $88
唔使講，大家都唔明喺咩嚟，即喺菠菜燴茅屋芝士（Spinach with Cottage Cheese），雖然個賣相有啲樣衰，但確實又幾好食。菠菜煮成蓉，入口軟軟綿綿，菠菜好嫩滑，加上茅屋芝士，味道唔寡，放晌印度烤餅一齊食喺個人心水食法。
Bhindi Do Pyaza $88
喺一款北印度嘅夏日特色菜「炒秋葵」（Fried Okra with Onions），秋葵切粒跟蕃、茄洋蒽同炒，加入一啲香料，味道清新，秋葵黏滑爽脆，況且，秋葵有益健康，有助降膽固醇，多別無妨。
Bread Basket $88
食印度菜都幾難唔提印度烤餅，店方除有分麵粉做嘅Naan及全麥粉做嘅Roti之外，仲推出唔少味道，如蒜香、牛油、芝士、洋蔥……等等，心多嘅就不如叫個雜錦烤餅籃，內有4款指定味道，比散叫平少少。上述都提及過好多款菜式都好合適以烤餅伴食，所以，煙韌酥香嘅烤餅都唔使再多介紹。
因為印度食物大多都喺味道香濃，所以，搵啲清爽嘅飲品就最好不過，此外，都順道介紹晌印度餐廳一定見到嘅招牌飲品「芒果乳酪」（Mango Lassi）。
Virgin Mojito $78
上文都講過個「檸檬」菜牌連飲品都照顧到，一共有3款特飲，Virgin Mojito喺其中之一，杯中飄浮好多荷薄葉，睇見都有種透心涼嘅感覺。朋友話每啖都充滿荷薄飄香，配以青檸嘅香澀，可以繼續同陽光玩遊戲。
Ginger Lemon Cooler $78
金黃透明嘅「Cooler」，夠冰凍就自然令人涼透心，以薑汁糖漿、青檸汁及梳打所做，朋友形容個味道喺酸活帶微辣，清新怡人。
Sunday Morning $52
餐廳原有嘅飲品都有好多選擇，紅白餐酒、香檳、啤酒、烈酒、雞尾酒樣樣都有，不過依杯「星期日早晨」喺杯非酒精調酒，以橙汁、菠蘿汁、青檸及石榴糖漿所調製，味道不俗，喺糖漿稍多，有啲過甜。
Mango Lassi $35
芒果乳酪味道酸酸甜甜，最宜解辣，難怪間間印度餐廳都有。芒果汁跟原味乳酪混和，綿密濃稠，陣陣芒果清甜，幽幽乳酪酸爽，的確喺對好配搭，只賣$35實屬抵飲，若然芒果汁嘅比例再高啲，相信更好飲。
臨走晌等𨋢期間，不妨食粒薄荷糖清清口腔中嘅香料味！晌邊度拎？就晌𨋢旁櫃枱。
小弟天生都應該屬於「為食」，對於眼前美食真喺「零容忍」，今晚，跟朋友一起，又喺食得盡興嘅一晚。對於個「檸檬」菜牌，仲喺覺得檸檬成份可以加重啲，先更能突出「檸檬」依個主題！
個人評分
味道：7/10
環境：8/10
服務：8/10
抵食：6/10
平均每人消費：HK$350
味道：7/10
環境：8/10
服務：8/10
抵食：6/10
平均每人消費：HK$350
餐廳資料：
Jashan Indian Cuisine
中環蘇豪荷李活道23號金珀苑1樓
3105 5300
Jashan Indian Cuisine
中環蘇豪荷李活道23號金珀苑1樓
3105 5300
沒有留言:
發佈留言