甜入心 Heart's Dessert：甜入心扉

深水埗嘅甜入心唔經唔覺都開咗成年幾，雖然位處暗街，唔及松記、綠林晌大街位，但生意及評語都不俗，門外有唔少等位或等外賣嘅客人。之前已經嚟過，對其焦糖布甸椰皇子念念不忘，喺必食之選，今次同朋友再到訪，發覺多咗好多新嘢。

環境無乜點變，白色牆身掛有好多食物照，感覺就似乎窄咗，可能生意好，枱都放多三幾張。是晚嚟到，座無虛席，足證人氣依然。

未點甜品前，先介紹朋友試吓佢啲自家製嘅英式淡果茶，果茶就放晌門口，隨意自斟自飲，免費唔收錢；而傍邊仲有個小型朱古力噴泉，一小粒一小粒以竹籤拮好，又喺自助隨意，綽頭定喺心思？無論邊樣，都喺店方嘅小小心意。原來啲果茶目的唔單止讓大家稍稍解渴，更重要喺洗滌口中甜味，務求試每一道甜品都能認真細味。

有半張枱大細嘅巨型餐牌，羅列超個40款甜品及數款飲品，翻一轉你就會發現唔少甜品個名都幾得意，如「衣香鬢影」、「重口味」、「龍顏大怒」、「出浴椰皇子」……；而好多人氣嘅「入心」推介依然晌度，例如：「焦糖布甸椰皇子」、「公主出巡」、「風花雪」……；不過，有啲之前食過嘅甜品就唔見咗，例如：「招牌楊枝金露」、「黑馬王子」、「杏仁布甸」、「香檳果凍」等等。

焦糖布甸椰皇子 $36

採用中型泰國椰青，以椰青水做成椰青啫喱，再加上一客焦糖布甸，淋上椰奶，味道豐富。椰青啫喱清爽，味道突出，而焦糖布甸香滑富蛋香，帶微微焦糖味，混和椰奶同食，滋味倍增。不愧自家原創嘅招牌甜品，再食都喺咁好味。最後，咪唔記得刮出椰皇肉嚟食！

龍顏大怒 $28

名字有趣嘅龍顏大怒，喺一道以將傳統西米露為本而重新演繹嘅特色甜品。將龍眼、西米、Q珠、雲呢拿雪糕組合而成，雖然，相信龍眼肉都應該會喺罐頭貨，不過，混入雲呢拿雪糕，味道比平常嘅西米露更加甜美，西米加Q珠，口感更過癮！

黑松露雪山 $55

記得以前甜入心無做吐司甜品，隨著台式吐司大收旺場，佢哋都加入埋落餐牌，不過，作為新品又豈可隨波逐流咁平凡，吐司做成小山，襯埋少少士多啤梨做點綴，賣相既立體又有新鮮感。脆脆嘅吐司條淋上吉士及焦糖醬，甜蜜味美，吐司山下嘅黑松露雪糕，味道好有驚喜，因為黑松露味非常突出，香滑濃郁，配唔配吐司都一樣滋味，值得一試。

雖然甜入心位置有點輸蝕，但見佢咁旺場就知佢有一定嘅實力，況且，招牌出品依然保持水準，而新品又創意味道兼備，所以，又點唔令人食得甜入心扉！

個人評分
味道：8/10
環境：7/10
服務：8/10
抵食：8/10
平均每人消費：HK$30

餐廳資料：
甜入心 Heart's Dessert
深水埗福榮街57號文昌閣地下B
2668 0748