Hey YO!!：好友狂嚐曲（二十）

雖然從未幫襯過「喜‧乳酪」（Hey YO!!），但都知知哋佢喺伯伯加奴（Pappagallo）嘅全新品牌，喺間DIY自助乳酪及蛋糕專門店。不過，若非食友送贈一盒Hey Yo!!嘅曲奇，真喺唔知佢哋都有賣曲奇添，多謝食友厚愛，讓小弟見識一下佢哋乳酪及蛋糕以外嘅產品。不過，上過官網睇過，就未見有曲奇資料嘅發佈。

食友所送喺一盒淨重200g嘅「雙重朱古力曲奇」，橙黑色包裝盒，簡潔型格。而內裡再加裝一層鋁紙包裝，減低變壞嘅影響，不過，實際包曲奇食用期都唔長，一個月都無，啱啱收到手，8月尾就到期。

整盒曲奇共8塊，每塊都有成一般茶杯口咁大，有一隻手指嘅厚度。

雖然個樣做得巖巖巉巉唔多好睇，但朱古力曲奇內滿佈朱古力粒，入口既鬆脆，又濃香，不愧為「雙重朱古力」；又加添燕麥成份，鬆脆中又帶嚟點點咬口感，實在好食。不過，如果你唔太嗜甜，就可能未必啱你口味，因為有啲似美式曲奇，有少少偏甜啫。本來想晌公司請同事食，但因為好味，結果都喺拎返屋企同老婆一齊分嚐。

依一輪先後分享咗愛烘焙麵包工房、美心西餅、曲奇童話及Hey YO!!嘅曲奇，而「好友狂嚐曲」不經不覺亦都寫咗20篇，寫完依篇又要抖抖，再續又可能要幾個月後，等儲多幾篇先再一次過同大家分享曲奇美食。各位老友嘅曲奇美意，實在令小弟不勝感激。

個人評分
味道：9/10
環境：- /10
服務：- /10
抵食：- /10
平均每人消費：HK$0（禮物）

餐廳資料：
Hey YO!!
旺角亞皆老街8號朗豪坊地庫2層1號舖
3580 2250