燒一流：縮一燒

「燒一流」依間茶記都喺一次好偶然咁「過經」，先知嗰度瑟縮咗一間茶餐廳。原意喺搵入面間稻香，先知道商場鋪外喺集團旗下嘅泰昌餅家，入去就喺同屬稻香嘅燒一流，再入啲先至喺稻香。就算晌商場口門，都只喺印住「茶餐廳，由此路進」，連名都無個，真喺好鬼神秘。

格局唔多講，一般茶記嘅「示範單位」，細圓枱、卡位，睇相都已經交待晒一切。不過，重點喺夠晒乾淨企理。鋪尾一組大窗，雖然舊樓景，無咩好景觀，但勝在有陽光下夠光猛，人都醒神啲。

枱上紅黃綠3個餐牌，包攬晒成間茶記嘅選擇，有乜餐物餐、湯粉麵飯、三文治、公仔麵、冷熱飲品……等等。

常餐 $32

11:00後開始有供應，包牛油多士、腸仔、粟米粒火腿奄列，再配喇沙豬扒公仔麵或蕃茄薯仔排骨通粉，加一杯餐飲。

多士、腸仔、奄列水準平平實實，而奄列嘅蛋皮好薄，但餡料（粟米粒、火腿）無迤做，都收貨啦。

粉麵我哋就揀咗蕃茄薯仔排骨通粉，個通粉好大兜吓，不過，排骨就只得兩大舊，加幾粒薯仔，幸而個蕃茄湯算不俗，起碼唔會入口「淡茂茂」，啲通粉又無話「腍榭榭」。

凍咖啡，有咖啡味，卻無咖啡香，加冰飲到尾段有啲淡，飲咖啡都喺熱嘅好！

掛爐燒鴨飯 $32

一碟明爐燒味飯唔算貴，由$28-$33，又可改選米粉、米線、瀨粉，以及其他選項，不過星期六、日、假期要多加$2。如果想飲杯嘢可以揀燒味套餐，但唔知點解，只可揀切雞、油雞、叉燒？

老婆最後揀咗掛爐燒鴨，改要瀨粉，一大碗清湯瀨粉，加埋一碟燒鴨，兩者嘅份量都唔少，實夠飽肚。瀨粉無咩好評，都喺穩打穩紮，湯頭亦有啲肉香，而燒鴨又意外幾好喎，燒鴨有少少羶香，帶點鴨油，皮下脂肪又少，肉質又幾軟腍。不過，最唔鍾意配紹菜，烚到腍鬼晒。

服務OK嘅，至少啲阿姐唔會惡形死相，又快手快腳，無叉用，即俾；算小弟大膽少少俾個笑佢，因為啲嘢食雖未至好好味，但又確喺唔差，尤其個燒鴨，況且，個常餐都只喺賣$32，包嘢食，包嘢飲，三十蚊鬆啲搞掂一餐真喺晌依個時勢唔喺間間茶記都得。

個人評分
味道：6/10
環境：6/10
服務：7/10
抵食：8/10
平均每人消費：HK$33

餐廳資料：
燒一流
葵涌打磚坪街1-25號寶星廣場1樓
2401 2239