Tectonic Pizza：心血來潮食板塊

Tectonic，查yahoo字典，解作「地殼構造上的」（地理名詞），故店子嘅中文名就改作「板塊薄餅」，寓意薄餅猶如地球嘅板塊，確係幾有心思。

24吋巨型薄餅第一次試係晌中環嘅Paisano's，純粹貪新鮮，自此，亦無特別搵啲巨型薄餅去食。見到「板塊薄餅」再做團購，第一佢位處尖沙咀亞士厘道，尖沙咀既喺小弟經常出沒嘅地方，而亞士厘道更喺就近老婆做嘢附近，堂食或外賣皆可，買定絕對用得著！

櫥窗放有巨型薄餅，不過款式唔多齊！

依次團購內容喺「$25購買1片24吋Tectonic Pizza + 1款飲品（原價$52）」，可揀意大利辣味香腸 / 夏威夷 / 素菜（田園精選）薄餅。依三款薄餅散賣價分別為$29、$34、$42，當然揀後兩者最抵，不過夏威夷都喺火腿、菠蘿，唔啱心水，所以我哋要咗意大利辣味香腸同田園精選件裝薄餅，加一罐可口可樂Zero同雀巢檸茶。

仲有其他2-8人套餐

落單後翻熱需時，加上幾多團購客，我哋坐晌廚房側邊位，睇住班阿姐密密做，薄餅一個接一個入爐出爐。如果咁啱好，出爐個薄餅喺你揀嘅口味，就可一嚐新鮮熱辣辣出爐薄餅，不過，翻熱後嘅薄餅效果都唔差！

好多團購客，好彩有成4個爐咁多！

客人都等待新鮮出爐嘅一刻！

意大利辣味香腸

呎吋就絕對夠晒大塊，不過餡料唔算多，巴馬臣芝士算落得足，不過辣肉腸就覺得偏少，而且略鹹；批底喺薄批，但唔喺脆身成塊餅乾嗰隻，唯蕃茄醬汁幾濃郁，味道尚算不俗。

田園精選

相比起件意大利辣味香腸，望落田園精選就餡多喇，批面鋪滿青椒、紅椒、粟米粒、黑橄欖、洋蔥、磨菇，配以濃香芝士，反而個田園精選好食啲。

一啖熱辣辣薄餅，一口凍冰冰可樂，超爽。辣椒仔、辣椒碎、芝士粉要用自便，服務又幾好，團購價自不然超值，正價亦都合理，尖沙咀嘅鋪租唔平嘛！

個人評分

味道：7/10
環境：6/10
服務：8/10
抵食：7/10
平均每人消費：HK$25（團購優惠）

餐廳資料：
Tectonic Pizza
尖沙咀亞士厘道24-38號
2314 3838