古法烘焙 GU FAH BAKERY：送禮新選擇

老婆變相升咗職，話想請同事食啲嘢，西餅？佢話好似老套咗啲又無新意，記起早前晌古法烘焙食雞蛋仔時，試過佢啲杏仁批同鳳梨酥，印象唔錯，又幾好食，而且，仲有多款產品，如：唔同味道嘅雞蛋卷、鳳凰卷、曲奇餅、老婆餅、老公餅、合核酥、杏仁餅、芝麻酥、牛油楓葉批……等等，所以今次就改一改，買幾盒「特產」返去請同事食，賀一賀！

杏仁批上次試食食過，有水準，所以喺買入首選，老公餅喺店家推介，故此又買一盒，而牛油楓葉批覺得應該幾香幾特別，所以亦買咗一盒。老闆Eric竟然認得我，又見我幫襯買咗幾盒嘢，所以醒咗小弟一小袋雜綿曲奇，叫我試吓味俾吓意見，Eric咁大方真喺唔話得，晌度再次多謝番佢先！

 杏仁批（禮盒裝）$45

雖然上次只喺晌門口試食，食咗半條，已食出杏仁批做得超鬆脆，今次可以食番成條，當然更滋味啦。由於上次食評都寫過依款批，所以今回就唔多提。

 老公餅（禮盒裝）$60

老公餅本身幾圓幾大件，但就無盒面張相咁高咁挺身。老公餅以香蔥牛肉為主餡，其實外型幾討好，外皮又鬆化，不過香蔥牛肉餡未有期望中咁突出，牛肉搓研得太溶，少咗份牛肉本身份纖維質感，香蔥味再強啲就更有個性。

 牛油楓葉批（禮盒裝）$50

牛油楓葉批做成楓葉形，主打就喺香脆甘金，可惜，無機會試。因為老婆拎晒返公司，一塊都無剩番俾我，既然無得試，佢個味道對我嚟講仍是個謎！

 雜綿曲奇

曲奇嘅售價為1/4lb（$30）、1/2lb（$55）、3/4lb（$80）、1lb（$98），實際有幾多款真喺無數過，目測門口個餅櫃大概有10-12款左右，有白有啡有黑，據講黑色嗰啲仲加咗竹炭，又幾特別。老闆突然間送嘅依袋為1/4lb，都有成十多塊曲奇，內裡包咗6種口味，全部人手做，所以同款嘅外型唔會倒模咁一模一樣，基本上富牛油香，口感鬆脆，部份有果仁粒嘅就更好食。

由於買嚟請同事食，好難計是次每人消費幾多，總之買咗兩盒杏仁批，一盒老公餅，一盒牛油楓葉批，而曲奇喺送嘅，啱啱好兩舊水。老婆公司我估十六、七個同事啩，所以粗粗哋就當是次平均消費為$12啦！

個人評分
味道：7/10
環境：7/10
服務：8/10
抵食：6/10
平均每人消費：HK$12

餐廳資料：
古法烘焙 GU FAH BAKERY
荃灣楊屋道1號荃新天地G31號舖
2941 0131