好耐無見啲表姪女，打算約埋食番餐，本來預三幾個，搞搞吓，老婆、細妹、表姪仔、表姪女……成9個人咁多，作為「長輩」嘅我梗喺我請啦，一於有大食大，唔好客氣。
都知道依間Pokka都幾鬼旺，所以托佢哋搵人早啲嚟攞位，可惜我哋人未夠一半，有枱都唔入得住，最後都要等30分鐘先有位坐。其實，都喺三張二人枱拍埋，免強坐我哋9個，佢啲櫈又重又「啞咋」，感覺頗為逼，唔喺太舒服。不過，志在請一班細姪食嘢，都無所謂！
煙三文魚田園沙律
都知道依間Pokka都幾鬼旺，所以托佢哋搵人早啲嚟攞位，可惜我哋人未夠一半，有枱都唔入得住，最後都要等30分鐘先有位坐。其實，都喺三張二人枱拍埋，免強坐我哋9個，佢啲櫈又重又「啞咋」，感覺頗為逼，唔喺太舒服。不過，志在請一班細姪食嘢，都無所謂！
除咗啲做冬呀、團年飯呀、食盆菜呀……都好少同佢哋食飯，唔知佢哋啲口味，所以最穩陣就喺隨佢哋點，各有各嗌，再一齊分享。但結果有少少失控，叫多咗嘢食之餘，又有啲重複，為免浪費，我依個表舅父就執手尾，包底清晒所有嘢，所以食得小弟好飽好飽呀，無機會試甜品咯！
煙三文魚田園沙律
叫主菜有啲優惠組合，就喺另加$42，就可以變為套餐，多份煙三文魚田園沙律及一杯熱飲。我哋其中兩份主菜改為套餐，要咗兩客煙三文魚田園沙律。主要喺羅馬生菜底，加啲車厘茄同煙三文魚粒，味道唔算話有咩特別，勝在沙律菜清新爽脆，煙三文魚粒油潤鮮甜。
焗忌廉薯仔 $56
除叫咗啲主菜，亦加插幾客小食：焗薯仔、燒排骨、火炙煙三文魚。個焗薯仔幾香，佢唔喺薯蓉，喺一粒粒薯仔，再加入忌廉烘焗。薯仔味道挺粉甜，加入大量忌廉汁，多添一份奶香，食落感覺賴充實。
香草燒排骨洋蔥圈 $65
有4條燒肋骨，伴碟喺炸洋蔥圈同薯角，搭啲沙律菜、車厘茄。單睇外貌，啲燒肋骨唔錯，燒得幾對辦，不過香還香，香草味欠奉喎，肉質亦未夠鬆化入味。洋蔥圈炸得甘香，只可惜得幾條，如果有酸忌廉俾我點就仲正，茄汁？普通咗啲啫。
絕味芝麻火炙煙三文魚 $58
兩大片煙三文魚，火炙之後感覺唔喺咁生，適合唔喺好食生嘢嘅人。配上自家調製嘅芝麻汁，味道幾特別，底下再墊咗啲沙律菜同牛蒡絲，令個前菜變得有趣唔單調。
紐西蘭上級牛柳（200g） $138
餐牌有一系列火山岩燒菜式，點咗一客紐西蘭上級牛柳，每客份量為200g，共兩件，每件都有近一隻成人掌心大少，上碟賣相唔錯，牛柳上嘅岩燒坑紋清晰可見，肉質嫩滑，肉汁又夠，配以燒汁同蘿蔔蓉酸汁，兩者跟牛柳都好夾。伴菜仲有烤菌、烤黃椒同蕃茄、炸薯角、少少沙律菜，令個菜式豐富啲。
焗海鮮牛油果飯 $98
主菜之一，近來老婆愛上牛油果，所以睇中依個焗飯，不過牛油果唔多，反而海鮮料相對足秤，魷魚、蝦仔、帶子粒鋪滿飯面，仲要加一大撮蟹籽做裝飾，令賣相更養眼。雖然焗得唔夠焦香，但飯粒分明，撈勻晒一口有飯有海鮮，又熱辣辣，好窩心！
香燒鮮蝦煎意大利飯 $104個人而言，依個喺小弟幾欣賞嘅主菜，意大利飯試過唔少，「煎」意大利飯就第一次，所以新鮮感已為個菜加咗少少分。試食之後，我估計個飯喺好似平時整意大利飯咁整，臨最尾加大火燒香個底，變成好似煎過，反轉再上碟，所以食落飯粒煙韌帶濃濃芝士香，但部份又帶焦香，好得意嘅口感。新鮮大蝦開邊香燒，本身蝦隻味鮮有彈性，疊在飯面令賣相更立體。
日式吉列豬扒咖喱飯 $98較傳統嘅日式西餐廳嘅主菜，同樣賣相都喺傳統。質素平均，珍珠米軟糯有米香，吉列豬扒粉漿唔算厚，外層頗鬆脆，咖喱微甜好啱啲細路。
滑蛋豬扒丼定食 $98
喺最細嘅表姪仔點嘅，估唔到人仔細細又差唔多食得晒，其實都幾大碗架，不過外觀好樣衰，跟一向講求賣相精緻嘅日菜大相徑庭。此外，滑蛋變咗一堆炒飯，當然表姪仔覺得好食就得啦，邊理個賣相吖！
除咗以上小食、前菜、主菜，仲有一個鐵板燒定食系列，我哋分別都點咗以下3款嚟試一試。而鐵板燒定食嘅優惠組合跟主菜唔同，加$25有咖啡或茶，加$22可多一份和風沙律，睇完感覺其實唔算得點優惠，所以個別人想飲嘢就加錢要餐飲，個和風沙律就無謂要。
紐西蘭上級西冷（200g） $138上面試咗個紐西蘭上級牛柳，鐵板燒就要個上級西冷，同樣喺200g份量，嚟到時未熟透，要自行再辣多陣，按自己口味睇吓整幾熟，叫做有得食有得玩吓「煮飯仔」低B班，覺得夠熟就要放晌啲伴菜面，否則就過熟。啲西冷肉味幾夠，不過啲牛柳嫩滑啲。配菜就較日式：金菇、冬菇、蓮藕片、椰菜、甘筍，反而醬汁有啲驚喜，所有扒類配以法國燒汁、自家製燒肉汁、青椒蘿蔔蓉酸汁，仲有一小兜芝麻同一小杯肉汁，前兩者較大路，但青椒蘿蔔蓉酸汁頗為特別，再者配肉，蘿蔔蓉加上酸汁味，清熱去油膩感，我都幾鍾意。話明定食，梗跟埋麵豉湯同日本珍珠飯，所以好夠飽。
燒上級豬排骨（300g） $108
豬肋骨約有7件，每件大概兩隻手指大細，份量為300g，跟上面個香草燒排骨差唔多，只喺以鐵板燒形式上枱，配菜都喺嗰啲和風雜菜，跟麵豉湯、珍珠飯。味道覺得上面個香草燒排骨燒得香啲，鐵板燒出嚟個效果無咁正！
麵豉雞扒（250g） $108
雞扒又如何？雞扒雖然話有250g，但其實得一塊，叫做厚身啲。經麵豉醃過嘅雞扒，味道稍鹹，所以只有點青椒蘿蔔蓉酸汁最合適，可以中和一吓。
朱古力香蕉船 $55
小弟食得好撐吓，所以甜品實在食唔落，但喺估唔到兩個表姪仔好想食，俾多個配額佢哋，叫唔喺問題，只緊要食得晒，結果佢哋又真喺食得晒隻朱古力香蕉船喎！其實睇賣相，叫忌廉船啱啲，因為長杯中放咗兩球朱古力雪糕，兩側再放香蕉開邊各半，上面就唧大量忌廉，味道相信唔會有咩特別。
百佳特色咖啡
叫主菜時加錢變套餐，餐飲自不然要咗杯百佳特色咖啡，好老實，雖然唔知杯咖啡嘅特色晌邊度，但以小弟味道計，杯咖啡香醇芳香，合格有餘，總令一頓晚餐有個美好作結！
 |
小弟杯百佳特色咖啡
|
 |
| 細妹飲嘅凍奶茶，睇樣又幾好喎！ |
味道：8/10
環境：8/10
服務：4/10
抵食：6/10
平均每人消費：HK$175
餐廳資料：
Pokka Cafe Grill Specialist
沙田沙田正街18號新城市廣場一期1樓115號舖
2681 0063
沒有留言:
發佈留言