Bingo & Cook：異「Cook」同工

因為某啲原因，我哋嘅死佬飯局無搞咗好耐，亦唔知幾時再搞番，所以，依家久唔久私下約啲個別死佬出嚟聚一聚。今晚嚟到銅鑼灣嘅「Bingo & Cook」食韓國嘢，皆因老友都睇韓劇，大家會話題更多，最近期嘅韓劇「優雅的家」喺小弟嘅心水推薦。

雖然餐廳位處食廈裡面，但入到嚟，又別有洞天，落地大玻璃窗、高樓底、開放式廚房，都營造出時尚感。一邊牆上仲不停播放K-Pop，所以，全場滿座，大部份都喺啲後生仔。

不過，溫馨一提，餐廳訂下1.5小時嘅用餐時間，所以，有心幫襯就要記得配合吓喇。店長、店員都喺韓國人，佢哋嘅英文幾好，所以，溝通唔難，大不了咪手指指囉。

有別傳統嘅韓國餐廳，無慣見嘅韓式前菜提供，但翻開主餐牌，選擇亦非常多，如特色菜、炒年糕、韓式炸雞、韓式火鍋、韓式煎餅、拉麵、炒粉絲、炒飯……等等。炸雞、煎餅、炒粉絲，我哋都有中式嘅做法，但轉咗韓式，別有一番滋味，可謂異曲同工之妙。

飲品選擇亦多呀，分酒精及非酒精，前者如韓式米酒、果酒、燒酒、生啤及樽裝啤酒……等等；後者就有特色碳酸水、奶昔、汽水、熱茶……等等。

西柚碳酸水、水蜜桃碳酸水 @$56

因為一心都諗住點客韓式炸雞，但又會點炒粉絲及煎餅，擔心奶昔會太飽肚，所以，碳酸水就最合襯，尤其搭炸雞。一口熱辣辣炸雞，一口「涼朕朕」碳酸水，爽呀，而且，我嘅西柚口味喺堅濃郁，飲到尾都無乜點淡過，友人嘅水蜜桃口味亦都清甜可口。

牛肉炒粉絲 $98

以往，會覺得嚟食炒粉絲，唔喺嘛！不過，自從睇過韓國綜藝「尹食堂2」，對韓國炒粉絲情有獨鍾，上次晌「炑八韓烤」都有食。呢客牛肉炒粉絲，裡面好多料，燈籠椒、本菇、洋葱、黑白芝麻……等等，啲牛肉好入味，又嫩口，粉絲煙煙韌韌且索滿汁，唔錯喔。

五花肉泡菜餅 $110

煎泡菜餅都幾鍾意食，餐牌中有幾款煎餅，難得朋友唔怕肥，就梗喺要試試五花肉泡菜餅啦。雖然個樣有啲似「薄撐」，但韓式煎餅較厚身，面頭鋪住一塊塊五花肉，並切成一格格，方便食用。底面都煎得乾爽，感覺不膩，泡菜配五花腩，掂喎，味道好夾，唔沾個醬油都已經好好食，點咗反而有啲鹹。

蜂蜜黃油炸雞 $118（半份）

以為半份唔會好多，一啲都唔喺，數一數，足足有成7大嚿，嚿嚿都炸得金黃唔油膩，仲糝滿芝士粉。一口咬落去，熱辣辣，外層極之香脆，雞肉則非常嫩滑，有微微蜂蜜香滲出嚟，堅好食。附有兩兜醬，一兜喺韓式醬油，可以當喺豉油咁用，另一兜黃色嘅有啲芥末味，又帶點檸檬嘅酸香，配炸雞好襯吓。

今晚所點嘅3款菜式，老友都好讚，尤其碟五花肉泡菜餅，佢話好少食，加上五花肉香而不膩。唔止啲嘢好食，環境又唔錯，啲韓國侍應亦好好招呼，兩個死佬食到撐肚皮，相信3個女生都夠食呀！

個人評分
味道：9/10
環境：8/10
服務：8/10
抵食：8/10
平均每人消費：HK$240

餐廳資料：
Bingo & Cook
銅鑼灣駱克道487-489號駱克駅2樓
2455 8766