南대門韓國料理 Namdaemoon One Korean Restaurant：一南子美味

韓風依然好熾熱，見住啲韓國菜館一間接一間開，而唔少出名嘅更大排長龍。我就好怕排隊搵食嘅，所以，趁時間早，晌有韓國街之稱嘅金巴利街搵食，最後揀咗街尾嘅「南대門」，一來太早唔喺間間有開門，二來座鎮門外位「阿捉斯」（大叔아저씨）猛咁講好味，推介依樣，推介嗰樣，又韓又中，誠意十足，就膽粗一試。

入到鋪內，地方細細，幾位「阿豬媽」負責晒一切，感覺好家庭式。我同老婆坐晌入門口左邊死角位，講真，地方確喺幾淺窄，起初得三幾個客都唔太覺，臨走時坐至近滿就真喺幾逼狹。

餐牌上有枝原子筆，夾住張紙仔，原來喺自行落單用。餐牌有圖有相，仲有齊中英韓日文對照，晌遊客區依啲真喺基本嘢嚟。事後上網睇睇「南大門」喺乜，原來首爾未成首都之前，喺都城四大門中位於南方嘅正門，好有象徵性及歷史性嘅地標，舊稱「崇禮門」，唔怪之得餐牌封面張相印住「崇禮門」啦。 

前菜

韓菜特色之一就喺餐前嘅前菜，我哋兩個人有6小碟，但見另一邊枱得一個客，竟然有4小碟，後嚟坐晌隔離枱一家三口又只放有6小碟，似乎數量都喺有少少隨意，志在有啲幫你開吓胃咁。6小碟有菜莖、泡菜、白菜仔、蝦乾仔、芽菜及茄子，碟碟都三幾嚿細細份，只有泡菜較辣，蝦乾仔帶微辣，其他都喺油油爽爽，帶點蒜味、麻油味。題外話，前菜喺無得添食。

韓國年糕湯 $80

韓式年糕食唔少，不過放湯做嘅年糕湯就較少食。其實個年糕湯都好簡單，淡淡奶白嘅牛骨湯浸住年糕及牛肉片，湯面放啲蛋絲做裝飾。咪睇個淡淡白白，都幾香，而年糕煙煙韌韌，兼且幾夠份量，好似撈極都有，不過啲牛肉片就一般般，有肉味，但似韌身咗少少。曾經聽朋友講，韓國人嘅匙羹喺食白飯及飲湯用，好少成碗湯咁飲，好數喺窮等人先會咁做，不過香港人一貫講效益，而啲湯又幾好味，食到尾就梗喺成碗湯嚟啦。

石鍋什錦飯 $80

熱辣辣，好豐富嘅石鍋什錦飯，跟埋一枝韓國甜辣醬送上。什錦飯有菠菜、菜莖、白蘿蔔、甘筍、翠玉瓜、紫菜、牛肉、芽菜、雞蛋，將所有材料撈勻，口感豐富，又因為多菜少肉，感覺好健康，由頭食到尾都保持熱度，而且，鍋底有少少脆口飯焦，正呀！

無叫嘢飲，因為啲玄米茶又幾OK，其實成餐飯都無咩服務可言，而且有個別「阿豬媽」感覺少少串，唔知喺咪怕雞同鴨講，所以唔啾唔啋，不過，就算喺午飯，都要收加一服務費嘅。

個人評分
味道：8/10
環境：7/10
服務：7/10
抵食：7/10
平均每人消費：HK$88

餐廳資料：
南대門韓國料理 Namdaemoon One Korean Restaurant
尖沙咀金巴利街1B恆港中心地下3號
2723 2028