小四季 Little Season：難能可「季」

東南亞菜當中，肯定喺越南菜同泰國菜食得最多，一來香港有唔少越南菜同泰國菜餐廳，二來佢哋本身都頗有特色，而且，味道亦易接受。今晚同朋友飯聚，揀來位處太子嘅「小四季」，除地點較中間，方便到大家，其次，就喺可以一次過食到越南同泰國菜。

餐廳唔算好大，但樓底高，啲枱又無話拍得好埋，空間感足，加上一室以木同藤為主，簡約得嚟有份清雅，感覺幾唔錯。而服務亦幾好，侍應除有禮貌之外，主動介紹菜式，添水、收拾勤快。

翻一翻餐牌，選擇多多，睇得出唔少喺好新派嘅越泰菜，此外，有一款「2-3人套餐」，原價標為$556，現在只賣$388，再睇睇菜單，有沙律或湯品、小食拼盤、炒菜、兩道主菜及兩杯飲品，都幾豐富，計落亦都好划算。

越式海鮮沙律凍盤

估唔到喺以玻璃樽造型登場，侍應話先將樽內食材（鮮蝦、魷魚、紫洋蔥、甘筍絲、車厘茄）搖勻再倒出嚟，真喺幾有卓頭。整體口感冰涼清爽，味道酸酸辣辣，而鮮蝦及魷魚好鮮甜，越食越醒胃嘅前菜。

迷你小食拼盤
餐牌已列明有炸泰式魚餅、泰式香茅雞翼、燒菠蘿同炸蝦片，魚餅入口彈牙，毫無油膩感，雞翼醃得入味，咬落香口，菠蘿燒過後，菠蘿味更濃郁，清甜多汁，而蝦片脆到咯咯聲。

馬拉盞炒芥蘭苗

炒菜可以揀西蘭花苗或芥蘭苗，選後者就無咩特別意思，都喺隨心。芥蘭苗炒得有爽脆嘅感覺，包住鹹香嘅馬拉盞香味，喺好惹味嘅一道炒菜。

咖喱蟹肉蟹籽瀑布飯

呢個喺店家嘅招牌菜之一，所以，目測所見，都有唔少客人有點。飯面鋪滿蟹肉同蟹籽，望上去已好吸引，當將個膠環抽起，啲咖喱汁就好似瀑布咁一瀉而下，喺極具打卡感。個咖喱唔太辣，帶陣陣椰香，拌飯當然一流，再將蟹肉同蟹籽跟飯撈勻食，自不然味道更豐富。

慢煮牛舌湯濛

湯粉麵可以揀牛骨湯或雞湯，食越南粉麵當然要揀牛骨湯啦，個湯頭濃而不濁，好清香，濛粉好滑流，而牛舌經過長時間慢煮，啲質感軟腍到不得了．加上厚切，甚具咬口。

椰汁冰、越南椰香泡沫咖啡

近排天氣熱，所以揀咗杯椰汁冰涼快吓，椰香味十足，既清甜，又可以幫手解吓辣；而老友就大讚佢杯咖啡，咖啡本身就已經幾醇香，再加入帶有椰香味嘅奶泡，產生巨大嘅化學反應，味道極具層次。

呢一截花園街有唔少餐廳，相信競爭都大，但眼見店內越夜越多人，亦有唔少外賣單，幾時都話，只要食物做得好，有實力就唔怕無生意。總括而言，個套餐抵食，招呼又好，環境舒服，食得自在。

個人評分
味道：9/10
環境：8/10
服務：8/10
抵食：9/10
平均每人消費：HK$214

餐廳資料：
小四季 Little Season
地址：太子花園街232-242號禮賢大廈地下I-J號舖
電話：9807 3051