Shift：「開心」大發現‧滋味大湧現

如果你睇見呢個標題，就想起「亞視」個資訊節目，就證明同我一樣有番咁上下年紀。最近，就晌灣仔開心大發現呢間日頭喺咖啡店，晚上搖身變為酒吧餐廳，點解開心？因為店家有好多以開心果為主題嘅菜式。

餐廳以白色為主調，無論門面，還是室內設計簡潔，但不失時尚感，又帶點文青風，座位編排寬敞，加上樓底高，所以，整體感覺舒服。

近門仲有一列酒吧區，睇番人哋啲食評，見晚上會加咗啲燈效及投影，變得另一番景象。

座位之下設有藤籃，喺貼心嘅安排，方便客人擺袋、擺背囊。餐具放晌有蓋膠盒內，衛生乾淨。

講番啲食物選項先，文初都講過有一系列開心果菜式，包括主菜類同甜點類，單喺睇睇感覺都非常吸引；此外，仲有多種傳統、西班牙小食，送酒一流，加上其他特色主菜，選擇真喺唔少。飲品方面，提供多款咖啡同熱茶。

作為一間酒吧餐廳，酒類飲品點少得，紅白餐酒、啤酒、西班牙果酒、有汽酒、烈酒……等等一應俱全，溫馨提示，由開鋪到7:00pm，都喺歡樂時光，自然飲得平啲。

Classic Buttermilk Dirty $48、Pistachio Buttermilk Dirty $58

Dirty系列有別我哋平常晌咖啡店所飲嘅骯髒咖啡，主要喺用上更低脂嘅白脫牛奶（buttermilk）嚟沖泡咖啡，自然飲得更健康。而小弟杯開心果口味喺越飲越有嗰份果仁嘅香氣，口感方面亦好柔滑，仲伴有少少牛油烘麵包粒，勁香牛油味。

泡菜蜜燒風琴豆腐 $58
呢度主打Tapas，所以，點可以錯過呢！先嚟一份豆腐？喺，豆腐，但經過創意可以變得不一樣，豆腐切成風琴形已令賣相吸引好多，面頭鋪滿韓式泡菜，因為加咁蜜糖，所以，食落唔會太過酸同辣，而與其叫豆腐，應該似豆卜多啲，炸到好脆口，幾有驚喜！

檸檬胡椒鹽脆茄子條 $48

賣相夠晒立體嘅脆炸茄子條，外層薄薄嘅粉漿香脆不油膩，食得出炸功了得，然而，茄子卻仍保持多汁，口感軟綿綿。就咁淨食都有味，如果想濃味啲，除咗有啲蔥花、蒜粒、辣椒粒，仲可以沾上少少檸檬胡椒鹽，食味更富層次。

泰式脆炸五花腩 $78

香口嘢一向有市場，尤其送啤酒，不過，就算唔飲酒，人人都鍾意食。雖然喺五花腩，但出嚟嘅效果無想像中咁膩，而且，外層酥脆，細嚼軟嫩，沾上辣勁十足嘅泰式酸辣醬，更加去膩惹味。

開心果香烤法式小羊架 $238
一心嚟食開心果菜式，主菜梗喺揀番開心果主菜系列啦，呢一款小羊架做法有啲似寶雲酥，不過就唔喺用麵包糠，而喺沾滿開心果仁碎，睇見都勁開心。侍應上菜時更說明一下做法，原來唔單表面嘅開心果仁碎，仲先搽咗一層開心果仁醬同法式芥末，所以，食起嚟味道更豐厚。而羊架嘅肉質非常嫩滑，帶濃濃羊羶味，合晒我哋口味。伴菜仲有大量紅嘅、黃嘅車厘茄，十分鮮甜，食得出靚貨。

開心果吉拿棒朱古力火鍋 $128

單睇「吉拿棒」你未必知喺乜，睇埋英文你就知喺西班牙油條，唔單止配上開心果醬火鍋，更有一小兜開心果仁碎，整體賣相好吸引。食法隨個人喜好，小弟個人認為最好喺將油條切粒，再沾上開心果醬，最後沾上開心果仁碎，想再食甜啲先點一點啲沙糖。自家製嘅西班牙油條本身已經喺開心果口味，炸得外脆內軟，加埋啲開心果醬同碎碎，令味道同口感都有疊加效果，正呀！

食完慢慢坐，因為環境非常舒服，加上過咗午市嘅尖峰時段，客人陸續離開，環境變得更清幽，繼續細味杯開心果仁咖啡。

個人評分
味道：9/10
環境：8/10
服務：9/10
抵食：8/10
平均每人消費：HK$350

餐廳資料：
Shift
地址：灣仔謝斐道415-421號積福大廈地下B號舖
電話：2267 6578