山區裡的走走趯趯: Abbraccio：寫意露台午餐

2025年5月20日星期二

Abbraccio：寫意露台午餐

同晌中環做嘢嘅老同學卒之入市買番個新居，裝修搞好晒，亦將快僑遷，當然戥佢高興，所以，趁機約佢出嚟食餐晏，兼講講近況。選址意大利餐廳「Abbraccio」喺食友嘅推介，佢話一來食物質素高，二來有個大露台位，景觀開揚，仲對住「大館」。

雖然話中環一到食晏時間就周圍都逼滿人，不過，一上到嚟雲咸街、荷里活道一帶，就唔會咁多人，啱晒傾吓偈。餐廳分室內、室外區，室內環境裝修蠻有氣氛，紅色絲絨梳化，牆上又掛上一啲油畫，遠處仲有一整個酒櫃，確喺有一派意大利餐廳風格。

而外面嘅室外區，地方非常之大，以木椅為主，仲有少量梳化位，加上配置大量植物襯托，令到整個環境好有意大利農村嘅田園氣息。當然，另一亮點喺開揚嘅景觀，整座「大館」盡入眼簾。

午市主要供應套餐，4道菜午餐包括餐湯、沙律、主菜、甜品同飲品，定價$178，不過，要留意部份薄餅、意大利麵及甜品都需額外加錢。個人最欣賞喺西式餐牌大多數會列明菜式有咩成份，既清楚自己食咗乜，又可以減少食物敏感嘅機會。

是日餐湯
呢日嘅餐湯喺南瓜湯，賣相就無話有咩好特別，但啲質感真喺做得好滑溜，南瓜嘅清甜味亦好突出，實屬穩打穩紥之上。

田園沙律

沙律方面謝稍稍普通啲，都喺一啲沙律菜再搭啲車厘茄、紅洋蔥同西瓜蘿蔔，再添上少少油醋，不過，勝在用料新鮮，味道清新。

Contadina

薄餅基本喺7吋，可以升級至10吋，但作為午餐，加上得兩個人，7吋已好夠食。呢一款薄餅用料包括雞胸肉絲、忌廉芝士、水牛芝士、車打芝士及炒韭蔥，有別常見嘅加蕃茄醬，而喺加白汁，新鮮即焗，入口熱焫焫，批底份外軟熟，仲好有麵粉香；加咗3重芝士，又有啲炒韭蔥，味道豐厚，加埋啲燶邊位，實在好食。

Polpettoni Pasta +$28

如果主食揀邊款意大利麵都要加錢，又無理由兩個主食都食薄餅，所以，4款意大利麵就揀呢一款，皆因用上安格斯牛嚟做肉丸，點都秤高少少。份量唔太大，對我哋嚟講啱啱好，啲肉丸果然好正，搓得鬆化，極具肉香，帶微微油脂；而麵條咬落好有韌性，我哋都覺得喺自家製，每條麵條都沾滿蕃茄醬，食得到有唔少茄肉，做得好有水準。