Chill Pill：「Chill」出預期

因為工作關係，同個學弟久唔久會出嚟食飯傾吓偈之餘，仲會講講工作上合作嘅嘢。最近又出嚟聚聚，就番大家方便，就搵到晌太子嘅「Chill Pill」，餐廳離太子站或旺角東站都喺大概5min步程，非常就腳，加上喺咖啡店，比較清靜，方便傾偈。

從店面已大概可以感受到佢喺間走文青風路線嘅咖啡店，一室以白為主調，裝修簡約，燈光柔和，整潔乾淨，加上少少擺設，整體予人感覺舒服、輕鬆自在。

細看餐牌，食物就應該走西日路線，先介紹一下散點菜式，啲分類名稱都好別出心裁，但離不開小食、輕食、主食、甜品……等等，另外，飲品亦多元化，兼頗有特色。

當然，套餐計落點都比散點划算，店家就提供多款套餐，包括：Mix & Match套餐、丼物套餐、2 Good 2 Chill 二人套餐，可謂各有特色。大家都想食得豐富啲，就揀個二人餐，包好多嘢，有餐湯、餐飲、小食、兩份主食及甜品，定價都喺$478。

枱上擺咗隻好得意嘅公仔，而落單就以二維碼下單，介面分類清晰，易用！

是日餐湯

近排同南瓜忌廉湯幾有緣，早幾日同舊同學食晏，餐湯又喺南瓜湯，但今回晌賣相上就攞晒分，一來以小木托盤盛上，二來用「金寶」罐頭碗裝住啲湯，非常得意，再者，加咗少少食用花做點綴，喺靚咗唔少。至於啲湯，質感較厚身綿密，南瓜味道勁濃郁，仲有夠熱焫，好飲。

白桃芒果冰茶

雖然可以轉其他嘢飲（減$20優惠），不過，白桃芒果冰茶都啱我哋，慳番啲就唔轉喇。估唔到，杯冰茶幾好飲喎，白桃味頗突出，並滲出陣陣芒果清甜味，茶底亦好唔錯，幾幽香。冰涼清爽，配一陣嘅吉列豬扒同羊架都好搭配。

日式山葵醬餃子

一客有4隻，外觀包得好靚仔，有別煎餃，喺用炸嚟做，咬落好脆口，又唔油膩，裡面嘅餡料好鬆化，有少少芥末味，唔錯！唔錯！

日式咖喱豬扒飯

賣相就好傳統樣，不過，加咗少少食用花做裝飾，感覺喺唔同咗啲。而飯粒軟熟而黏糯，咖喱喺日式般帶點甜味，撈飯食好唔錯，咖喱內仲有好多蘿蔔同薯仔，至於啲豬扒肉質鬆化，外層嘅炸漿幾香脆，亦唔油膩。

香烤羊架 +$18

難得有老友都鍾意食羊，咁就梗喺補少少錢揀香烤羊架啦，上到枱一客3支羊架做得非常靚仔，仲伴有大量烤薯同色彩鮮艷嘅燈籠椒。羊架做法採用寶雲酥，肉面沾滿麵包糠，食落有少少焦脆感，而羊肉切開透出粉嫩色澤，煎得啱啱好，肉質非常軟腍，帶濃濃羊羶味，好啱食。

柚子牛角窩夫

有一陣子牛角窩夫好大熱，雖然依家熱度稍降，但其本身都幾有特色。索性以牛角酥夾成雞蛋仔，所以，入口酥脆並有牛油香，仲伴有雲呢嗱雪糕球、焦糖脆脆，幾樣夾埋再沾回柚子醬一齊食，真喺口感、味道都變得更豐富、更具層次。

因為客人唔太多，都喺斯文客居多，而且，啲招呼好，環境又舒服，所以，幽幽靜靜好適合幾個朋友短聚。

個人評分
味道：8/10
環境：8/10
服務：9/10
抵食：8/10
平均每人消費：HK$273

餐廳資料：
Chill Pill
地址：太子洗衣街167-175A號嘉德大廈地舖
電話：2328 2287