紅葉茶屋 Momiji-Chaya：專「葉」製作

老婆嘅半年英文課程卒之都完喇，賀一賀就梗喺食餐好啦。雖然，啱啱去完日本無耐，但都想食番日本嘢，加上佢喺抹茶控，所以，就想起嚟自日本鐮倉嘅「紅葉茶屋」。「紅葉茶屋」晌唔同區都有唔少分店，揀咗嚟尖東帝國中心店，就番大家收工。

晌外面都睇到餐廳地方大，一室日系淺木色，裝修簡樸，卻不失雅致，而且，座位非常之闊落，我哋被安排坐晌梳化位，增添咗一份悠閒寫意感。

此外，全店又多咗好多熊貓嘅相關裝飾，食住「熊貓經濟」條水，的確，啲熊貓又幾可愛。

主餐牌製作好精美，翻一翻，選擇非常之多，和式、洋式都有，由定食、丼飯、烏冬、拉麵、小食、超多款甜品、窩夫、芭菲、新地……到飲品都一應俱全，穿插不少美食照，十分吸引，定食更可免費添加白飯。

此外，仲有多張推廣餐牌，包括二人前套餐、季節限定定食、佐酒小食、招牌甜品……等等。

枱邊有二維碼，自行掃碼落單，而侍應亦好樂意幫忙下單，講到啲服務，我就覺得好好，有禮，殷勤，咁就夠啦！

炸南瓜餅 +$15
睇餐牌時唔見，但掃二維碼時就見到部份小食及飲品都有加配優惠，就好似呢份炸南瓜餅，散點$35，加配只需$15。單睇外觀，炸得金黃，已覺得唔油，咬落確喺香脆不膩，炸功有一手，而裡面除南瓜蓉，仲夾有一片原件連皮日本南瓜，以證貨真價實，再者，南瓜蓉搓得綿滑，好足南瓜味。

照燒三文魚定食 $138

老婆食日本嘢，最心水喺銀雪魚西京燒，可惜呢度未有提供，但睇見有款照燒三文魚，佢話都好啱佢口味。一份定食包咗漬物、麵豉湯、日本米，夠豐富。先講講漬物，有蘿蔔同牛蒡，前者爽脆帶點柚子味，好特別，後者咬落甘甘哋；麵豉湯亦做的好好，唔會過鹹，好有麵豉香。至於啲三文魚，肉質柔嫩富油香，照燒汁夠晒惹味，飯粒黏糯有米香，整個定食都用料高質。

豪華海鮮丼茶漬飯 $178

我見佢哋嘅茶漬飯食法特別，所以，揀咗呢款豪華海鮮丼，登場賣相真喺好有睇頭，整碗丼面鋪滿三文魚、吞拿魚、帶子、牡丹蝦同三文魚籽。先喺好似食一般海鮮丼咁，一口刺身就一口飯，啲刺身好鮮甜，絕對質優取勝，完全無欺場。再加湯，小弟就揀咗香濃蝦湯（另一款喺鰹魚昆布湯），蝦味超強，餐牌就教以小碗分批加飯、刺身同湯一齊食，我就懶，索性倒晒啲湯落大碗，當食湯飯，有另一番風味，就算加咗熱湯，刺身仍保持鮮甜味，而飯粒吸滿湯，就更鮮香。

雪糕抹茶拿鐵 +$25

老婆喺抹茶控，所以佢一早已經目標定晌抹茶系嘅飲品中，但估唔到會揀呢一杯雪糕抹茶拿鐵，一落佢少飲凍嘢，二來甚少會飲奶多嘅拿鐵。不過，佢就話好想試呢一款，先飲一口抹茶拿鐵，佢話抹茶味好濃郁，幽香細膩，再等啲雪糕溶溶哋溝勻拿鐵，口感更加香滑。

熱抹茶拿鐵 +$20

小弟本來就打算食甜點時襯杯鮮奶咖啡，但睇見餐牌話採用嘅抹茶喺百年老字號「森半」，雖然我唔認識，亦對抹茶唔多研究，但亦想改改試番杯抹茶拿鐵。不愧喺日系餐廳，單單一杯拿鐵，小巧嘅木托盤，精緻嘅石杯，仲伴有少少石頭朱古力，賣相甚具韻味。真喺無揀錯，入口茶味甘苦醇香，餘韻悠長，口感綿滑富奶香。

鎌倉紅葉茶屋抹茶提拉米蘇 $58

提拉米蘇算叫食唔少，抹茶味就算唔喺第一次，都好少食。最欣賞喺其小木盒造型，極具和風匠人心思，面頭滿滿抹茶粉加上一片「紅葉」啫喱，有晒意境。深深滔上一羹，可見一層疊一層，有滑溜嘅芝士餡、抹茶粉、兩層唔同味道嘅海綿蛋糕，口感豐富，味道多元，喺誠意嘅出品。

鎌倉紅葉茶屋特製軟雪糕巴菲 $75

日式芭菲向來喺日式西餐廳嘅甜品中佔重要席位，其多層次嘅賣相確實喺好有亮點，除呢款特製芭菲，亦有自選組合，懶得揀就揀呢一款試試，話晒以餐廳名字冠名。講番杯芭菲，堅多材料，由上而下，就有期間限定嘅夕張蜜瓜軟雪糕、銅鑼燒、紅豆泥、白玉、抹茶忌廉、抹茶寒天，再伴以黑糖漿，單睇咁嘅排場唔食都知好好食啦，哈哈！食完兩道甜點，真喺飽到頂心口呀。

「紅葉茶屋」嘅出品果然有一手，老婆亦大讚啱食，尤其啲抹茶嘢。因為佢都算喺附近返工，所以，佢話睇定啲午餐下次再嚟試試。

個人評分
味道：9/10
環境：9/10
服務：9/10
抵食：9/10
平均每人消費：HK$280

餐廳資料：
紅葉茶屋 Momiji-Chaya
地址：尖沙咀麼地道68號帝國中心UG樓UG50-57號舖
電話：3591 9006