楓霖餐廳：旋「楓」式早餐

忙東忙西，好耐無行過山，所以，趁星期六搵埋洪哥快閃一段由大水坑上藤皇，再行返落西貢市中心。上山前，先到茶記食個早餐壯壯聲威，出咗大水坑站晌大水坑村有好幾家茶記，搵咗最就腳嘅「楓霖」。

村屋環境，有室內，有室外，不過，好多街坊、工友幫襯，裡面坐滿人，焗坐出面，其實出面舒服嘅，尤其是天氣涼涼哋，不過，就要吸「二手煙」。諗住快快食個早餐，都費事等裡面。

本來啲枱都好窄，枱上放埋餐具、調味就感覺更加窄。

餐牌底面4頁，就包含晒餐廳所以菜式、乜餐物餐。早餐方面，價錢同出面其他茶記都喺咁上下。

鮮牛肉麵加雙烚蛋 $42
洪哥一向講健康，揀咗無乜汁醬嘅鮮牛麵，佢話啲牛肉都幾鮮嫩，再加兩隻烚蛋，真喺夠健康營養。

沙嗲牛肉麵、餐肉煙肉牛油方包 $42

小弟就無咁健康，揀番最心水嘅沙嗲牛麵，再配埋邪惡嘅餐肉、煙肉，喺無老婆晌身邊先敢叫。個沙嗲汁推得唔錯，夠香，無話超好食，但已收貨，而牛肉都幾嫩滑；餐肉、煙肉夾埋落牛油方包一口咬落去，夠過癮。

熱奶茶、熱咖啡（齋啡）

慣性，點都要試杯熱奶茶，色澤有點淡，入口味道算OK，個人而言，就覺得未夠醇厚，感覺差少少似的。

真喺好似食快餐，旋風式食完，走人，出起步上山。

個人評分
味道：7/10
環境：6/10
服務：6/10
抵食：8/10
平均每人消費：HK$42

餐廳資料：
楓霖餐廳
地址：馬鞍山大水坑村130號地舖
電話：6806 6050