Grind & Brew：一「麩」當關

輪到老婆餐生日飯，其實都幾難諗，佢唔喺追求奢華嗰一類，所以，唔使專登搵啲貴一貴嘅，反而，搵到啱食就可以喇。佢除咗偏素，近來，仲發現原來佢喺要食無麩質嘅嘢，否則，食咗小麥、大麥做嘅食物，就會出現皮膚痕癢。早前去Airside食嘢，就無意中發現「Grind and Brew」，喺一間提供無麩質食物嘅小店。

餐廳採開放式設計，所以，晌鋪外已經睇勻晒成間鋪喺點。裝修簡約，座位唔多，牆上掛有少少畫作點綴，又有啲盆栽襯托吓。

另一邊，貨架之上，有多款無麩質嘅產品散賣，更有啲產品喺照顧到毛孩嘅需要。

翻開餐牌，先有無麩質嘅介紹，之後，就有各種咖啡、特飲、甚至乎餐酒都有，另外，仲有主食、輕食類。可惜佢哋無套餐選項，樣嘢都喺散點。

雖然，餐牌無顯示甜品，其實，是日有供應嘅甜品就放晒晌出門凍櫃，造型頗為精緻。

此外，可能店內座位少，所以，都有設用餐時限，不過，人唔多就唔會點執行。

Seafood Curry Pasta $158

原來，無麩質意粉會比較易斷，同埋韌啲，晌餐枱一角已有溫馨提示。我自己都食過一次無麩質蛋糕，喺有啲唔一樣，比一般嘅蛋糕會乾啲。

講番碟意粉，賣相就做得幾靚仔架，不過，比起餐牌嘅圖片就差咗一大截，起碼啲大魷圈就變咗碎濕濕嘅魷魚仔。估唔到，啲咖喱幾有辣勁，亦算喺幾香，海鮮料就少少偏少，至於啲意粉，喺有少少碎，但就唔算好韌，跟平常食嘅差唔多。

Mentaiko Crab Meat Pizza $138
而我揀嘅薄餅，就只喺話純素批底，唔喺無麩質，所以，老婆喺咁二試少少就算。大概喺8吋大批底，厚薄介乎厚批、薄批之間，睇落餡料確喺幾多，一啲都無手緊，但其實裡面蟹肉唔算好多，不過，加咗明太子，鹹鹹香香，味道真喺幾好食，批底都鬆軟。

Latte $42

最後，再嘆番杯至愛嘅鮮奶咖啡，咖啡表面好平滑，拉花亦都好靚仔，線紋細緻。完全無攪過，飲落口感平勻，而且，咖啡香氣醇和，喺沖泡得好有水準。

今次都喺小試這種餐廳，對無麩質食物都心裡有數，所以，亦無話有咩太大感受。不過，知道有唔少人對麩質有敏感，呢類餐廳嘅出現確喺為佢哋帶來喜信。

個人評分
味道：8/10
環境：7/10
服務：7/10
抵食：6/10
平均每人消費：HK$185

餐廳資料：
Grind & Brew
地址：九龍城啟德協調道2號AIRSIDE 2樓L218B-L218C號舖
電話：3468 6436