太子餅店 Prince Bakery：創意新一「菠」

收禮物就當然開心啦，是日就收到友人送嚟嘅「小禮物」，盒面印有「太子餅店」嘅標記 。雖然咁大個盒，但唔喺蛋糕嚟，事先朋友已張揚喺啲特色具創意嘅菠蘿包，究竟點特色法，立即開箱。

打開一睇，原來喺有3款菠蘿包，外觀上，確喺幾特別，分別喺人氣開心果口味、濃郁石板街口味、菲律賓家鄉口味，3個睇落都好有個性，而且，做得都比較大個。

人氣開心果口味菠蘿包

近年開心果大熱，皆因有益又有抗氧化之效，市面都多咗好多開心果產品。確實，聽個名都開心啦，而呢個菠蘿包睇個樣同樣叫人開心，因為面層黐滿開心果仁碎，咬落菠蘿皮好脆口，加埋啲開心果仁，口感獨特，而包身非常鬆軟，中間仲有一層開心果軟心餡，極之香滑有果仁香，實在好食。

濃郁石板街口味菠蘿包
朱古力味嘅產品一向受大眾歡迎，加上研究發現話食朱古力有助舒緩壓力，所以，晌公司我都不時放定盒朱古力傍身。講到呢個菠蘿包，喺面層菠蘿皮之上沾上一層非常香濃嘅朱古力醬，再加埋啲棉花糖同杏仁片，立時令到口感豐富，再者，包心更加多放啲朱古力同杏仁片，令食味錦上添花，朱古力控就千祈唔好錯過。

菲律賓家鄉口味菠蘿包

咩叫做「菲律賓家鄉口味」？原來靈感來自傳統菲律賓早餐麵包Ube Cheese Pandesal，睇外皮無乜嘢，切開就見包身加入咗香芋元素，成個包心都呈粉紫色，而中間一層放有半溶嘅芝士，香濃軟滑，鹹鹹甜甜，亦喺唔錯喎。

睇番官方IG，原來呢幾款菠蘿包喺出自大澳「佛教筏可紀念中學」一班少數族裔中學生嘅創意，透過「仁銷學院」嘅創意教育課程「小不點子」，鼓勵佢哋勇於把想法付諸實行，再由「太子餅店」嘅師傅指導製作，一邊試就一邊改，從無到有，令同學仔有更深嘅體會，值得支持！

個人評分
味道：9/10
環境：-/10
服務：-/10
抵食：-/10
平均每人消費：HK$0（朋友送贈）

餐廳資料：
太子餅店 Prince Bakery
地址：太古太古城道18號太古城中心1樓125號舖
電話：2214 9028