六福菜館 Loaf On：海鮮美食新大「六」

雖然西貢可以講喺港人後花園，不過多年嚟，入西貢嘅次數都唔算多，入親嚟通常喺兩個目的，一喺行山，一喺食海鮮。今次再入嚟，就兩樣嘢都做晒，行山部份就由大水坑起步，經梅子林、茅坪、昂坪，再落番西貢市中心。食海鮮部份就嚟到摘星十多年，卻低調得緊要嘅「六福菜館」。

點解話佢低調，一來茶館位處小巷之內嘅村屋格局，二來樓高3層，用餐區都喺由旁邊樓梯上去，非常隱蔽性。然而，上到去，裝修雅致，環境寧靜。

睇番「六福」自己嘅簡介，2006年開業，2009年就開始摘星，雖然小弟唔喺追星族，但連續十多年獲得米芝蓮一星足證水準極之穩定，喺實力嘅彰顯。

大大本餐牌有齊各款散點菜式，不過，最划算就應該喺點套餐吧，選咗個較實惠嘅二人餐（$1,488，包加一），再加少少散點菜式，已好夠3人食。

椒鹽奇脆豆腐 $60

見有唔少人大讚呢道小食，當然要試吓喺點？睇樣就平平無奇，但入口你就知咩叫真功夫，件件炸得金黃，熱焫焫放入口，唔會太熨，外層既薄且脆，一啲都唔油膩，裡面嘅豆腐嫩滑而富豆香。

椒鹽焗鮑魚 $280

套餐餐牌下面仲有啲追加菜式，其中呢一款椒鹽焗鮑魚更喺廚房推介菜式之一，採用南非3頭鮮鮑魚，成隻手掌大，出嚟嘅賣相極之有睇頭，十分巨型，值得用刀叉慢慢嘆。外層有微妙嘅脆口感，裡面就柔韌有咬口，細嚼出濃郁嘅鮮鮑味同溫和嘅椒鹽香，不愧為招牌菜。

西貢地道魚湯（套餐）
其實，就喺一道好家常嘅蕃茄薯仔湯，不過，飲落絕對喺有意外驚喜，因為其魚鮮味非常濃郁，啖啖精華，卻完全唔好有任何雜質，呢啲都喺功夫，既用大量不同的鮮魚，更以魚袋裝住去煲，再隔一隔隔清啲雜物，務求做到濃香而不濁。

豉椒炒蟶子皇（套餐）

叫得蟶子皇唔喺浪得虛名，單睇個外殼已知幾大隻，師傅炒功了得，炒到啲蟶子肉好爽口彈牙，完全無炒過籠，加上以豉椒炒，極之惹味香濃，卻無冚過蟶子嘅甜味。

天婦羅桶蠔生菜包（套餐）
焗蠔就食得多，但用上天婦羅做法印象中就第一次，雖然炸過，但估唔到啲桶蠔仲喺咁大隻。面層嘅脆漿做得好薄，脆而不膩，最有畫龍點睛之效喺配上一片生菜再塗啲沙律醬嚟食，立時增加咗陣陣清爽感，而蠔肉厚身蠔味重，極具口感。

上湯焗開邊西澳洲龍蝦配伊麵（套餐）

龍蝦向來都好多人鍾意，唔喺上湯就喺芝士焗，以上湯焗就更能食到龍蝦嘅鮮味，的確，龍蝦做得好到位，肉質彈牙鮮甜，啖啖肉食得夠過癒。而伊麵索晒啲上湯汁，亦都好好食。

清炒時蔬（套餐）

一餐飯總要有啲蔬菜落肚，平衡吓啲營養，雖然只喺簡單清炒，當然算唔得上特別，但食得出用料夠精，菜心都喺用上最靚部份。

豉油王炒麵 $168
度度都有炒麵食，但要做到色香味全嘅豉油王炒麵真真喺唔易，睇睇呢碟炒麵，麵身較幼細，絲絲分明，而且，炒得色澤均勻，入口爽身，全無油膩感，食完唔會一碟底油。雖然小弟唔食辣，友人就話啲余均益辣醬喺唔同啲。

自家製甜品（套餐）

唔到最後一刻都未知甜品喺乜，店員話會日日不同，今次呢個「蝶豆花椰青糕」非常靚，淡淡紫色，又晶瑩剔透，蝶豆花本身無乜味，主打喺入口好清爽嘅口感，又有片片椰青肉，為今餐作美妙結局。

環境清靜，招呼熨貼，仲可以一次過食到咁多款靚海鮮，喺一頓食得好舒服、好稱心嘅午餐。

個人評分
味道：10/10
環境：8/10
服務：8/10
抵食：9/10
平均每人消費：HK$600

六福菜館 Loaf On
地址：西貢市場街49號地舖
電話：2792 9966