家家戶戶 Gagahoho：美味「戶」動

一講到食韓國菜，不其然就諗起尖沙咀嘅「韓國街（金巴利街）」 ，真喺成條街都喺韓國餐館或韓國超市。今晚就返老婆收工，兩口子嚟到街口嘅「家家戶戶」，輕輕鬆鬆食一頓簡單嘅韓國菜。

唔喺講笑，雖然，只喺平日晚，但七點鐘已經有唔少人喺門口排隊，不過都算快上快落，等候嘅時間亦唔會太長。而裡面屬於小店格局，裝修方面好有傳統韓國家庭風，一室木系枱櫈，牆上近天花位又做咗啲書架。

打開餐牌，都喺賣傳統嘅韓國料理，但選擇非常之多：炒飯、什錦飯、石頭飯、海鮮湯、年糕湯、炒年糕、韓式公仔麵、炸雞……等等，睇見餐牌有兩個價錢，平啲嘅喺散點，貴啲嘅喺套餐，會多咗啲韓式前菜同埋一碗海帶湯。

由於一心都諗住食石頭鍋飯，咁啱見到佢另一張單張，逢星期一至四指定款式嘅石頭鍋飯做緊推廣，比正價平一截， 咁更加無理由唔點佢啦。

雞肉韓式什錦飯 $102

逢喺多菜嘅嘢老婆都鍾意，初時佢都想揀湯年糕，不過最後都揀呢款什錦飯。先分享啲韓式前菜，亦喺食韓國菜嘅一大亮點，有泡菜、辣豆腐、涼拌韭菜花、涼拌海帶，樣樣都幾好食，各有個性，尤其最後者，食起嚟清爽解辣。

而飯裡邊有好多唔同嘅蔬菜，包括翠玉瓜，甘筍絲，大豆芽、菠菜，加多隻煎蛋添，夠營養又健康，同埋啲蔬菜唔喺就咁白烚，喺有調味兼處理過，跟飯撈勻食真喺好好味，再者，雞肉煎得香口，飯粒又軟熟，份量又足，性價比高。

韓式牛肉石頭飯 $109
做緊推廣價只買$85，食得更加划算，石頭飯送到嚟一睇就知無將貨就價，大大碗石頭飯，滾熱焫，跟老婆嘅韓式什錦飯差唔多，配菜都喺一樣，不過，換咗熱焫焫嘅石鍋，同埋煎蛋換成生蛋。將韓式甜辣醬同所有配料撈勻一齊食，味道豐富又帶少少辣勁，牛肉好軟熟，下面更有飯焦，食到尾都仲喺暖笠笠，正呀喂！

順便講埋個海帶湯，睇開韓劇都知，韓國人生日就會飲海帶湯。碗海帶湯飲落幾清爽，唔好睇佢好似平平無奇，上網睇過其實啲海帶都搵啲牛肉一齊炒過先嚟煮湯。另外，套餐仲送咗一支韓國版嘅「益力多」，都好耐無飲過啦，啱晒我食石頭鍋飯之後飲。

見到外面仲有好多人等位，我哋都好識做，食完就走。家吓經濟好似好番啲，希望大家啲生意越做越好啦。

個人評分
味道：9/10
環境：7/10
服務：7/10
抵食：9/10
平均每人消費：HK$90

家家戶戶 Gagahoho
地址：尖沙咀金巴利街1B恆港中心地下1號舖
電話：3151 7200