牛丼家 GYUDONYA：活在「丼」下

出開嚟旺角睇波鞋，咁就順便食埋飯先走啦，去到近地鐵站口附近，本來就想試下間茶記，不過見到呢間「牛丼家」，老友又話想試下，我食咩都無所謂，反正都喺一餐。

上到上面一樓，有櫃枱可以落單，但如果排得人多，可以不妨利用晌地下同一樓嘅自助販賣機，呢度喺以快餐模式運作，落好單等嗌號碼籌，再出去攞嘢食。

一樓地方無咁大，而且，啲人都喺會貪就腳 ，攞完餐就喺返呢一層食，所以，比較多人。 

其實佢哋仲有上面二樓一層，不過，就要行樓梯上去，但地方就大好多，亦相對少客啲，感覺會坐得比較舒服。

丼飯嘅選擇，以大類就分為牛肉、漢堡扒、豚肉、鰻魚、雞肉，再細分就可以揀配溫泉蛋、香蔥、雙重芝士、咖哩汁……等等，此外，仲有多款小食供應；另外，有加錢升級轉套餐優惠，加$10就有青菜配飲品，加$15就有公魚仔配飲品，而加$20就有炸雞配飲品。

晌櫃枱落單期間，仲見佢旁邊棟住個$100/4碗嘅優惠套票，不過，就只可選指定嘅兩款丼飯。

取餐處旁邊有自助調味架，自由取用，再側邊放有餐具，亦喺要自己招呼自己。仲有，食完就記得幫幫手，自動捧番啲餐具、托盤出去「返却口」。

牛魔王飯+公魚仔+冰紅茶 $57
朋友就揀咗呢個組合，因為佢見啲漢堡扒寫明用和牛做，所以，心態上點都秤高少少。餐廳有建議食法，個牛魔王汁唔係倒落啲漢堡扒度，而喺愛嚟撈飯食，老友話酸酸甜甜撈飯真喺幾好味，而件漢堡扒有肉香又有油香，搓得鬆化，比預期好。而公魚仔雖然幾酥脆，但咬落比較硬身咗啲，反而杯冰紅茶老友試咗就話幾有茶香，夠冰涼，份外解渴。

咖喱豚肉飯+炸雞+白桃汁 $68
小弟就幾鍾意食日式咖喱飯嘅，所以，揀咗呢個豚肉飯，再升級套餐配上炸雞同白桃汁，豚肉嘅份量真喺唔少，雖然睇起嚟好肥吓，但入口又唔喺好油咋喎，可能因為啲咖喱調和咗，而啲咖喱亦幾香，帶微甜，撈飯食一流。炸雞都OK啦，口感幾嫩，但入口時唔夠熱，少咗份油炸嘅「熱氣」感，哈哈！杯白桃汁我就認為應該叫白核汽水喇，白桃味好突出，但汽泡好勁，完全喺飲汽水嘅感覺。

原本同老友都喺打算食個快閃晚飯，都無話諗住坐好耐，不過，講吓講吓好多往事及呢個世道嘅變化，但我哋都好滿足現況，可以講活得開心，活在當下。

個人評分
味道：8/10
環境：7/10
服務：7/10
抵食：8/10
平均每人消費：HK$62

牛丼家 GYUDONYA
地址：旺角通菜街123號盛世酒店1樓及2樓
電話：Nil