茶茶GO Chachago：「Go」質茶飲

小弟就唔喺咁經常買台式茶飲，間唔中一杯半杯咁啦，不過，天熱就多咗機會飲多兩杯。中秋都過咗，呢幾日仲上到33°C，熱到人都癲！工作關係落到嚟灣仔，撞啱呢間「茶茶Go」，咪買杯凍飲返公司嘆吓囉！

呢類茶飲店一向都喺鋪仔細細，一眼睇晒，最緊要喺夠乾淨，偷偷望入去，都幾夠衛生。

講番啲飲品，選擇十分之多，大類別分為牛乳入茶、純茶芝士奶蓋、梳打、甘蔗系列、鮮果茶系列、冬瓜茶、牛油果系列、酸奶系列、咖啡、牛乳系列、台式沙冰……等等。

晌等候期間，見到鋪前嘅凍櫃仲有啲甜品供應，睇啱「紫菜肉鬆小貝」，一個個，細細件咁，方便大家「些牙」，就追加埋佢。

金鍠楊枝甘露 $36
一向都鍾情芒果嘢，份量無得揀，一定喺大杯裝，但確實好大杯，以芒果打成嘅沙冰，唔單上芒果味十足，好清甜，口感仲好細滑，唔會有冰粒感，再者，落咗啲椰奶，添加幾分椰香，自然更有層次，底下仲有啲紅柚啫喱之類，冰凍好飲，晌呢種又熱又濕嘅天氣，絕對喺消暑奇「冰」！

紫菜肉鬆小貝 $38

一份有4件，唔好睇佢好似唔大件，其實，拎上手即刻感到好墜手，好有重量，蛋糕嘅口感幾軟滑，又幾有蛋香，裡面捲住啲蛋黃醬，再加上成件蛋糕四面都黐滿紫菜同肉鬆，味道鹹鹹甜甜，又帶點酸香味，難得又夾到喎，非常有趣。

初時只打算飲杯嘢，依家加上小貝就變咗下午茶，為忙碌嘅下午添幾分樂趣！

個人評分

味道：9/10
環境：7/10
服務：8/10
抵食：8/10
平均每人消費：HK$36

餐廳資料：
茶茶GO Chachago
地址：灣仔灣仔道93-99號地下D號舖
電話：Nil