Cocoon：西日精品

其實都唔多過嚟牛頭角、觀塘呢一邊搵食，不過，近兩個月真喺嚟多咗呢一，純粹都喺就番一下朋友而已。而今晚嚟到呢一間「Cocoon 」，名字好西化，但其實主打喺多國菜及日式便當嘅廠廈餐廳。

走進餐廳，跟廠廈周遭環境完全喺兩極化，裡面嘅裝修好雅致，灰白主調襯木系傢俬，好有份溫暖感，加埋牆上嘅裝飾，特別嘅吊燈，幾有文青風，我就估前身喺做咖啡店之類，依家就改咗做西日料理。

幾頁紙嘅餐牌簡簡單單，但製作幾精美，先喺有期間限定嘅日式便當，另一版就喺啲西式、日式嘅料理，仲有多款小食，全部以套餐形式供應，包咗是日沙律、味噌湯及基本餐飲。

此外，餐廳仲兼賣日式串燒，晌枱上就棟咗啲點菜紙，近水吧嗰旁邊仲有塊黑板寫住是日廚師推介，有興趣不妨留意下。

有一樣嘢好搞笑，坐低無耐，侍除咗遞上餐具、餐紙之外，仲拎咗兩杯熱檸水過嚟，但我哋未落單喎，原來嗰兩杯只喺一般熱水，不過，放咗片檸檬片，但睇落真喺以為喺杯餐飲。

燒雞皮 $18、燒牛舌心 $48

燒雞內臟、雞軟骨、雞乜雞物好多都試過，但單單燒雞皮肯定喺第一次，估唔到燒過嘅雞皮咬落喺脆到卜卜聲，非常之超香脆口，都幾過癒；另一串喺燒牛舌心，即喺牛舌最嫩嗰部份，入口柔韌細緻，又有牛舌嗰陣獨特氣味。

是日沙律、味噌湯

是日沙律喺簡簡單單嘅田園沙律配上胡麻醬，仲伴咗1/4隻溫泉蛋，啲菜食落幾新鮮，胡麻醬亦好香口；而味噌湯亦唔錯喎，雖未至於好濃麵豉味，但口感頗為清爽，裡面有唔少嫩滑嘅豆腐粒同昆布。

香辣黑椒牛肉意粉 $98
主食方面，先試咗款較西式嘅炒意粉，黑椒嘅香氣好突出，又帶點辣勁，而意粉炒得啱啱好，咬落有韌勁，牛肉亦算嫩滑兼份量足。

日式豬軟骨便當 $78

個便當好有睇頭，除咗主角嘅豬軟骨之外，仲配有炸春卷、一口甜薯、蒜蓉炒本菇椰菜，整體嚟講幾豐富。啲豬軟骨真喺幾好食，除肉質超鬆化，啲醬汁仲好濃香，撈飯一流，而啲飯又軟熟，更加咗啲飯素，好滿足。

凍檸檬茶 +$8、百香果檸檬梳打 +$28
其中一杯餐飲轉咗杯特色梳打，就喺百香果八搭檸檬，睇見啲百香果核就知用咗新鮮百香果做，唔喺糖水貨式，加埋鮮檸檬片，梳打入口果香清爽，配個香辣嘅意粉及濃味嘅豬軟骨真喺好夾。

雖然簡簡單單食下串燒、意粉、便當 ，但呢度環境舒服，加上今晚客人唔太多，啱晒幾個老友食下飯傾下偈，感覺非常之好。

個人評分
味道：8/10
環境：8/10
服務：8/10
抵食：8/10
平均每人消費：HK$150

餐廳資料：
Cocoon
地址：觀塘開源道54號豐利中心1樓104室
電話：57349766 (WhatsApp)