山區裡的走走趯趯: 遇見花蓮 Hualien Dating：台味「蓮」線

2024年9月25日星期三

遇見花蓮 Hualien Dating：台味「蓮」線

一講到花蓮就想起 2017年包車由花連玩到台東，沿岸景色又多又靚，仲睇到幾片金針花海，玩得非常之開心。所以，之後不時都會留意下花蓮、台東嘅新聞。雖然短期內就未打算再去花蓮走走，但今晚就嚟到「遇見花蓮」重尋台灣嘅味道。

踏進店內嘅第一個感覺就好醒神，一來地方光猛、環境整潔，二來裝修都幾骨子，一面落地玻璃窗加埋樓底夠高，自然令空間感更強，有幾邊卡位設計成小個室咁，前後嘅騷擾都可以大減，令客人傾得更舒暢，而店員都態度親切有禮。

細細一本餐牌，食物嘅選擇都幾多，其中有地道小食、逢甲蛋餅、雞腿吐司、花蓮小鍋、紅燒手工麵、花雕老雞湯、肉鬆滷肉飯便當、麻辣手工拌麵、台式飲品及台式甜品。

自行以二維碼落單又得，搵店員幫手落單都得，但咁多招呼，仲唔收加一，抵讚啦。

小食拼盤 $88

好多款小食都好吸引，心大心細之時，咁不如叫個拼盤啦，可以一次試到9款小食，樣樣少少啱晒我哋兩個人。小食款式包括（左至右，下至上）豬大腸、地瓜酥、雞卷、台式香腸、鹽酥雞、麻辣鴨血、蛋餃、牛肚，九宮格造型，賣相非常的骰精緻，甚具打卡感。小弟今次就唔嘥時間逐個逐個評，但整體嚟講確喺各有特色，要麻辣有麻辣，要清新有清新，要香口有香口……絕對滿足到口福之樂。

藥膳花雕雞卷手工麵 $68
曾經食過呢款花雕醉雞卷，覺得好有特色，所以，專登推介俾老友試，加上台灣嘅手工麵一向有賣點，故此，就揀咗呢一款主食。先試個湯底，濃而不濁，睇見咁多蟲草花同杞子，好有藥膳嘅清香；而雞卷做得出色，捲起嚟夠紮實，咬落啖啖肉，非常之嫩滑，有陣陣酒香，手工麵亦搓得好，咬落有韌勁，整具口感。

蜜汁滷排骨滷肉飯便當 $75

另一款主食我哋就睇啱呢一個排骨便當，一登場就感覺好有霸氣，兩大件滷排骨非常夠份量，仲配有一碗紫菜貢丸湯、麻辣臭豆腐和麻辣鴨血，個便當真喺好豐富。個湯飲落幾清甜，雖然話喺臭豆腐，其實就聞唔到咩臭味，不過堅辣，由於唔食鴨血，我就無試喇。件排骨做得濃香入味，肉質非常鬆化，正呀餵！啲白飯夠軟熟，撈埋大量滷肉同肉鬆，淨喺食呢碗飯都覺得開心正啦，溏心蛋亦做得啱啱好，個便當真心抵。