九爺牛腩：一「腩」無遺

有個朋友幾鍾意食牛腩粉麵，唔使返工嘅日子佢就會周圍試，睇見食友嘅食評大力推介呢間「九爺牛腩」，經濟實惠又抵食，性價比高，所以是夜就同佢嚟到試一試啲牛腩得唔得！

以港式粉麵店嚟計，餐廳嘅環境算大，而且，無啲舊式粉麵舖咁擠迫，裝修簇新，夠晒乾淨明亮，整體感覺闊落，令人好醒神。

我哋揀咗坐卡位，猶如大部分茶記咁，少少醬料放喺枱上，側邊嘅抽櫃就放有餐具、紙巾、糖包……等等。

大大張餐牌，底面兩頁，選擇非常之多，唔止有粉麵，仲有酥炸小食、飯類、淨餸、飲品，更有早餐、常餐、下午茶餐、三文治餐、每日精選粉麵餐……等等，另外，兼賣啲火鍋配料，俾人賣返去打邊爐。我哋就梗喺將目標放晌必食推介嘅粉麵度啦，而惠顧各式粉麵飯類，都可以以優惠價加配飲品同油菜。

酥炸雲吞 $28
見有多款酥炸小食，又唔貴，所以，點一客過吓口癮。一碟有5粒炸雲吞飽滿，唔喺話好大粒，但夠真材實料，裡面有好多蝦肉，咬落外層酥脆不膩，裡面就好爽彈，沾上少少甜酸醬，更正。

腐乳通菜 +$12
油菜有生菜、菜心同通菜，揀咗後者就梗喺配腐乳啦，啲通菜烚得幾爽口，啲腐乳幾香，質感啱啱好，唔會太稀或太杰。

牛魔王河 $60
老友諗都唔諗就喺推介之一嘅「牛魔王」，一大碗河粉鋪滿牛腩、金錢肚、牛孖筋、牛肺、牛膀同牛大腸，夠晒大堆頭，睇見都開心呀！佢就無話逐樣去評，但樣樣都好食，亦好耐無食過啲牛肺、牛膀喇，全部都炆得入晒味，牛大腸充滿油脂，卻無臊羶味，真喺「牛迷」必試，只賣$60確喺抵食。

秘製牛三寶 $50

小弟就無咁多心， 揀碗三寶已經好夠，因為三寶已經包咗牛腩、牛筋、金錢肚，同樣餸料鋪滿碗面。湯底非常香濃，有少少八角香料味，香得嚟唔油膩，而河粉滑溜，且份量十足。先試試啲牛腩，唔止入味，極之鬆化，牛筋就柔韌有咬口感，牛肚就好爽口，唔會韌到咬唔開。食友無講錯，真喺性價比高。

熱奶茶、凍檸茶 @+$8

冷熱飲品都喺加$8，汽水加$10，特飲就加$12，我哋見抵就簡簡單單要杯奶茶、檸茶，當然，就唔及真正嘅茶記好，但志在有啲嘢飲落雞，過過口癮而已。

食咁多嘢每人先喺八十蚊多啲，而且份量十足，食到我哋都好飽，啲牛腩、牛雜又做得有質素，卡位坐得舒服，真喺平民嘅快樂。

個人評分
味道：8/10
環境：8/10
服務：8/10
抵食：9/10
平均每人消費：HK$83

九爺牛腩
地址：佐敦佐敦道36號地舖
電話：2623 6188