PHI Coffee & Pancake：真「梳乎」下午茶

又喺要上文提要吓，同舊同事一齊走訪西上中環嘅最新大型壁畫，仲參觀埋「元創方」同「大館 」，前前後後都行咗幾粒鐘，大家都話有啲攰攰哋，加上晏晝嗰餐食得唔稱心，點都要搵番個滿意嘅下午茶嚟補番。幾個人都話想食梳乎厘班戟，既然就晌「大館」附近，一於落去「PHI」，話晌小弟曾經食過一次，都比較有信心唔會伏。

相對上一次嚟都相差咗年半時間，環境當然完全無變啦，所以，照抄番上一次食評嘅環境介紹，就喺裝修帶點文青，一來以淺色木系為主調，配以柔和燈光，予人感覺舒服；二來喺好多位置都插上大量乾花、植物木，簡約富文藝氣氛，有份寫意感。

因為擺明喺嚟食下午茶，重點完全放晒晌啲梳乎厘班戟度，不過，唔知係咪假日緣故，飲品完全無加配優惠，全部都喺散點正價，所以，今餐只喺叫咗兩份班戟、5杯飲品，已經五嚿幾水。

抹茶鮮奶 $42、纏綿咖啡 $52、暖泡沫咖啡焦糖味 $42、檸檬特飲 $42、澳白咖啡 $38
都好耐無咁齊腳一齊出嚟聚一聚，所以，點都「喺咁二」影番張「大合照」，其他人飲嗰啲飲品我就唔多講喇，因為既無試，亦無問佢哋飲後感，主力只係介紹番小弟所飲嗰杯澳白。純睇賣相，就感覺沖得一般般，咖啡味喺芳香嘅，入口亦算醇和，只喺飲落會有細微唔均勻嘅感覺。

宇治抹茶紅豆梳乎厘班戟 $156
唔睇番上次食評都唔知，只喺相差年半時間，呢一款梳乎厘就由$112跳到$156，但大家確實喺想試呢一款梳乎厘。單睇個賣相，已經無得輸，亦喺吸引大家揀佢嘅原因，3大個厚身嘅梳乎厘班戟，再鋪上雪白嘅麻糬片，伴有紅豆、抹茶忌廉、抹茶金寶、三色小丸子、抹茶寒天、抹茶吉士醬、雲呢嗱雪糕球。梳乎厘部份鬆軟綿綿，空氣感強，微微濕潤，極有蛋香，麻糬煙煙韌韌，紅豆又綿又清甜，金寶焗得好香脆，小丸子口感軟糯煙韌，寒天滑溜無比，配以忌廉、吉士醬、雪糕，真喺非常好食。

Lotus 海鹽焦糖梳乎厘班戟 $108
雖然唔喺我主張點佢，但焦糖口味直頭開正我嗰瓣。同樣有3大個梳乎厘，但就無抹茶紅豆嗰款咁大堆頭，但都有一大球雪糕，配以香滑嘅鮮忌廉、焦糖醬、焦糖脆粒、Lotus餅。因為一向都鍾意拖肥、焦糖之類 所以基本上配乜嘢作為甜品都鍾意食，班戟加上香濃嘅海鹽焦糖醬、忌廉、雪糕，真喺好滋味，仲有啲焦糖脆粒酥脆可口。

平時小弟食下午茶多數都喺行完山去茶記，而今次晌中環食梳乎厘班戟，食得豪，皆因一來梳乎厘班戟好似貴咗，又無咗飲品加配優惠，焗住全散點，自然變得相對消費較高咗，但偶爾為之加上一大班老友，環境又舒服，都值得嘅！

個人評分
味道：8/10
環境：8/10
服務：8/10
抵食：7/10
平均每人消費：HK$106

餐廳資料：
PHI Coffee & Pancake
地址：中環士丹利街19號卡佛大廈2樓1號舖
電話：3565 6199