山城毛兒老火鍋：有機可「城」

小弟一向都唔嗜辣，食到少少咁啦，不過，身邊就有唔少朋友視辣如無物，食得瘋狂。今晚就瘋狂一下，同朋友嚟到來自重慶嘅品牌「山城毛兒老火鍋」試試其川式老火鍋，據知喺由四川師傅主理，夠晒正宗，老友就非常期待亦讓小弟掹掹車邊，有機可乘試啦重慶火鍋。講到重慶火鍋，小弟真喺有啲失禮，因為工作關係，都曾經走訪有山城之稱嘅重慶十多年，不過都喺未習慣到花椒所帶嚟酥麻嘅感覺！ 

門面裝修已經有份古色古香嘅感覺，尤其個招牌，而外面仲貼咗一張有關重慶火鍋嘅介紹，包括其起源同發展，都非常有趣。

踏進餐廳，估唔到喺咁高樓底，可以講喺裝修簡約，唔會太過庸俗奢華，但富中國色彩嘅彩燈吊燈，就啱啱好喺適切嘅點綴。牆上更貼上吃火鍋嘅十大好處，小弟就最認同喺簡單方便，非常合適親朋聚會。

其實，入門口右邊仲有一個廂房，不過，當時坐滿客，就唔方便影相，所以，唔知有幾大；反而晌餐廳最入，仲有一張小圓枱，正正被啲柱位同牆遮住，私隱度更高。

講講餐牌先，一大張點菜紙列晒所有鍋底、特色菜、肉類、蔬菜類、涼拌、飲品、酒類……等等。

順帶一提，需收醬料費每位$15，侍應會捧來幾款佐料，如蒜蓉、芫荽、蔥粒，當然，唔夠嘅話之後再加都得；另外，晌枱面仲放有醬油、極之香嘅麻油。

正所謂工欲善其事，必先利其器，除咗一早已有啲湯殼、湯隔之外，店長仲俾咗個夾夾吓嘅神器，又幾好用喎。

無渣紅油麻辣湯、胡椒豬肚雞湯 $148
呢度招牌嘅當然喺無渣紅油麻辣湯，有唔同辣度嘅選項，但亦有好多唔辣嘅湯底供選擇，所以，目測所見大部分人都喺揀鴛鴦鍋底，咁就適合唔同人嘅需要啦。我都有試少少個麻辣湯，真喺堅辣，另一款胡椒豬肚湯好清香，胡椒味濃得黎唔會好嗆喉，豬肚好爽，啲雞亦好滑。

臨江門冰鎮毛肚 $168

晌點菜紙中有一系列廚師推介嘅特色火鍋料，我哋就試咗幾款。先試試啲毛肚，即喺牛栢葉，平常啲牛栢葉都喺一件件，今次啲毛肚喺大片大片咁，灼熟之後咬落好爽脆。

通遠門生扣鵝腸 $158
小弟就唔喺好知咩叫生扣，不過，本身都幾鍾意打邊爐時候食灼鵝腸，因為輕輕灼過之後，啲鵝腸好爽脆，沾上少少醬油，已經好好食，同埋啲鵝腸洗得乾淨，完全無臊羶味。

干廝門大刀腰片 $98

呢個腰片真喺要推介，平時都極少食，打邊爐嚟講我都喺第一次食，睇外觀就知師傅嘅刀功幾了得，砌得成咁大大片，又非常之薄。入口嘅口感爽爽哋，幾得意。

新鮮豬腦花（兩個）$68
啲豬腦仲要搵個「豬兜」裝住，真喺好搞嘢，同朋友都無懼高膽固醇即管一試。啲豬腦質感滑滑綿綿，夾起都有少少難度，放落湯灼嘅時候都小心翼翼，費事整爛晒。豬腦入口粉粉綿綿，猶如豆花般，其實有啲似平時食嗰啲牛骨髓之類，本身無乜味，當然要靠啲醬油提味啦。

美國肥牛 $98

如果想食啲靚嘢，可以揀手切牛頸頭，不過我覺得啲美國肥牛已經好高質素。睇落色澤鮮紅，有少少油花，輕輕灼一灼十秘八秘，食落非常之嫩滑，既有肉香，又有啲油脂香，甚具質素，好食！

耗兒魚 $88
跟住試試啲海鮮類，侍應話呢個耗兒魚又叫做剝皮魚，細細條，灼熟之後質感非常之嫩滑，味道鮮甜，勝在又無乜骨，好易食。

台山生蠔 $88

話時話我都唔知台山有出生蠔，仲要品質一啲都唔輸蝕俾外國貨，單喺睇啲尺寸，已經夠晒巨大 肥美，就算灼熟後，都唔會點樣縮水，都仲喺好大隻，而且入口蠔味十足，絕不失禮。

手工韮菜餃 $38

再嚟一客韮菜餃，睇樣都知喺自家手工製，絕無欺場，包得又大又飽滿，咬落外皮帶啲煙感，裡面嘅韭菜刴得細碎，口感好唔錯，絕對唔輸蝕得過出面啲餃子專門店。

野生竹笙 $68

喺時候介紹埋蔬菜類，最記得多年前去雲南旅行 食過野菌鍋，真喺滋味無窮又養生，今次都試試佢哋嘅野生竹笙，入口好有種鮮爽脆脆嘅口感，最緊要竹笙富營養又健康嘛！

五香牛皮豆干 $48

睇落啲豆乾好似牛皮咁，真喺無改錯名，薄薄嘅一大片，咬落好煙韌，又富豆香，真喺好好食，值得一試，唔使下下都淨係食滑豆腐。

手工萵筍片 $38
叫得手工，確喺睇得到啲萵筍切到有幾薄，晾晒晌個竹架上，夠晒型。個人就建議唔好灼得太耐 ，因為太耐會過腍，又容易夾爛，灼佢大概分半鐘左右都差不多，咁當然都要視乎個人喜好，總之咬落清甜爽口，實在唔錯。

火鍋小弟唔算食得多，亦唔講得話少，不過今晚試到嘅嘢，有啲真喺好少食，就算有啲過往試過，但今次嘅質素都好高，加上呢度啲姐姐招呼好好，好有禮貌。

個人評分
味道：9/10
環境：8/10
服務：9/10
抵食：8/10
平均每人消費：HK$350

山城毛兒老火鍋
地址：佐敦上海街152號地舖
電話：9258 8688 (WhatsApp)