山區裡的走走趯趯: Yakiniku Kakura：今「燒」多高興

2022年1月3日星期一

Yakiniku Kakura：今「燒」多高興

多年前去過一趟九州旅行，不過嗰次只玩南九州，即喺宮崎、鹿兒島，本來都有打算玩埋北九州，就喺撞正新冠，一切外遊都延期再延期，照睇目前狀況，真喺講唔埋幾時先出得門。所以，就同啲老友一齊嚟到九州佐賀人氣燒肉店「Yakiniku Kakura」豪番餐，食咗當去住先，有機會點都要真身去一轉。

第一次嚟，入口有啲「蠱惑」，唔喺搭扶手電梯個入口，而喺隔離有少少隱蔽嘅樓梯。上到去，又以為喺眼見嘅入口，其實一樓有兩間店，轉右入條小巷走到尾先喺「Yakiniku Kakura」。

餐廳地方都幾大，分咗好多區域，明顯喺可以間番成一個個廂房，方便啲客搞活動，當然，依家疫情限聚，就唔可以搞得太大棚人啦。整體裝修摩登時尚，地方闊落，唔會有咩擠逼感，而且，每枱都有聚焦燈，最方便到小弟影嘢。

店家主打日本直送嘅鹿兒島縣產嘅黑毛和牛，位置選擇非常多，小弟就唔一一抄出嚟，自已睇相啦。此外，仲有宮崎產嘅黑毛豚、山口縣產嘅若雞、海鮮、野菜、前菜、飯麵……等等。

此外，唔介意價錢，想食到最好，餐廳更有提供到最高品質嘅A5等級鹿兒島縣產黑毛和牛。

如果唔想煩，或有選擇困難症嘅話，可以考慮揀套餐，定價$398，因為一個價錢包咗沙律、前菜、多款肉類及甜點，但記得喺二人起。

飲品呢？亦不愁無選擇，紅白餐酒、清酒、燒酌、燒酌特飲、果實酒、日本啤酒、乳酸梳打、汽水……等等。

雖然，店家都備有熱茶，但食燒肉就唔可以唔點番杯凍飲。而所有落單，都掃二維碼，自行落單，一路點，一路同你計住總數，又可以查番點過啲乜嘢，一目了然，唔難用。當然，唔熟嘅，可以搵店員幫幫手！

青森蘋果乳酸梳打 $42

白桃口味喺最心水，但之前都飲過好幾次類似嘅梳打，今次就試試青森蘋果，揀咗走冰，但一樣入口咁清涼，而味道又幾唔錯喎，有陣陣蘋果香，乳酸梳打帶嚟嘅清爽感，一口燒肉，一口梳打，真喺好過癮。

白桃乳酸梳打 $42

老友本來想飲可樂，我就推薦佢試吓白桃口味，一來飲乳酸梳打都有飲汽水嘅感覺，二來白桃口味應該會幾清甜，配搭啲濃味食物應該都好夾，結果，老友當然話好飲啦，又夠晒大杯喎。

一切準備就緒，用餐餐具、燒肉夾都整齊排列好。而醬汁分別有油醋汁、燒肉汁及醬油，基本上今日所點嘅幾款肉都醃過，可以唔使點用，不過，用咗就更加惹味啲。如需要鉸剪，都可以問店員攞，此外，換網可以用二維碼當落單咁做，而店員不時亦會主動幫忙換網！

而店員亦會先送上一小碟「豬膏」，咁唔講都明做咩啦，相信唔會有人就咁當前菜夾嚟食啩，哈哈。

生菜 $28
先介紹呢個「生菜」，晌餐牌中，估佢唔到喺列為人氣之選架，作用就喺好似食韓式烤肉咁，用嚟夾住啲燒肉一齊食，可以減減油膩度。不過，稱之為人氣之選，亮點反而喺因為附有一小碟特製嘅味噌，唔會好鹹，仲帶少少甜，幾襯。

大判燒！黑毛和牛西冷 $178

網上查一查，大判燒（日式燒餅）喺由於形狀類似日本過去嘅橢圓形金幣「大判」而得名，當然唔喺有件「大判燒」伴碟啦，而喺有隻溫泉蛋跟埋，俾啲燒肉沾嚟食。睇到件黑毛和牛西冷就已經好興奮，色澤鮮紅且有光澤，油脂十足且平均，簡單搽咗少少醬油，基本上，每一面輕烤廿秒左右就已經食得。沾上蛋漿，令入口更滑溜，西冷特點就喺既有肉香，又有油香，又加埋少少蛋香，真喺大滿足。