Echoes 90：即食泰串好「燒」息

最近，晌IG認識到呢個主打泰式串燒嘅品牌，下單直送，簡單快捷，足不出戶就可以即時享用到美味嘅泰式串燒，在疫情下，尤為方便。

而佢哋產品嘅賣點，就喺以真空包裝，讓味道變得更濃郁，唔使靠防腐劑都可以有較長嘅保存期。更附上醬汁，同樣喺獨立包裝，方便衞生。

到貨後，可以用微波爐、氣炸鍋翻熱，包裝袋背面已有食用說明，小弟就喜歡用焗爐，一般家用多士焗爐仔已OK，焗其8分鐘已變得像新鮮燒成咁。

店家產品共有3款，最划算就喺呢個「泰式豬雞組合 」，有齊泰式沙嗲豬肉串、泰式沙嗲豬肉串、泰式燒豬頸肉，每款各一包，定價$157，當然比散買嘅便宜啦。

泰式沙嗲雞串 $59

翻熱後，賣相真喺跟即燒嘅沒兩樣，而附上嘅沙嗲醬亦好足，有剩仲可以用嚟撈粉麵食。雞串嘅質素比預期好，用咗雞脾肉，肉質自不然夠嫩滑，而沙嗲醬推得十分香濃，稀杰度啱啱好，仲帶有很強嘅花生香。

泰式沙嗲豬肉串 $59

比起雞串，豬肉串嘅份量感覺好似多好多，啲肉都比較大嚿，晌官網睇過，豬肉用咗梅頭，故入口厚肉得嚟仍然非常軟腍，仲頗有肉汁，再沾上濃郁嘅沙嗲醬，就自然更香口惹味。

泰式燒豬頸肉 $69

呢一袋就拎返公司跟同事共享，晌公司裡就只好用微波爐翻熱，估唔到效果唔錯喎。原來啲豬頸肉喺先慢煮再燒，並已切成一件件，佐以泰式酸辣汁，豬頸肉咬落去十分爽口，沾上酸辣汁，酸酸辣辣嘅感覺令食味更豐富，又可以減低油膩感。

前後試齊三款串燒或烤肉，質素確喺不俗，現代人事事講求便利、快捷，呢幾樣就正正附合現代人嘅生活需要。

個人評分
味道：8/10
環境：-/10
服務：-/10
抵食：8/10
平均每人消費：HK$50

餐廳資料：

Echoes 90
https://www.echoes90.com/