山區裡的走走趯趯: ANNA：澳南海岸大「法」現

2022年1月8日星期六

ANNA：澳南海岸大「法」現

最近，就有朋友嚟過將軍澳踩單車，由寶琳踩到調景嶺，再屈過去日出康城，條單車徑好新好靚，而且，沿途有唔少喺海景段，佢話就算唔踩單車，入嚟行海濱都好舒服。所以，今日同朋友專登由油塘起步，經五桂山，再行到過嚟將軍澳，順便睇睇睇海濱，再食個晏。真喺大鄉里，原來近海濱呢幾段發展得幾靚吓，就好似今次食晏嘅法式薄餅小酒館「ANNE」，就頗有外國風情。

先講講鋪外嘅露天位，藍白W紋嘅藤椅，撐住大型嘅太陽傘，周圍都有好多植物，猶如巴黎香榭麗舍大道旁嘅咖啡小店。而呢幾日天氣好，少少陽光，又唔太曬，更讓人感覺輕鬆悠閒。

當走入鋪內，甚具格調，一派法式小酒館風情，白襯黑磚牆，配以深色木系傢俬，部份靠牆位喺古典嘅皮梳化，軟熟好坐；而復古圓拱形木框大玻璃鏡，再加上唔少彩繪法國地標海報，襯埋柔和嘅燈光，就算喺晏晝嚟，一樣有氣氛。

就連枱上嘅紙餐巾，都比人用料靚，錯眼仲以為喺布餐巾添。至於服務，都好貼心，店員有禮之餘，亦好主動。

食物方面，雖然喺以法式薄餅作為主打，但仍然有好多選擇：前菜、法式鹹薄餅、特色薄餅、經典主菜，而甜品就以法式甜薄餅為主。不得不提，啲特色薄餅標示咗世界唔同各地，包括挪威、美國、泰國、意大利、北京、印度，盡顯各地特色食材。亦順帶一提，鹹薄餅喺用蕎麥粉嚟做，而甜薄餅則以麵粉嚟做，除口感之外，色澤都會明顯唔同。

此外，逢星期六、日、假期，11:30am-3:00pm都會提供三道菜嘅早午餐（Brunch），包括餐湯或沙律、主菜及甜品，定價由$108-$198，以所揀嘅主菜而定，甜品亦可以加錢升級主餐牌任何款式嘅法式甜薄餅。最划算都喺揀食套餐，所以，我哋都以此為目標選項。

飲品方面，晌入門口位見到大大個酒櫃，就知紅白餐酒唔少得，尤其法國喺出產葡萄酒嘅主要國之一，另外，仲提供烈酒、香檳、雞尾酒、啤酒、梳打、汽水、果汁、咖啡及熱茶，都可以講一應俱全。

是日餐湯

老友選擇餐湯，而是日嘅餐湯喺菠菜忌廉湯，色澤非常翠綠，所以，菠菜味好突出，而質感十分細滑，可以講喺誠意嘅製作。

是日沙律

小弟頭盤就揀食沙律，而是日沙律喺以田園沙律為基礎，再加少少羊奶芝士及火腿粒，食得出用料無欺場，沙律菜新鮮爽脆，襯以蜜糖芥末汁，好食。

羊奶芝士法式鹹薄餅 $148

小弟都曾經食過法式鹹薄餅，都不止一次，不過，老友就未試過，當然點番一個俾佢試吓啦，揀咗個羊奶芝士嘅，無錯，又喺羊奶芝士，因為無諗過沙律會有。除此，仲加有蜜糖、核桃、九芽菜，以「木砧板」作餐碟送上。不得不講，啲羊奶芝士烘暖過，所以，口感特別綿密，以蕎麥粉做成嘅薄餅皮，口感就比較脆身，連埋所有食材一啖過入口，既唔會覺得怪，而甜甜鹹鹹嘅感覺變得多變而富層次。

牛扒薯條 $198

小弟都算喺食肉獸，自然想揀番啲肉，而呢一道都算哋法式酒館嘅經典主菜，咪以為又喺牛扒一件，餐牌就講明喺用咗牛腹肉，而且，仲喺嚟自法國，有機草飼嘅，配以香脆嘅炸薯條及伯那西醬，整碟牛扒嘅賣相非常之吸引。小弟要五分熟，而牛扒已切成小件，色澤嫩紅、紋理清晰，一啲血水都無，足證大廚晌火喉上拿捏準繩。小試一口，實在妙不可言，因為外皮焦脆、口感軟腍、肉味濃郁、又富肉汁，伴點自家製嘅伯那西醬，就即喺法式嘅牛油蛋黃醬，香滑帶微酸，實在精彩滋味。