昌哥廚房 Cheong Gor Kitchen：鏗「昌」有食力

最近，同住美孚嘅老友話我知晌四期平台有家「昌哥廚房」，小菜做得有水準，晚市亦有唔少特色菜，可以講喺有少少私房菜風格。平台呢邊真喺好少上到嚟，其實無咩特別原因，純因習慣性而已。既然，老友講到咁好，無理由唔上嚟試試架。

其實，餐廳嘅位置對區外人嚟講哋好吊腳、好隱蔽，不過，作為街坊，講兩講就大概知道咩位置，簡單嚟講，晌「荔灣街市」（好多人以為近荔枝角公園晌橋底嗰個叫「美孚街市」）側旁一條樓梯，一上去就見到。

踏入餐廳，地方唔大，但四四正正，簡單嘅茶記小店枱局，勝在夠光猛整潔。越晏就越多人，估佢唔到，最後都坐到滿，原來，真喺有好多街坊幫襯，可以講喺街坊飯堂。眼見個個入到嚟都同啲阿姐有幾句偈，表現熟絡。

晚市，基本餐牌就得兩版，棟咗晌枱上，一版喺小炒套餐，定價七、八十左右，包飯、例湯，飲品就加錢；另一版就喺啲碟頭嘢，跟基本熱飲。

此外，門口、牆上黑板，都寫咗唔是是日推介，都喺比較有特色嘅嘢，不過，價錢就幾取進吓。而店員仲話，佢哋唔會默守成規，晚市有少少私房菜嘅特點，餐牌無嘅，師傅煮到嘅都可以做，比較有彈性。

杏汁豬肺湯 $60

無論小炒套餐，抑或叫是日推介，都會包例湯，但眼見又有唔少客會揀飲呢個湯。雖然無咩轉配優惠，而且，個人覺得定價都好進取，但確實飲過你就知幾真材實料，杏香超濃郁，而啲豬肺洗得好乾淨，唔會有咩羶臊味。

海南雞 $150

估唔到呢度都有海南雞食喎，一份海南雞嘅份量真喺唔少，而且，色澤光滑，佐以特色辣醬及黑醬油。啲雞肉好滑溜，雞皮又爽口，而皮下脂肪少，啖喺肉，食竹戈得好爽。最愛沾上黑醬油，甜甜哋咁。

大澳蝦醬炒鮮魷 $138

雖然話喺炒鮮魷，不過，就額外加咗啲肉碎，最鍾意喺啲肉碎無咩肥肉，炒得爽身唔會好油，而啲鮮魷就極之柔嫩可口，唔會炒到又老又韌。當然，最正喺用上大澳蝦醬去炒，鹹香惹味，又唔會話過鹹而嗆喉，呢個餸用嚟撈飯真喺一流。

生折蟹肉蒸水蛋配龍蝦汁 $180

蒸水蛋就食得多，加蟹肉，又加龍蝦汁咁奢華嘅版本就肯定未試過，加上小弟都鍾意食蟹，但就唔鍾意拆蟹肉，麻煩嘛，所以，呢道菜啱晒我。賣相就平平無奇，但正所謂禾旱冚珍珠，滔起一羹，蒸蛋之下有一梳梳蟹肉，配以面面嘅龍蝦汁，真喺鮮味無窮，再者，啲水蛋蒸得啱啱好，口感嫩滑。

雖然茶記格局，但啲阿姐都好好招呼，同啲客有傾有講，氣氛融和。其實，是日推介中仲有好幾款嘢想試，例如紅燒扣肉、薑蔥蠔煲、黃金蝦釀冬菇，都喺好少機會食到，屋企就更加唔會整嘅菜式。順帶一提，唔喺日日都有晚市，星期三就唔做晚市喇，早市亦要9、10點先開，有少少個性！

個人評分
味道：8/10
環境：7/10
服務：9/10
抵食：7/10
平均每人消費：HK$130

餐廳資料：
昌哥廚房 Cheong Gor Kitchen
美孚百老匯街8-11號美孚新邨11座平台27號舖
2741 6537