Italian Tomato：美味良「芳」

有近30間分店的「Italian Tomato」，晌香港都屹立咗好多年，做得咁多年，又有唔少分店，自然有一定嘅實力。店家分為餅店及餐廳經營，幫襯過佢哋嘅餐廳，試過啲蛋糕確喺好有水準。今回到iSquare嘅分店（餅店）攞蛋糕，試一試冬日限定嘅新出品。

晌等候攞蛋糕期間，都稍稍睇睇佢哋其他嘅產品，除固定恆常款式嘅蛋糕（件裝或個裝）之外，仲供應禮盒裝嘅曲奇，尤其時近過年。

晌度買蛋糕仲有一個附加服務，就喺可以額外買啲裝飾道具、特色蠟燭嚟點綴吓個蛋糕。

至於話試一試佢哋嘅新品，喺以「Strawberry Sweets Fair」為主題，以士多啤梨配搭其他優質食材製作嘅出品，包括5款蛋糕及1款甜品杯。順手拎埋張單張，裡面就有詳細嘅介紹。

士多啤梨薄荷朱古力雪芳蛋糕 $278

粉色系嘅賣相，再襯以艷紅嘅日本士多啤梨及紅桑子馬卡龍，猶如冬日暖陽。而外層上面粉綠色嘅喺薄荷忌廉，粉紅色嘅則喺士多啤梨忌廉，蛋糕心就用上薄荷朱古力雪芳蛋糕為主體，再夾有士多啤梨鮮果肉及朱古力脆珠，喺非常有層次嘅組合。

日本士多啤梨嘅甜度很高，還帶有很濃香嘅清甜味，而紅桑子馬卡龍酸香有個性，中和了馬卡龍一向的偏甜，平衡細膩。 而忌廉打得輕盈，口感如軟雪糕般柔滑，甜度也恰到好處，沒有過甜的弊病。裡面嘅雪芳蛋糕質感非常軟熟，濃濃嘅朱古力味中滲出淡淡嘅清爽荷香，加上果肉及脆珠，令食味更加豐富、美味。

意想不到呢個士多啤梨加薄荷朱古力嘅新組合，出奇地搭配，加上賣相討好，確喺充滿幸福滋味，這小小嘅小確幸，為平淡嘅生活添上溫暖感。

個人評分
味道：8 /10
環境：- /10
服務：- /10
抵食：- /10
平均每人消費：HK$70

餐廳資料：
Italian Tomato
尖沙咀彌敦道63號iSQUARE國際廣場LG樓層1號舖
2739 4183