過嚟食下午茶，都喺貪佢個環境有種身處小木屋嘅感覺，據之前睇過啲雜誌介紹，店家嘅裝修喺以日本登山滑雪勝地白馬村為主題，用餐區搭咗成間小木屋咁，配搭布藝梳化，襯以唔同款式嘅咕臣，坐落嘅感覺真喺幾輕鬆舒服，喺今日差咗啲陽光。
餐廳亦有提供偌大嘅室外「草地」空間，不過，一來無太陽，外間都幾凍吓，二來周邊都喺樓景，所以，都喺覺得裡面舒服啲。
餐點方面，呢度主打喺打卡度極高嘅「Bento Board」，唔少人都喺為此而來，此外，就仲有少少散點嘅菜式、甜品及飲品。
落單都喺掃二維碼自行落單，依家都有唔少餐廳都用呢種形式，相信大家都熟晒，唔難用，而且，點過啲乜嘢又一目了然。當然，唔熟嘅，可以搵店員幫幫手嘅！
Yuzu Honey Croffle $88窩夫、班戟類甜點食過唔少，而牛角酥窩夫就第一次食，其實，早早都知有呢樣嘢，晌韓國大熱，以牛角酥為主材料製成窩夫，近排，睇過韓國綜藝「牛島酒館」，見金喜善直頭用韓國年糕嚟夾成窩夫，我估韓國人對玩窩夫機都幾狂熱。言歸正傳，一客有兩小件牛角酥窩夫，配以一大球雲呢嗱雪糕、類似日本嘅大福及柚子蜜糖，外層夠酥脆，食落多咗一份牛角包嘅牛油酥香，柚子味嘅「大福」外皮軟軟糯糯，裡面嘅餡心就非常軟滑，襯以柚子味極為突出嘅蜜糖，整體嘅感覺真喺唔錯。
Macchiato $38平常多數飲拿鐵多，今日就貪得意試吓瑪琪雅朵，細細杯，喺加入少少奶泡嘅意式濃縮咖啡，咖啡味幾醇香，但酸味較重，試過就算，都喺鍾意重奶泡系嘅鮮奶咖啡。
好輕鬆渡過一個人嘅午後時光，有時候，一個人享受獨自一人嘅自由、寧靜，有另一番寫意。小弟就唔諗咩發達唔發達嘅嘢，但求生活足夠有餘，就已經好好，正所謂知足常樂嘛！
個人評分
味道：8/10
環境：8/10
服務：7/10
抵食：7/10
平均每人消費：HK$140
味道：8/10
環境：8/10
服務：7/10
抵食：7/10
平均每人消費：HK$140
餐廳資料：
The ALP @ Lounge Hakuba
銅鑼灣謝斐道535號Tower 535 3樓302號舖
2111 1707
The ALP @ Lounge Hakuba
銅鑼灣謝斐道535號Tower 535 3樓302號舖
2111 1707
沒有留言:
發佈留言