賓墟餐廳 Bun Hui Restaurant：投「賓」菠蘿油

呢排啲天氣勁唔穩定，依一刻落大雨，一個鐘後，可以陽光普照，但轉頭。又再倒狗屎，所以，本來星期六、日喺行山日，但因此都唔敢約人。是日晌屋企食完晏晝飯，見出猛大陽，但一支公快閃由美孚經山路上長坑村、再經金山郊野公園過去鷹巢山，然後落返去李鄭屋村。出咗身汗，勞動完畢，出返青山道隨意搵間茶記「賓墟餐廳」嘆個下午茶，兼涼涼冷氣抖一抖。

前前後後都試過唔少茶記、快餐店，以「賓墟」嘅防疫措施做得最多、最足，卡位之間嘅膠板間得夠高，而中間嘅圓枱與圓枱之間直頭成塊膠簾隔鬼住，勁呀，有啲似入咗去實驗室咁，哈哈。 

枱面棟咗成支消毒啫喱隨你用，夠晒大方。更放咗一大壺熱水晌度，我嘅用法喺，用嚟消毒啲餐具大過用嚟飲。 

而餐具，一如好多茶記，就放咗晌枱側嘅「機關」櫃桶，老實講，咁樣放啲餐具，衛生就唔多衛生架啦，因為你唔知上手被咩人摸過，都有唔少無品嘅香港人喜歡亂摸，所以，唯有自己做多一步。 

依家好多餐廳都有做外賣生意，疫情之下更成為主要收入來，一次過掃描晒成張外賣單張，就睇晒餐廳基本有啲咩食。晌門面，更見到佢為促銷啲外賣生意，更推啲半價優惠。 

菠蘿油餐 $24

初時我以為「冰鎮」菠蘿油喺某某某茶記嘅新玩法，原本食吓食吓都有唔少茶記喺咁，之前晌「紅城粉麵」、「紅茶冰室」都遇過，今次晌「賓墟」亦喺咁，餐牌就無寫，但嚟到件牛油喺冰鎖住另上。

件牛油都幾厚身，夾落微暖嘅菠蘿包，一口咬落去，牛油嘅油滑口感幾OK，包身都好軟熟，喺「菠蘿面」唔得，未夠脆。

熱奶茶

菠蘿油，點都喺襯熱奶茶先夾，首先色澤好對辦，夠晒深褐色，入口茶底頗醇厚，有奶香，口感亦算喺順滑。

臨尾加點題外話，上述嘅行山路線小弟行過好多遍，由於近排成日落雨，我都喺第一次見到九龍水塘滿到瀉，要「泄洪」；另外，去到鷹巢山一邊，又可以飽覽西九龍一帶 。

九龍水塘

西九龍一帶 

以大街位置，地鋪，份菠蘿油餐只賣$24，算喺好平。其實，由荔枝角到深水埗，沿住條青山道行，會有好多茶記，不過，小弟就未有志向話要試勻晒每間茶記嘅菠蘿油，但有機會嘅話，總想多試幾家比較吓。 

個人評分
味道：6/10
環境：7/10
服務：7/10
抵食：9/10
平均每人消費：HK$24

餐廳資料：
賓墟餐廳 Bun Hui Restaurant
深水埗青山道154號地舖
2142 1228