臺坊：「坊」香鹽酥雞

呢晚又喺老婆上堂嘅日子，無飯開，唔想又快餐店，想試吓啲新餐廳，聽朋友講晌「厚福街」有家小店新開，賣台灣嘢，都有啲質素，所以，是夜就晌呢一家「臺坊」搵食。餐廳就位處「加拿芬道」同「厚福街」交界，即喺以前「許留山」個鋪位。 

餐廳裝修簡約，講得喺小店，地方唔會大，一眼望入去，左右兩排單邊位，一共10個位咁多，所以，餐廳另一主要收入來源就喺賣外賣，用餐期間，確喺見唔少人嗌外賣。 

雖然店鋪細細咋，但賣嘅食物款式都唔少，如台式小食、台式蛋餅、冷麵、飯品、牛肉麵及飲品，而小食及飲品都可以以優惠價加配。

枱上放有辣椒醬及餐具，餐具都喺放晌木盒內，較開放式擺晌枱上衛生，不過，都喺要自行清洗或消毒一下好啲。

黑糖仙草凍加珍珠 +$15

故此，小弟就加配一杯「黑糖仙草凍」再搭多份珍珠，先飲一啖，茶底不俗，入口芳香，慢慢滲出黑糖嘅清甜，而晌奶茶內浮浮沉沉嘅仙草及珍珠，前者口感滑溜溜，後者煙韌有咬口，令整體多添趣味。

鹽酥雞冷麵拌胡麻醬 $57

平常晌台灣鋪食牛肉就多，所以，今回改改食冷麵，一來天氣仲有啲熱，二來好想食鹽酥雞，配冷麵小弟就覺得最好不過。麵條以台式便當嘅竹紙盒裝住，感覺既環保，又有台式風味。

初時，以為就咁配鹽酥雞並淋上胡麻醬，原來仲有啲青瓜絲同蟹柳絲，所以，將啲麵條撈勻去，入口唔止陣陣涼爽，更多添一重口感，再者，啲胡麻醬又香，麵條夠韌勁。

至於啲鹽酥雞呢？唔錯啱，食落外層甘香鬆脆，又唔油膩，而肉質亦頗為嫩滑、入味，帶微微鹹香。其實淨食鹽酥雞，配珍珠奶茶都夠爽。

由於店家地方細，都唔好意思坐太耐阻人做生意，所以，今餐一支公用餐，加上食冷麵，15分鐘內搞掂，其實同平時去食快餐店差唔多，哈哈！

個人評分
味道：8/10
環境：7/10
服務：7/10
抵食：8/10
平均每人消費：HK$72

餐廳資料：
臺坊
尖沙咀加拿分道49號地下C舖
2780 6686