熱點 Hot Point：All Day DimSum

以前飲茶食點心就要晌朝早去酒樓先嘆到，都唔記得何時，啲酒樓就加設夜茶，即喺晚市都食到點心，但近呢10年左右，點心專門店就越開越多，成行成市，真喺由日頭到夜晚都可以食嘆到點心。疫情緩和咗好多，但仍然唔可以掉以輕心，所以，約食飯都只喺約番啲相熟嘅一個、半個。今回友人話點心癮起，就約出嚟幫襯吓啲點心專門店。最近，試咗一家晌太子新開無耐嘅點心專門店「熱點」，整體感覺唔錯，就同大家分享吓。

打開門入到去，第一眼喺近門口位左邊嘅外賣「廚房」，當然，唔喺晌呢度製作食物啦，只喺熱住啲點心等人買外賣，呢個時勢，外賣喺一家店佔幾大比重嘅收入來源。

再行入啲，成間餐廳嘅格局就一眼睇晒，左右兩邊喺啲四人卡位，中間就喺啲活動式二人、四人枱，裝修簡潔，環境四正、整潔。店員嘅態度亦好有禮、勤快，一來我諗依家飲食難做，當然要加強啲招呼，二來有限聚令，又喺閒日，始終未到餐廳接受最高嘅人流量。

一張點心紙就羅列晒所有款式，大部分會喺見慣見熟嘅款式，數數吓，都有成40、50款之多，睇落定價都算相宜，如果有留意嘅話，就會發現所有點心都改成5個字。順帶一提，茗茶每位收$5，而星期六、日、公眾假期全日需要加一，所以，閒日嚟試就可以慳少少。

鮮蝦菜苗餃 $7/件

甚少見啲點心斷隻賣，「熱點」就有幾款喺咁嘢，並用上細啲嘅蒸籠，睇起嚟唔會太肉酸。近件蝦餃以外，都幾鍾意食加埋菜苗嘅鮮蝦菜苗餃。件成品可謂皮薄餡靚，外皮夠晒晶瑩，入口唔黏牙，頗軟熟；鮮蝦與菜苗嘅比例恰好，入口既有鮮蝦嘅鮮爽，但又有菜苗嘅清香。

山竹牛肉球 $20

一客3球喺基本常態，墊咗少少鮮腐竹，牛肉球肉質結實卻甚彈牙，加入點點芫荽及馬蹄粒，增加口感及香味，喺好四平八穩嘅出品。

蘿蔔千絲酥 $21

件蘿蔔千絲酥絕對證明到啲點心喺即叫即製，入口熨熱辣，外皮非常酥香鬆化，更完全無油膩感，師傅炸功了得。而裡面塞滿蘿蔔絲，更喺清甜多汁。

雪山叉燒包 $18

外層「雪山」皮焗得香脆，但又唔易散，唔會食到一枱都喺碎碎，而包身鬆軟，入面嘅叉燒餡煮得惹味，更喺少肥，啲汁又啱啱好，最怕就醬汁過多。

紫米脆網卷 $20

今回無點蝦腸呀、叉腸呀，因為見到腸粉類有呢款紫米脆網卷，加入紫米做腸粉皮，裡面捲住脆網蝦膠，效果唔錯，可以講喺變種炸兩，所以，甚具口感，唯挑剔位喺今次啲網卷有少少油。

楊枝甘露糕 $21

最後，嚟一份甜點「些牙」吓，等今餐飯有個好結尾。雖然食嚟食去，都喺只食到西米同芒果肉，柚肉就唔喺好覺，但冰涼，又好足芒果香甜味，加上確喺有唔少清甜嘅芒果粒粒，整體而言，確喺幾好食。

綜合而言，食物做得有一定水準，定價亦合理，加上地方又就腳，招呼到位，人少少想過吓點心癮，「熱點」都可以喺考慮之列。

個人評分
味道：8/10
環境：7/10
服務：8/10
抵食：8/10
平均每人消費：HK$62

餐廳資料：
熱點 Hot Point
太子彌敦道782號麗英大廈地下C號舖
2613 0661