百川居酒屋 Hyaku kawa Izakaya：百試不厭

其中一個表姨甥女啱啱去完濟洲玩，聽佢講話幾好玩，風景唔錯，仲話有啲手信送俾我，喺樂天隻藍樽82%骰仔朱古力粒，晌香港暫時都未搵到架，真喺有心。所以，不如約埋食餐飯，知佢一向都喜歡日本菜，所以，揀嚟銅鑼灣嘅「百川屋酒屋」。

推門而入，地方睇落似乎唔喺好大，但其實幾深。一室和風木系，加上小燈籠、小旗幟及其他擺設，所營造嘅氣氛，甚有和風風情，甚有身處日本嘅居酒屋嘅感覺。吧枱位喺唔少人嘅心水選擇，因為，既可以睇到師傅握壽司，欣賞其精湛手藝，又可以跟師傅交流。

餐牌夾晒晌木板上，白底黑字，以類別計分為沙律、小食、串燒、手卷、壽司、刺身、卷物、玉子燒、天婦羅、一品料理、鍋料理、刺身丼、麵及烏冬。

而飲品方面，就以酒類為主打，如嚟同嘅燒酎、梅酒……等，不過，亦有供應紅白餐酒，甚至香檳。

雜錦魚生沙律 $98

搵啲開胃嘅前菜，又可以食到魚生，呢個沙律就一舉兩得，兼且賣相好靚仔。以沙律菜、車厘茄、青瓜及櫻桃蘿蔔，配上柚子醋作沙律底，酸香清爽；小竹籮內就放滿多款魚生，份量其實唔少，仲好新鮮添。

小蕃薯 $25

我哋都想試試呢度嘅串燒，睇吓啲手勢得唔得。先嚟一串日本蕃薯仔，睇佢唔出，入口熱辣辣，咬落粉香清甜，喺有質素嘅食材。

雞頸肉 $30

豬頸肉就食得多，雞頸肉又喺咩玩法？其實晌一家日式串燒店試過一次，呢次見有就介紹俾表姨甥女試試。雞頸肉燒得焦香，肉質咬落有點爽爽哋嘅感覺，又黐住少少軟骨，口感極過癮。

豚腩大蔥 $30

豬腩肉配大蔥，簡單以鹽同黑椒調味，出嚟嘅效果已非常之香口，而一口咬落啲腩肉，爆晒油，好油香，但就肯定喺唔健康，哈哈。大蔥爽口，叫做中和吓啲油脂，自我感覺良好啲咁啦。

雜錦天婦羅 $108

雖然叫「雜錦」，但主打只有大蝦，不過，跟餐牌另一款「大蝦天婦羅」喺兩樣野，「雜錦」嘅啲蝦無咗巨型，一客3隻，而「大蝦」嘅就用上亮虎蝦，大隻好多，但就一客2隻。啲大蝦好鮮甜、彈牙，粉漿做得夠薄夠脆，又一啲油膩感都無。此外，仲伴埋好多茄子、冬菇、南瓜、蕃薯、本菇……等等野菜天婦羅添，同樣都喺炸得香脆不膩，盡顯功架。

牛油果軟殼蟹卷 $128

唔知何時，牛油果跟軟殼蟹就成為老友記，以牛油果做成反卷，青青綠綠，再加啲鮮橙色嘅蟹籽，令其賣相更吸引。裡面則捲住青瓜同軟殼蟹，大啖一咬，外綿內脆，加上飯粒唔鬆散，整體嚟講好好食。

雜綿鍋燒烏冬 $98
最後以烏冬作結，貪其濕濕哋，好入口。整鍋烏冬有唔少料，包括大蝦天婦羅、雞肉、大蜆、冬菇、金菇、大蔥及小棠菜，加上烏冬嘅份量唔少，非常豐富。不過，正因為咁，反而湯就似乎少咗啲，此外，亦稍嫌烏冬腍咗少許，幸而，其他材料都好食，有鮮味。

見晌主餐牌底下夾有午市定食，故此，索性影埋出嚟俾大家有個參考，等晌附近做嘢嘅朋友可以睇睇啱唔啱食，定價$68-$150，正所謂豐儉由人。

講番個服務，招呼唔錯，不時為我哋添茶、收碟，而食物嘅定價都合理，以居酒屋而言，唔算貴，份量又足，最緊要喺食材有質素嘛！

個人評分
味道：8/10
環境：8/10
服務：7/10
抵食：8/10
平均每人消費：HK$285

餐廳資料：
百川居酒屋 Hyaku kawa Izakaya
銅鑼灣駱克道401-403號榮華商業大廈地下A號舖
5535 2338 (Whatsapp)