NOBU：周末瞬食

老婆剛剛完成一個為期3天嘅實習，面對一啲特殊兒童，真喺需要花唔少心力，故此，帶佢嚟到洲際酒店以創意「新派」日本菜式享譽國際嘅「NOBU」食餐高質素嘅日本菜，以示慰勞兼鼓勵一下佢。是日天氣非常好，到嚟呢一類「有景」嘅餐廳食晏，自然其附加價值更能突顯。

踏入餐廳，先喺俾客人淺酌嘅酒吧區，除日本清酒，其實依家日本出嘅威士忌都幾有名，不過，始終喺午市時段，非飲幾杯嘅黃金時間。但整體裝修得幾有有氣派，如果夜晚嚟肯定頗有氣氛。

再走入啲，就喺用餐區，裝修無話好重日本風，相反，就走摩登路線，加上地方寬敞，服務又好熨貼，予人感覺會喺輕鬆寫意啲。

整個用餐區都喺面向維港，180度維港景盡入眼簾，當然近窗口嘅枱喺「最佳觀景」位置啦，偌大嘅玻璃窗，讓陽光透入嚟，尤其是今日咁好陽光，個人感覺都清爽啲。

餐廳中央嘅天花，亦都甚有特色，初時望上去都唔覺，細心啲睇喺一串串長形嘅貝殼物，之後，據店方介紹，原來喺海膽刺嚟，真喺長知識，仲用咗成45萬支咁多，真喺唔知咁整法要花幾多個小時。

一黑一紅嘅餐牌，前者喺食物餐牌，後者則喺飲品餐牌。

打開食物餐牌，頭幾頁就喺較多人會揀嘅套餐菜式，基本上有3大類別，分別喺「招牌便當盒」（$388）、「自選便當午餐」（$408）、「瞬食午餐」（$368）、「文月大暑午市套餐」（$888）、「迷你定食」（兒童餐$300）、「丼」（$240 - $688）。「自選便當午餐」及「暖食午餐」睇落就最高性價比，當中以「暖食午餐」感覺划算啲，一份餐已包頭盤、主菜（配味噌湯及白飯）、甜品，故此，我哋都喺選咗呢一款套餐嚟共享。

再翻開後幾頁，就喺散點菜式，分類為冷盤、熱盤、陶板燒、刺身、壽司、壽司卷、天婦羅、麵類、湯品。

飲品餐牌方面，主要就喺以酒品為主，如清酒、烈酒、雞尾酒……等等，選擇超多，喜歡飲酒嘅客人一定滿心歡喜，其實，當入門口睇見一樽樽不同種類嘅靚酒，好酒嘅朋友已經可能心花怒放。但由於小弟都唔多識飲酒，所以，就無咩點影相。反而，影咗啲非酒精飲品作個人記錄。

南美式蕃茄牛油果沙律（瞬食午餐）

上過官網睇過其簡介，主廚松久信幸先生結合日本東京傳統的壽司訓練，亦晌南美秘魯、阿根廷，以及在世界各地遊歷，創出新派別嘅日本菜式，而呢一道沙律，就添加咗南美元素。賣相紅紅綠綠，感覺清爽，除牛油果，仲有南美嘅青蕃茄、紅蕃茄、紫洋蔥及藜麥，味道酸爽，令人越食越開胃，喺一道清新嘅頭盤。

雜錦刺身（瞬食午餐）

另一道頭盤就揀咗雜錦刺身，既然嚟食日本菜，當然食刺身就最能知道食材嘅用料喺點啦。話外話，既為高級餐廳，尤其日本菜，啲盛器都好賞心悅目，就好似頭盤呢兩隻碟，都非常有雅氣，而呢一道刺身三點，賣相精緻亮麗，有甜蝦、三文魚及金槍魚（吞拿魚），每一款刺身都色澤光亮，新鮮度十足，而甜蝦入口肉質黏黏哋卻又有啲爽身；三文魚鎅咗花，寧舍靚仔，十分油潤；金槍魚肉質柔軟且細緻，既鮮甜，魚味又濃。

味噌湯及白飯

食完啲頭盤，先飲啖味噌湯回暖番個胃先，個湯嘅麵豉味濃郁而不濁，湯內嘅豆腐粒非常嫩滑。日本米向來都出名，睇過一套日劇「下町火箭2」，更能感受到日農嘅堅持同誠意，而碗白飯確喺好有米香，口感黏糯軟熟。

雜錦天婦羅（瞬食午餐）

食刺身就可以知啲食材用料有幾鮮，而食天婦羅就可以知道師傅手勢有幾耍家，所以，小弟主菜就揀咗雜錦天婦羅，包括有兩隻海老、翠玉瓜、冬菇、紫蘇菜、西蘭花、蕃薯，以日本辣椒仔伴碟。唔單止炸得好靚，粉漿夠晒薄，而且，香脆得嚟半點油膩都無，如披上薄薄金黃外衣，盡顯功架。此外，海老肉鮮且爽，鮮蝦味突出，幾款野菜都好食，食出食材嘅原味，尤其啲冬菇同蕃薯，前者肉厚卻爽身，後者則又粉又甜，可見用料亦不賴。

鱈魚西京燒（瞬食午餐）

老婆一向喺銀鱈魚嘅死粉，所以，晌主菜一欄，佢完全無懸念就選上鱈魚西京燒，賣相無太多花巧，但勝在件鱈魚份量十足，好有睇頭。除咗燒得焦香之外，肉質細緻嫩滑，極富油香，絕對喺高質素嘅貨色，再佐以點點甜味噌，味道更具層次。雖然個套餐已包頭盤，若然上主菜時，再附加少少冷鉢、漬物、先付之類，就變得更加相得益彰。

凍威士忌咖啡杯（瞬食午餐）

如果你單睇中文菜名就比較難意會，若留意英文菜名用上Cappuccino一詞，你就明白點解個甜品表面有咁多「泡」，真喺做到成杯意大利泡沫咖啡咁，而表面嘅泡泡幼滑如絲，口感輕柔，最得意喺帶有陣陣酒香；而最底層喺咖啡奶凍，非常香滑，並晌奶凍面鋪上唔少朱古力脆米，增加其口感，整體嚟講有驚喜。

朱古力便當盒（瞬食午餐）

另一款甜品又喺唔知咩葫蘆賣咩藥，初時以為喺有幾款朱古力甜品拼湊埋一齊，啊！原來喺朱古力心太軟伴抹茶雪糕。雖然，切開個心太軟時，裡面嘅朱古力漿唔喺澎湃咁流出，但亦做到流心嘅效果，此外，整個心太軟嘅朱古力味喺超香濃，面頭又糝咗少少果仁碎，好食；而抹茶雪糕既有抹茶嘅幽香，又有牛奶嘅奶香味，質感挺實而柔滑，兩款甜品都叫人食得稱心滿意。

「NOBU」 不愧為一家享譽國際、全球知名嘅日本餐廳，雖然食個午餐都唔喺平，但論及環境、服務、食材用料，確喺物有所值。講到服務一環，都想補充多句，每一類別嘅菜式，都會同步上枱，做足基本；由於侍應都知我倆會共享所有菜式，故此，每一輪都幫忙換上新碟，亦稍稍清潔一下枱面，保持整潔度。「瞬食」一詞，有快速、便捷嘅一餐之意，由於窗外風景好，用餐完畢，我哋都多坐一會享受吓燦爛嘅日光，當然唔會急急腳咁走啦！

個人評分
味道：9/10
環境：9/10
服務：9/10
抵食：8/10
平均每人消費：HK$350（信用卡優惠）

餐廳資料：

NOBU
尖沙咀梳士巴利道18號香港洲際酒店2樓
2313 2323