第三站 Station 3 Cafe：飲、食、玩一站式

早年啲樓上食肆以啲小店居多，但依家，隨着食廈嘅出現，樓上鋪都為分喺細店定大店，邊類型、咩規模嘅餐廳都有，所以，相信搬上樓競爭一樣唔細，生意一樣唔易做。若能屹立得住，必定有其原因，最近到訪嘅「第三站」就喺見其風評不俗，又有老友試過，較有信心一試嘅樓上西餐廳。

搬樓上鋪都喺想慳啲租金，自然會將啲地方用到盡，做多少少生意增加收入，但踏入餐廳，枱櫈嘅編排比預期好。一室以白色為主調，裝修簡約，用上高椅背梳化，闊落好坐。

而最吸晴喺擺放唔少三眼仔同迷你兵團嘅公仔，令環境注入幾分活力。

此外，近門口更擺放唔少棋類、智力遊戲，喺唔少樓上咖啡店嘅必備，亦吸引唔少年青人嚟飲杯嘢，打吓躉。

主餐牌主要喺印有一系列特飲、咖啡、朱古力、奶昔、乳酸、梳打、沙冰、花果茶……等等，選擇超多。

而背頁就喺一系列特色小食及沙律，最啱大棚人點嚟「些牙」共享。

不過，講到晚市，主打而又划算嘅就梗喺晚市套餐啦，A-H一共8款選擇（$88-$116），包$34飲品一杯，但可以揀其他嘢飲，只需補差價就得喇，非常有彈性。而且，更可加$30，配埋一份田園沙律及甜品，抵喎。

田園沙律

好簡單嘅沙律菜，卻就淋上大量胡麻醬汁，唔可以講有咩好特色，但沙律菜夠爽脆，胡麻醬又香濃，整體都唔錯。

西班牙煙鴨胸燴飯 $102

主菜方面，同老婆都不約而同揀咗燴飯，睇外觀都有幾分似西班牙海鮮飯咁款。食落，感覺飯粒都濕潤，可以拉起收少少芝士絲，個味道帶點蕃茄香，不過，就欠缺意大利飯咬落嗰程米心煙韌嘅口感；其實，飯內混入唔少煙鴨胸，只喺影相變得唔突出而已。

黑松露帶子鮮菌燴意大利飯 $112

呢碟意大利飯做得似模似樣，上枱時亦頗有黑松露嘅香氣，睇得到飯內有好多鮮菌，不過，帶子方面就跟預期有少少落差，因為喺用咗啲珍珠帶子，比較起原粒大隻嘅鮮帶子就梗喺無咁有睇頭，幸而整體味道唔錯，而且，份量可不少啊！

芒果乳酪 +$10

餐飲就補錢要嘅芒果乳酪，因為平常都比較少飲呢類飲品。大大杯嘅乳酪，入口唔會太冰，一陣彈涼快酸爽嘅感覺，由於喺乳酪關係，芒果味就當然唔會話超濃郁，但用嚟襯兩道意大利飯就好夾。

藍莓果茶 +$16

老婆一向講健康，自然會揀啲果茶，而藍莓果茶從餐牌介紹有多重功效，尤其可幫助消化，就更啱佢啦。果茶浸耐咗，飲到尾嗰幾水就更酸香，莓味突出，飲飲吓都有啲似飲洛神花茶嘅感覺。

法國朱古力芝士蛋糕

套餐加配，所以除有沙律，仲有甜點，指定嘅芝士蛋糕3揀1，而兩款蛋糕都大大件，呢$30真喺加得抵。由於喺芝士蛋糕，所以，朱古力味較一般嘅慕絲蛋糕、純朱古力蛋糕無咁濃，但跟芝士味還算平衡，可以質感就覺得稍稍有點乾。

藍莓芝士蛋糕

另一款藍莓口味嘅美式芝士蛋糕，兩款蛋糕都唧上唔同醬汁，算喺無hea做。藍莓果醬中都有點點果肉，唔錯，而芝士蛋糕質感夠挺，芝士味都唔差，但同一個問題，口感有啲乾，估計喺存放晌凍櫃內無冚好去「保鮮」。

眼前廚師、侍應都好後生，啲服務都幾好，上菜又夠快手，做菜都算有誠意，當然，個人覺得仲有啲地方可以改善、提升吓，但整體感覺都好唔錯。

個人評分
味道：7/10
環境：8/10
服務：8/10
抵食：8/10
平均每人消費：HK$165

餐廳資料：
第三站 Station 3 Cafe
旺角洗衣街39號金雞廣場25樓08-09室
6681 1177